ថ្ងៃសៅរ៍ ទី០៤ ខែមិថុនា ឆ្នាំ២០២២
(ជំពូកនេះមានមូលដ្ឋាននៅក្នុងគម្ពីរកិច្ចការ ៦:៨-៧:៦០)
អំណានព្រះគម្ពីរពេលព្រឹក៖ តែបើអ្នករាល់គ្នាត្រូវរងទុក្ខ ដោយព្រោះសេចក្តីសុចរិតវិញ នោះអ្នករាល់គ្នាមានពរពិត មិនត្រូវឲ្យអ្នកខ្លាចចំពោះសេចក្តីស្ញែងខ្លាចរបស់គេឡើយ ក៏កុំឲ្យថប់បារម្ភដែរ ចូរឲ្យតាំងព្រះគ្រីស្ទឡើង ជាបរិសុទ្ធ នៅក្នុងចិត្តអ្នករាល់គ្នា ទុកជាព្រះអម្ចាស់ចុះ ហើយឲ្យប្រុងប្រៀបជានិច្ច ដោយសុភាព ហើយកោតខ្លាច ដើម្បីនឹងតបឆ្លើយដល់អ្នកណាដែលសួរពីហេតុនៃសេចក្តីសង្ឃឹមរបស់អ្នករាល់គ្នា។ ពេត្រុសទី១ ៣:១៤-១៥
អំណានប្រចាំថ្ងៃ
លោកស្ទេផានជាមនុស្សយ៉ាងសកម្មក្នុងការងាររបស់ព្រះ ហើយបានប្រកាសសេចក្តីជំនឿរបស់គាត់ដោយក្លាហាន។ «គ្រានោះមានអ្នកខ្លះក្នុងពួកដែលហៅថា ពួកអ្នកបំរោស និងពួកស្រុកគីរេន ពួកស្រុកអ័លេក្សានទ្រា ពួកអ្នកមកពីស្រុកគីលីគា ហើយស្រុកអាស៊ី គេលើកគ្នាមកជជែកនឹងស្ទេផាន តែគេពុំអាចទប់ទល់នឹងប្រាជ្ញា ហើយនិងព្រះវិញ្ញាណ ដែលគាត់អាងនឹងនិយាយនោះបានទេ»។
ពួកសិស្សនៃក្រុមគ្រូបង្រៀនច្បាប់ជនជាតិយូដាដ៏អស្ចារ្យទាំងអស់នេះ ទុកចិត្តដល់ខ្លួនឯងថា ពួកគេអាចនឹងទទួលបានជោគជ័យទាំងស្រុងលើលោកស្ទេផាន ក្នុងការពិភាក្សាជាសាធារណៈ ដោយគិតស្មានថាគាត់ជាមនុស្សល្ងង់ខ្លៅ។ ប៉ុន្តែគាត់មិនគ្រាន់តែបាននិយាយដោយអំណាចព្រះវិញ្ញាណបរិសុទ្ធប៉ុណ្ណោះទេ ប៉ុន្តែគាត់បាននិយាយដោយត្រង់ៗ ហើយច្បាស់ៗទៅកាន់ហ្វូងមនុស្សដែលបានមកប្រជុំគ្នាកុះករនោះថា គាត់ជាសិស្សនៃបទទំនាយ ហើយបានរៀនពីច្បាប់គ្រប់ទាំងអស់ផង។ គាត់បានការពារនិងគាំទ្រនូវសេចក្តីពិតដែលគាត់គាំទ្រហើយបានយកឈ្នះទាំងស្រុងទៅលើអ្នកប្រឆាំងរបស់គាត់។
ពួកសង្ឃនិងពួកមេដឹកនាំទាំងឡាយដែលបានឃើញការសម្តែងអំណាចដ៏អស្ចារ្យរបស់ស្ទេផាន សម្អប់ដ៏ជូរចត់របស់គេក៏បានពុះពោរឡើង។ ជំនួសឱ្យការចុះចូលជាមួយនឹងភស្តុតាងដែលគាត់បានបង្ហាញ ពួកគេបានប្តេជ្ញាចិត្តបញ្ឈប់សំឡេងរបស់លោកស្ទេផានដោយសម្លាប់គាត់បង់។
ដូច្នេះគេក៏បាននាំគាត់ទៅចំពោះមុខក្រុមប្រឹក្សាសានហៃឌ្រីនដើម្បីជំនុំជម្រះ។ ពួកសាសន៍យូដាដែលមានចំណេះដឹងខ្ពស់នៅប្រទេសជិតខាងជុំវិញត្រូវបានគេកោះហៅឱ្យមកឆ្លើយបដិសេធ ការតវ៉ានៃការចោទប្រកាន់នោះ។ លោកសុលជាមនុស្សដែលបានប្រកាសខ្លួនឯងថាជាអ្នកប្រឆាំងជំទាស់នឹងគោលលទ្ធិនៃព្រះគ្រីស្ទ និងជាអ្នកបៀតបៀន ដល់អស់អ្នកដែលជឿដល់ទ្រង់នោះ ក៏បាននៅទីនោះដែរ។ បុរសដែលមានចំណេះដឹងជ្រៅជ្រះនេះបានចូលរួមនៅក្នុងការដឹកនាំប្រឆាំងទាស់នឹងលោកស្ទេផាន។ ហើយបានធ្វើឱ្យហ្វូងមនុស្សជឿថាស្ទេផានកំពុងតែអត្ថាធិប្បាយអំពីគោលលទ្ធិបោកប្រាស់ ដែលនាំឱ្យមានគ្រោះថ្នាក់។
ប៉ុន្តែ សុលបានឃើញថាស្ទេផាន ជាមនុស្សម្នាក់ដែលមានការអប់រំខ្ពង់ខ្ពស់ ដូចជារូបគាត់ដែរ និងជាមនុស្សម្នាក់ដែលមានការយល់ដឹងច្បាស់លាស់ពីបំណងព្រះហឫទ័យរបស់ព្រះ ក្នុងការចែកចាយដំណឹងល្អ ចេញទៅគ្រប់ទាំងសាសន៍។
អំណានព្រះគម្ពីរពេលល្ងាច៖ កិច្ចការ ជំពូក ៦:៨-១៥
ខចងចាំ៖ ក៏គ្មានណាមួយប្រជ្រៀតគ្នានឹងគ្នាដែរ គឺទាំងអស់ដើរតាមជួររៀងខ្លួន គេទំលុះទំលាយគ្រឿងសស្ត្រាវុធឥតរុញរាថយក្រោយឡើយ។ យ៉ូអែល ២:៨
