ថ្ងៃព្រហស្បតិ៍ ទី១៤ ខែកក្កដា ឆ្នាំ២០២២
អំណានព្រះគម្ពីរពេលព្រឹក៖ សូមឲ្យអ្នករាល់គ្នាបានប្រកប ដោយព្រះគុណ និងសេចក្តីសុខសាន្ត អំពីព្រះដ៏ជាព្រះវរបិតា និងពីព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា ដែលទ្រង់បានប្រគល់ព្រះអង្គទ្រង់ទៅ ដោយព្រោះបាបយើងរាល់គ្នា ដើម្បីនឹងប្រោស ឲ្យយើងបានរួចពីលោកីយ៍ ដ៏អាក្រក់សព្វថ្ងៃនេះ តាមបំណងព្រះហឫទ័យរបស់ព្រះដ៏ជាព្រះវរបិតានៃយើង សូមឲ្យទ្រង់បានសិរីល្អ ដល់អស់កល្បជានិច្ចរៀងតទៅ អាម៉ែន។ កាឡាទី ១:៣-៥
អំណានប្រចាំថ្ងៃ ការសម្រេចចិត្ត
ប៉ុន្តែ ទោះបីជាយ៉ាងណាក៏ដោយ ក៏ពួកសាសន៍ដទៃមិនត្រូវទំនាស់នឹងគោលការខាងសាច់ឈាម ជាមួយនឹងក្រុមចាស់ទុំយូដាដែរ។ ដូច្នេះពួកសាវកនិងពួកចាស់ទុំ ក៏បានសម្រេចចិត្តសរសេរ សំបុត្រទៅកាន់ពួកសាសន៍ដទៃ ដើម្បីប្រាប់ដល់ពួកគេឱ្យពួកគេជៀសវាងការទទួលទានសាច់ដែលបានថ្វាយដល់រូបព្រះ ពីការមន្តអាគម ពីការសម្លាប់ដោយព្យួរក ហើយពីឈាមផងដែរ។ ពួកគេ ត្រូវតែគោរពតាមក្រឹត្យវិន័យទាំង១០ប្រការរបស់ព្រះ ហើយត្រូវរស់នៅដោយបរិសុទ្ធទៀតផង។ ពួកគេក៏បានធានាដល់ពួកសាសន៍ដទៃថា អ្នកដែលប្រាប់ឱ្យពួកគេធ្វើការកាត់ស្បែកនោះ មិនបានទទួលការអនុញ្ញាតពីពួកសាវកឡើយ។
លោកប៉ុលហើយនិងបាណាបាស ត្រូវបានគេទទួលស្គាល់ថាជាអ្នកដែលបានពុះពារ និងលះបង់ជីវិតដើម្បីបំរើកិច្ចការរបស់ព្រះ។ ពួកចាស់ទុំក៏បានបញ្ជូនយូដាស និងស៊ីឡាស់ឱ្យទៅឯពួកសាសន៍ដទៃជាមួយនឹងពួកគេ ដើម្បីប្រកាសដល់ពួកសាសន៍ដទៃអំពីសេចក្តីសម្រេចរបស់ក្រុមប្រឹក្សា។ អ្នកបំរើរបស់ព្រះទាំងបួននាក់ក៏ត្រូវបានបញ្ជូនឱ្យធ្វើដំណើរទៅកាន់ក្រុងអាន់ទីយ៉ូក ដោយ មានសំបុត្រ ព្រមទាំងសារដើម្បីបញ្ឈប់នូវវិវាទទាំងឡាយដែលកើតឡើងនៅទីនោះ ដ្បិតនេះហើយគឺជាព្រះសូរសៀងរបស់ព្រះដ៏ខ្ពស់ ដែលបានប្រទានដល់ផែនដីនេះ។
ក្រុមប្រឹក្សាដែលបានធ្វើការសម្រេចពីរឿងក្តីនេះ រួមមានសាសន៍យូដា ព្រះវិហារគ្រីស្ទានរបស់ពួកសាសន៍ដទៃ ពួកចាស់ទុំពីទីក្រុងយេរូសាឡិម គូវិវាទពីក្រុងអាន់ទីយ៉ូក ព្រមទាំងព្រះវិហារ ដែលមានឥទ្ធិពលទាំងឡាយផងដែរ។ ក្រុមប្រឹក្សានេះមិនបានអះអាងថា ខ្លួនល្អឥតខ្ចោះចំពោះការសម្រេចរបស់ខ្លួនឡើយ តែពួកគេដើរតាមគន្លង ពន្លឺហើយនិងសេចក្តីថ្លៃថ្នូររបស់ពួកជំនុំ ដែលបានបង្កើតឡើងដោយព្រះហឫទ័យដ៏បរិសុទ្ធរបស់ព្រះវិញ។ ពួកគេបានយល់ឃើញព្រមគ្នាថា ព្រះទ្រង់សព្វព្រះហឫទ័យដល់ពួកសាសន៍ដទៃដោយនូវព្រះវិញ្ញាណបរិសុទ្ធ ហើយពួកគេត្រូវធ្វើតាមការដឹកនាំរបស់ព្រះវិញ្ញាណវិញ។
ក្រុមជំនុំទាំងអស់មិនបានកោះហៅដើម្បីធ្វើការបោះឆ្នោតសម្រេចពីការនេះទេ។ ពួកសាវកនិងពួកចាស់ទុំ ដែលជាអ្នកមានឥទ្ធិពល ហើយដែលមានការពិចារណាខ្ពស់ បានធ្វើសេចក្តីសម្រេច ហើយអស់ទាំងក្រុមជំនុំគ្រីស្ទាន ត្រូវទទួលយកហើយប្រតិបត្តិតាម។ ការសម្រេចនេះ មិនបានធ្វើឱ្យគ្រប់គ្នាពេញចិត្តឡើយ ហើយក៏មានអ្នកខ្លះបានធ្វើតាមការយល់ឃើញរបស់គេដែរ។
ពួកគេបានរអ៊ូរទាំ ព្រមទាំងធ្វើការចាប់កំហុសដល់អ្នកបំរើរបស់ព្រះ ដែលបានទទួលការតែងតាំងឱ្យបង្រៀនអំពីព្រះវិញ។ ការមិនចុះសម្រុងនេះបានកើតឡើងតាំងពីដំបូង ហើយក៏នឹងបន្តរហូត ដល់ទីបំផុតដែរ។
អំណានព្រះគម្ពីរពេលល្ងាច៖ កិច្ចការ ជំពូក ១៥:២២-៤១
ខចងចាំ៖ សេចក្តីនេះចប់តែប៉ុណ្ណោះ ទាំងអស់បានសំដែងទុកហើយ ដូច្នេះ ចូរកោតខ្លាចដល់ព្រះ ហើយកាន់តាមបញ្ញត្តទ្រង់ចុះ ដ្បិតប៉ុណ្ណេះឯងជាកិច្ចទាំងមូលដែលមនុស្សត្រូវធ្វើ ពីព្រោះព្រះទ្រង់នឹងនាំគ្រប់ការទាំងអស់មកដើម្បីជំនុំជំរះ ព្រមទាំងអ្វីៗដែលលាក់កំបាំងផង ទោះល្អឬអាក្រក់ក្តី។ សាស្តា ១២:១៣-១៤
