ថ្ងៃពុធ ទី២៩ ខែមិថុនា ឆ្នាំ២០២២
អំណានព្រះគម្ពីរពេលព្រឹក៖ ចូរក្រោកឡើង ហើយភ្លឺមកចុះ ដ្បិតពន្លឺរបស់ឯងបានមកដល់ហើយ សិរីល្អនៃព្រះយេហូវ៉ាក៏បានរះឡើងដល់ឯងដែរ ដ្បិតមើល សេចក្តីងងឹតនឹងគ្របលើផែនដី ហើយសេចក្តីសូន្យសុងនឹងគ្របលើអស់ទាំងជនជាតិ តែព្រះយេហូវ៉ាទ្រង់នឹងរះឡើងភ្លឺដល់ឯង ហើយគេនឹងឃើញសិរីល្អនៃទ្រង់ស្ថិតលើឯង អស់ទាំងសាសន៍នឹងមូលគ្នាមកឯពន្លឺរបស់ឯង ហើយស្តេចទាំងប៉ុន្មាននឹងមកឯរស្មីដែលភ្លឺចេញពីឯង ក្នុងកាលដែលឯងរះឡើង។ អេសាយ ៦០:១-៣
អំណានប្រចាំថ្ងៃ ការបកស្រាយពីការបើកសម្តែងប្រាប់ដល់ពួកជំនុំ
ពេត្រុសក៏បានបកស្រាយពីការនោះដល់ពួកគេ ហើយគាត់ក៏បានប្រាប់ដល់គេអំពីរឿងរ៉ាវដែលបានកើតឡើង ព្រមទាំងការជាក់ស្តែងរបស់គាត់ដល់ពួកគេដែរ។ គាត់បានសូមកុំឱ្យគេបែងចែករវាងអ្នកកាត់ស្បែកឬអ្នកមិនកាត់ស្បែកក្នុងការប្រារឰធ្វើពិធីក្នុងព្រះវិហារ ហើយក៏កុំឱ្យគេរាប់ពួកសាសន៍ដទៃថាមិនស្អាតដែរ ដ្បិតព្រះទ្រង់មិនបានគិតដូច្នោះទេ។ គាត់ក៏បានប្រាប់ដល់គេពីការដែលព្រះបានត្រាស់បង្គាប់គាត់ឱ្យទៅបង្រៀនដល់ពួកសាសន៍ដទៃ ពីការដែលអ្នកនាំសារបានមកឯគាត់ ព្រមទាំងពីការធ្វើដំណើរទៅកាន់ក្រុងសេសារា ដែលគាត់បានជួបនឹងកូនេលាស ព្រមទាំងពួកគ្រួរបស់គាត់ផង។ គាត់បានបង្ហាញពីការប្រុងប្រយ័ត្នរបស់គាត់នៅពេលដែលគាត់ធ្វើដំណើរទៅឯសេសារា ដោយបាននាំក្រុមជំនុំ ៦នាក់ទៅជាមួយនឹងគាត់ដែរ ហើយពួកគេសុទ្ធតែបានឃើញពីបន្ទាល់ដែលបានកើតឡើងនៅទីនោះ។ គាត់ក៏បានប្រាប់ដល់ពួកគេពីការជាក់ស្តែងរបស់កូនេលាស និងពីការដែលទេវតារបស់ព្រះបានប្រាប់គាត់ឱ្យចាត់អ្នកនាំសារឱ្យទៅអញ្ជើញសាវក ពីយ៉ុបប៉េ ដើម្បីឱ្យសាវកនោះបង្រៀនដល់លោក ព្រមទាំងពួកគ្រួលោកឱ្យបានសង្គ្រោះផង។គាត់ក៏បានប្រាប់ដល់គេ ពីការដែលព្រះវិញ្ញាណបរិសុទ្ធបានយាងមកសណ្ឋិតលើគេ ក្នុងកាលដែលគាត់កំពុងតែបង្រៀនដល់ពួកគេ។ «កាលខ្ញុំចាប់តាំងនិយាយទៅ នោះព្រះវិញ្ញាណបរិសុទ្ធក៏យាងមកសណ្ឋិតលើគេ ដូចជាបានសណ្ឋិតលើយើងរាល់គ្នាកាលពីដើមដែរ។ នោះខ្ញុំបាននឹកឃើញពីសេចក្តីដែលព្រះអម្ចាស់ទ្រង់មានបន្ទូលថា «លោកយ៉ូហានបានធ្វើបុណ្យជ្រមុជដោយទឹក តែអ្នករាល់គ្នានឹងទទួលបុណ្យជ្រមុជដោយព្រះវិញ្ញាណបរិសុទ្ធវិញ»។ ដូច្នេះ បើសិនជាព្រះបានប្រទានអំណោយទានទៅគេដូចជាបានប្រទានមកយើងដែរ ដោយជឿដល់ព្រះអម្ចាស់យេស៊ូវគ្រីស្ទ ចុះតើខ្ញុំជាអ្វីដែលអាចនឹងឃាត់ព្រះបាន? ក្រោយពីបានឮពីដំណើរដែលលោកពេត្រុសបានរៀបរាប់ នោះពួកជំនុំបាននៅស្ងៀម ព្រមទាំងបានជឿថា អ្វីដែលពេត្រុសបានធ្វើ គឺជាការបំពេញនូវផែនការរបស់ព្រះ។ ហើយពួកគេក៏បានជឿទៀតថា ការប្រកាន់របស់ពួកគេ ទៅលើសាសន៍ដទៃ ត្រូវតែលុបបំបាត់ចោលដោយសារតែ ដំណឹងល្អរបស់ព្រះគ្រីស្ទ។ កាលបានឮសេចក្តីនោះហើយ នោះគេបាត់មាត់ ក៏ត្រឡប់ជាសរសើរដល់ព្រះវិញថា ដូច្នេះព្រះទ្រង់ក៏ប្រោសប្រទានការប្រែចិត្តដល់ពួកសាសន៍ដទៃឱ្យគេមានជីវិតដែរហ្ន៎។
អំណានព្រះគម្ពីរពេលល្ងាច៖ កិច្ចការ ជំពូក ១១:១-១៨
ខចងចាំ៖ ពេត្រុសឆ្លើយតបថា ចូរអ្នករាល់គ្នាប្រែចិត្តចុះ ហើយទទួលបុណ្យជ្រមុជទឹកទាំងអស់គ្នា ដោយនូវព្រះនាមព្រះយេស៊ូវគ្រីស្ទ ប្រយោជន៍ឲ្យបានរួចពីបាប នោះអ្នករាល់គ្នានឹងទទួលអំណោយទាន ជាព្រះវិញ្ញាណបរិសុទ្ធ។ កិច្ចការ ២:៣៨
