ថ្ងៃអង្គារ ទី០៧ ខែមិថុនា ឆ្នាំ២០២២
អំណានព្រះគម្ពីរពេលព្រឹក៖ ប៉ុន្តែ ខ្ញុំប្រាប់ថា ត្រូវស្រឡាញ់ពួកខ្មាំងសត្រូវ ត្រូវឲ្យពរដល់អ្នកណាដែលប្រទេចផ្តាសា ត្រូវប្រព្រឹត្តល្អនឹងអ្នកណាដែលស្អប់អ្នករាល់គ្នា ហើយត្រូវអធិស្ឋាន ឲ្យអ្នកណាដែលធ្វើទុក្ខបៀតបៀនដល់អ្នករាល់គ្នាវិញ។ ម៉ាថាយ ៥:៤៤
អំណានប្រចាំថ្ងៃ ការស្លាប់របស់ទុក្ករបុគ្គល(អ្នកស្មោះត្រង់នឹងជំនឿរបស់ខ្លួន)
ការស្លាប់របស់ទុក្ករបុគ្គល (អ្នកស្មោះត្រង់នឹងជំនឿរបស់ខ្លួន) ពួកសង្ឃនិងពួកអ្នកដឹកនាំខឹងនឹងរឿងនេះជាខ្លាំង។ ពួកគេទាំងនោះហាក់ដូចជាសត្វព្រៃដ៏សាហាវមិនដូចជាមនុស្សឡើយ។ ពួកគេបានស្ទុះទៅរកលោកស្ទេផានទាំងសង្កៀតធ្មេញ។ ប៉ុន្តែ គាត់មិនបានភ័យខ្លាចឡើយ គាត់បានដឹងថាការនេះនឹងត្រូវកើតឡើងដល់រូបគាត់។ ទឹកមុខរបស់គាត់ស្ងប់ស្ងៀម ហើយបានបញ្ចេញពន្លឺដូចជាទេវតា។ ពួកសង្ឃដែលមានកំហឹងពុះពោរ ហើយនិងហ្វូងមនុស្សដែលកំពុងរំជើបរំជួល មិនបានកោតខ្លាចគាត់ឡើយ។ «តែគាត់បានពេញដោយព្រះវិញ្ញាណបរិសុទ្ធ នោះក៏សម្លឹងមើលទៅលើមេឃ ឃើញសិរីល្អនៃព្រះនឹងព្រះយេស៊ូវនៅខាងស្តាំនៃព្រះហស្តរបស់ព្រះ រួចគាត់មានវាចារថា មើលខ្ញុំឃើញមេឃចំហ នឹងកូនមនុស្សឈរនៅខាងព្រះហស្តស្តាំនៃព្រះ»។
ទស្សនីយភាពនៅជុំវិញគាត់បានរសាត់បាត់ចេញពីចក្ខុនិម្មិតរបស់គាត់បន្តិចម្តងៗ។ ទ្វារនៃស្ថានសួគ៌ត្រូវបានបង្ហើបបន្តិច ហើយស្ទេផានបានក្រឡេកមើលទៅឃើញសិរីល្អនៃព្រះរាជដំណាក់របស់ព្រះ និងឃើញព្រះគ្រីស្ទដែលហាក់ដូចជាទើបតែក្រោកពីបល្ល័ង្ករបស់ទ្រង់ ក្រោកឈរបំរុងនឹងជួយដល់អ្នកបំរើរបស់ទ្រង់ ដែលហៀបនឹងទទួលការឈឺចាប់ ដល់ហ៊ានប្តូរជីវិតដោយសារព្រះនាមទ្រង់។ នៅពេលដែលលោកស្ទេផានបានប្រកាសពីទស្សនីយភាពដ៏មានសិរីរុងរឿងដែលបានបើកឡើងនៅមុខគាត់ វាបានធ្វើឱ្យពួកអ្នកបៀតបៀនរបស់គាត់អត់ទ្រាំលែងបាន។ ពួកគេបានបិទត្រចៀកកុំឱ្យឮសំដីរបស់គាត់ ហើយគេបានស្រែកដោយសំឡេងយ៉ាងខ្លាំង រួចស្ទុះចូលព្រមគ្នាទាំងកំហឹង សំដៅទៅរកគាត់។ «គេចោលស្ទេផាននឹងថ្ម កំពុងដែលគាត់ទូលអង្វរដល់ព្រះថា ឱព្រះអម្ចាស់យេស៊ូអើយ សូមទទួលវិញ្ញាណទូលបង្គំផង នោះគាត់លុតជង្គង់ចុះ រួចស្រែកឡើងជាសំឡេងខ្លាំងថា ឱព្រះអម្ចាស់អើយ សូមកុំរាប់បាបនេះ ដល់គេឡើយ កាលគាត់បានពោលដូច្នោះហើយ នោះក៏ដេកលក់ទៅ»។
នៅកណ្តាលសេចក្តីទុក្ខព្រួយជាទម្ងន់នៃសេចក្តីស្លាប់យ៉ាងឃោរឃៅ ទុក្ករបុគ្គលដ៏ស្មោះត្រង់នឹងសេចក្តីជំនឿនេះបានអធិស្ឋានឱ្យឃាតករបស់ខ្លួន ដូចជាព្រះអម្ចាស់របស់គាត់ដែរ។ គេបានតម្រូវឱ្យសាក្សីដែលបានចោទប្រកាន់លោកស្ទេផាន ចោលគាត់នឹងដុំថ្មមុនគេ។ មនុស្សទាំងអស់នេះបានទម្លាក់ខោអាវរបស់គេ នៅក្បែរជើងសុល ដែលជាអ្នកមានចំណែកក្នុងជម្លោះនោះនិងបានយល់ព្រមឱ្យគេសម្លាប់អ្នកជាប់ឃុំនោះផងដែរ។
អំណានព្រះគម្ពីរពេលល្ងាច៖ កិច្ចការ ជំពូក ៧:៥៤-៦០
ខចងចាំ៖ ដូច្នេះ ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នាដែលគង់នៅស្ថានសួគ៌។ ម៉ាថាយ ៥:១៦
