ថ្ងៃសុក្រ ទី០៣ ខែមិថុនា ឆ្នាំ២០២២
អំណានព្រះគម្ពីរពេលព្រឹក៖ កុំឲ្យគម្ពីរក្រឹត្យវិន័យនេះភ្លេចបាត់ពីមាត់ឯងឡើយ គឺត្រូវឲ្យនឹកជញ្ជឹងទាំងយប់ទាំងថ្ងៃវិញ ដើម្បីឲ្យបានកាន់ ហើយប្រព្រឹត្តតាមអស់ទាំងសេចក្តី ដែលកត់ទុកក្នុងគម្ពីរនេះឯង ដ្បិតគឺយ៉ាងនោះដែលឯងនឹងបានកើតការនៅគ្រប់ទាំងផ្លូវឯង ហើយនឹងបានចំរើនឡើងផង។ យ៉ូស្វេ ១:៨
អំណានប្រចាំថ្ងៃ ការរៀបចំពួកជំនុំ
អ្នកទាំង៧នាក់នោះ ត្រូវបានគេញែកចេញជាពិសេសឱ្យបំពេញតួនាទីរបស់គេ ដោយការអធិស្ឋានដាក់ដៃពីលើ។ អ្នកដែលគេបានអធិស្ឋានបែបនេះក៏មិនបានដកចេញពីការបង្រៀននូវសេចក្តីជំនឿរបស់គេដែរ។ ផ្ទុយទៅវិញ មានសេចក្តីកត់ត្រាទុកមកថា «ស្ទេផាន ដែលជាអ្នកពោរពេញ ដោយសេចក្តីជំនឿនិងព្រះចេស្តារបស់ព្រះបានធ្វើការអស្ចារ្យជាច្រើនក្នុងចំណោមក្រុមជំនុំ»។ ហើយពួកអ្នកដែលត្រូវបានជ្រើសរើសទាំងនោះ ក៏សុទ្ធតែមានគុណសម្បត្តិគ្រប់គ្រាន់ក្នុងការដឹកនាំដោយសេចក្តីពិត។ ពួកគេសុទ្ធតែមានការវិនិច្ឆ័យខ្ពស់ ហើយមានការប្រុងប្រយ័ត្នជានិច្ច ក្នុងការដោះស្រាយបញ្ហានៃការពិបាកនានានិងការច្រណែនឬការរអ៊ូរទាំផ្សេងៗ។
ការជ្រើសរើសមនុស្សឱ្យជួយគ្រប់គ្រងការងាររបស់ពួកជំនុំដូច្នេះ គឺដើម្បីឱ្យពួកសាវកមានពេលវេលាសម្រាប់ការងារពិសេសនៃការបង្រៀនពីសេចក្តីពិតនេះគឺជាព្រះពរយ៉ាងធំក្រៃលែងមកពីព្រះ។ ពួកជំនុំបានកើនឡើងទាំងចំនួននិងទាំងកម្លាំង។ «ព្រះបន្ទួលក៏បានផ្សាយទៅកាន់តែច្រើនឡើង ហើយចំនួនពួកសិស្សបានចម្រើនក្រៃលែង នៅក្រុងយេរូសាឡិម ឯពួកសង្ឃក៏មានសន្ធឹកចុះចូលជឿដែរ»។
វាគឺជាការចាំបាច់ណាស់ដែលព្រះវិហារសព្វថ្ងៃនេះគួរតែរក្សានូវរចនាសម្ព័ន្ធ ដែលបានរៀបចំឡើងនៅជំនាន់ពួកសាវកដែរ។ ការរីកចម្រើនទាំងឡាយនឹងកើតមានឡើង អាស្រ័យទៅលើផ្នែកផ្សេងៗ ដែលបានដឹកនាំដោយបុគ្គលដែលមានសមត្ថភាព ហើយមានគុណសម្បត្តិគ្រប់គ្រាន់ក្នុងការបំពេញកិច្ចការនោះ។ អស់អ្នកណាដែលព្រះបានជ្រើសរើសឱ្យធ្វើជាអ្នកដឹកនាំក្នុងការបំរើទ្រង់ ត្រូវមើលការខុសត្រូវខាងព្រលឹងវិញ្ញាណរបស់ពួកជំនុំ គួរតែត្រូវបានញែកចេញពីការងារលោកិយឱ្យបានដាច់ស្រឡះ។ អស់អ្នកដែលព្រះបានជ្រើសរើសឱ្យទទួលខុសត្រូវខាងព្រះបន្ទូល ហើយនិងគោលលទ្ធិ គួរតែមានពេលវេលាដើម្បីអធិស្ឋាន និងសិក្សាព្រះបន្ទូលរបស់ព្រះ។ ការទទួលខុសត្រូវខាងព្រលឹងវិញ្ញាណរបស់ពួកគេនឹងត្រូវស្រអាប់ ដោយសារតែការដោះស្រាយបញ្ហាតូចតាចផ្សេងៗ ដែលកើតមានឡើង នៅក្នុងពួកជំនុំទាំងមូល។ វាជាការត្រឹមត្រូវដែលនាំយកបញ្ហាខាងលោកិយមកចំពោះគណៈកម្មការដ៏សមស្របណាមួយរបស់ព្រះវិហារ ដើម្បីសម្រួលបញ្ហានោះ។ ប៉ុន្តែ ប្រសិនបើបញ្ហានោះវាពិបាកដោះស្រាយ នោះក្រុមប្រឹក្សាភិបាលរបស់ព្រះវិហារ ទាំងមូលនឹងចូលរូម ដោះស្រាយបញ្ហានោះ។
អំណានព្រះគម្ពីរពេលល្ងាច៖ ទីតុស ជំពូក ១:៤-៩
ខចងចាំ៖ ក៏គ្មានណាមួយប្រជ្រៀតគ្នានឹងគ្នាដែរ គឺទាំងអស់ដើរតាមជួររៀងខ្លួន គេទំលុះទំលាយគ្រឿងសស្ត្រាវុធឥតរុញរាថយក្រោយឡើយ។ យ៉ូអែល ២:៨
