ថ្ងៃសុក្រ ទី១៥ ខែកក្កដា ឆ្នាំ២០២២
អំណានព្រះគម្ពីរពេលព្រឹក៖ បងប្អូនអើយ ខ្ញុំមិនរាប់ថាខ្លួនខ្ញុំចាប់បានហើយនោះទេ តែមានសេចក្តីនេះ១ គឺថា ខ្ញុំភ្លេចសេចក្តីទាំងប៉ុន្មានដែលកន្លងទៅហើយ ក៏ខំមមុលឈោងទៅឯសេចក្តីខាងមុខទៀត ទាំងរត់ដំរង់ទៅឯទី ដើម្បីឲ្យបានរង្វាន់នៃការងារដ៏ខ្ពស់របស់ព្រះ ក្នុងព្រះគ្រីស្ទយេស៊ូវ ។ ភីលីព ៣:១៣-១៤
អំណានប្រចាំថ្ងៃ
ប៉ុលគឺជាអ្នកបំរើរបស់ព្រះមួយរូបដែលមិនចេះនឿយហត់ ហើយគាត់បានធ្វើដំណើរពីកន្លែងមួយទៅកន្លែងមួយ ជួនកាលពីតំបន់ដែលគ្មានការទទួលរាក់ទាក់ ជួនកាលត្រូវធ្វើដំណើរលើផ្ទៃទឹកដែលមានព្យុះបក់បោក។ គ្មានអ្វីដែលអាចរារាំងគាត់មិនឱ្យធ្វើកិច្ចការបំរើព្រះបានឡើយ។ គាត់គឺជាអ្នកបំរើរបស់ព្រះ ដូច្នេះគាត់ត្រូវតែបំរើការងារថ្វាយទ្រង់ ដើម្បីបំពេញតាមព្រះហឫទ័យរបស់ទ្រង់។ តាមរយៈសំបុត្រទាំងឡាយរបស់គាត់ ព្រមទាំងតាមរយៈការចែកចាយរបស់គាត់ផ្ទាល់បានផ្តល់កម្លាំងចិត្តដល់ពួកជំនុំរបស់ព្រះជាច្រើន។ សម្រាប់យើងរាល់គ្នាដែលរស់នៅក្នុងគ្រាដែលជិតដល់ទីចុងបំផុតនៃផែនដីនេះ សាររបស់គាត់ដែលគាត់បានលើកឡើងបាននិយាយអំពីគ្រោះថ្នាក់ទាំងឡាយដែលនឹងគំរាមកំហែងដល់ពួកជំនុំ ហើយនិងពីគោលការខុសឆ្គងទាំងឡាយ ដែលរាស្ត្ររបស់ព្រះនឹងត្រូវប្រឈមមុខ។
សាវកប៉ុលបានធ្វើដំណើរពីប្រទេសមួយទៅប្រទេសមួយ ពីក្រុងមួយទៅក្រុងមួយ ដើម្បីបង្រៀនពីព្រះគ្រីស្ទ ហើយបានបង្កើតពួកជំនុំផ្សេងៗផងដែរ។ នៅទីណាដែលគាត់ជួបប្រទះអ្នកដែលព្រមស្តាប់គាត់ នោះគាត់នឹងធ្វើការកែតម្រូវការប្រព្រឹត្តិខុសឆ្គងទាំងឡាយ ដើម្បីឱ្យមនុស្សងាកមករកផ្លូវត្រូវវិញ។ អស់អ្នកដែលបានទទួលជឿដល់ព្រះគ្រីស្ទតាមរយៈគាត់ នោះគាត់បានបង្កើតឱ្យមានជាពួកជំនុំឡើង ទោះបីជាមានអ្នកជឿតិចតួចក៏ដោយ។ ប៉ុលមិនដែលភ្លេចពួកជំនុំតូចៗ ដែលគាត់បានបង្កើតឡើយ ផ្ទុយទៅវិញ ដោយសារតែពួកជំនុំទាំងនោះនៅតូចនេះហើយ ដែលធ្វើឱ្យគាត់យកចិត្តទុកដាក់នឹងពួកជំនុំទាំងនោះ។
ការត្រាស់ហៅរបស់លោកប៉ុលទាមទារការបំរើដោយសប្បុរសគ្រប់យ៉ាង រាប់ទាំងការចិញ្ចឹមជីវិតរបស់គាត់ ការរៀបចំឱ្យមានពួកជំនុំ ព្រមទាំងការសរសេរសំបុត្រលើកទឹកចិត្តដល់ពួកជំនុំដែលគាត់បានបង្កើតផងដែរ។ តែទោះបីជាគាត់ត្រូវធ្វើការទាំងនេះព្រមគ្នាក៏ដោយ ក៏គាត់នៅតែនិយាយថា «នេះជាសេចក្តីតែមួយដែលខ្ញុំធ្វើ» ភីលីព ៣:១៣។ គោលដៅមួយដែលនៅចំពោះមុខគាត់ និងគ្រប់ការដែលគាត់ធ្វើជានិច្ច គឺការស្មោះត្រង់ជាមួយនឹងព្រះជាម្ចាស់ ដែលបានលេចមកឯគាត់ ក្នុងកាលដែលគាត់នៅជាអ្នកបៀតបៀនដល់អ្នកដែលជឿដល់ព្រះនាម ទ្រង់នៅឡើយ។ គោលបំណងចំបងនៅក្នុងជីវិតរបស់គាត់ គឺការបំរើ និងការតម្កើងដល់ព្រះ ដែលគាត់ធ្លាប់បានប្រមាថមើលងាយកាលពីមុន។ សេចក្តីប្រាថ្នា តែមួយគត់របស់គាត់នៅពេលនេះ គឺការសង្គ្រោះមនុស្សថ្វាយដល់ព្រះ ហើយទោះបីជាមានការ បៀតបៀនពីសំណាក់ពួកយូដាឬសាសន៍ដទៃក្តី ក៏គ្មានអ្វីដែលអាចរារាំងគាត់ពីការនេះបានដែរ។
អំណានព្រះគម្ពីរពេលល្ងាច៖ កិច្ចការ ជំពូក ១៦:១-១៥
ខចងចាំ៖ សេចក្តីនេះចប់តែប៉ុណ្ណោះ ទាំងអស់បានសំដែងទុកហើយ ដូច្នេះ ចូរកោតខ្លាចដល់ព្រះ ហើយកាន់តាមបញ្ញត្តទ្រង់ចុះ ដ្បិតប៉ុណ្ណេះឯងជាកិច្ចទាំងមូលដែលមនុស្សត្រូវធ្វើ ពីព្រោះព្រះទ្រង់នឹងនាំគ្រប់ការទាំងអស់មកដើម្បីជំនុំជំរះ ព្រមទាំងអ្វីៗដែលលាក់កំបាំងផង ទោះល្អឬអាក្រក់ក្តី។ សាស្តា ១២:១៣-១៤
