​អំណានព្រះគម្ពីរពេលព្រឹក៖ ដ្បិតខ្ញុំ​ជឿជាក់​ថា ទោះ​ស្លាប់ ឬ​រស់ ពួក​ទេវតា ឬ​អំណាច​អ្វី ការ​អ្វី​នៅ​ជាន់​នេះ ឬ​ទៅ​មុខ ឬ​ឥទ្ធិឫទ្ធិ​អ្វី ទី​មាន​កំពស់ទី​ជំរៅ ឬ​របស់​អ្វី​ដែល​កើត​មក​ឯ​ទៀត​ក្តី នោះ​ពុំ​អាច​នឹង​ពង្រាត់​យើង ចេញ​ពី​សេចក្តី​ស្រឡាញ់​របស់​ព្រះ ដែល​នៅ​ក្នុង​ព្រះគ្រីស្ទយេស៊ូវ ជា​ព្រះអម្ចាស់​នៃ​យើង​រាល់​គ្នា​ទៅបាន​ឡើយ។ រ៉ូម ៨:៣៨-៣៩

អំណានប្រចាំថ្ងៃ ​

អស់រយៈពេលជាច្រើនឆ្នាំ ដែលលោកពេត្រុស និងលោកប៉ុលបានចែកផ្លូវគ្នាក្នុងការផ្សាយដំណឹងល្អរបស់ព្រះ ដោយប៉ុលជាអ្នកផ្សាយដំណឹងល្អដល់ពួកសាសន៍ដទៃ ឯពេត្រុសជាអ្នកផ្សាយដំណឹងល្អដល់សាសន៍យូដា។ ប៉ុន្តែ ដោយព្រះចេស្តារបស់ព្រះ អ្នកទាំងពីរនាក់នេះ ជាអ្នកពាំនាំ​យកព្រះបន្ទូលរបស់ព្រះ ទៅចែកផ្សាយដល់គ្រប់ទាំងទីក្រុង ទូទាំងពិភព​លោកទាំងមូល ហើយពួកគេនឹងត្រូវបង្ហូរឈាម ដើម្បីជាគ្រាប់ពូជដល់​ចម្រូតដ៏ធំ ដែលមានទាំងពួកបរិសុទ្ធ និងពួកអ្នកដែលលះបង់ជីវិតដើម្បីព្រះ។

នៅពេលដែលប៉ុលត្រូវបានគេចាប់ខ្លួនលេើកទីពីរនោះ គេក៏បានចាប់​ខ្លួនលោកពេត្រុសដែរ។ ដោយសារតែគាត់បានបកអាក្រាតការបោកបញ្ឆោតរបស់គ្រូមន្តអាគមម្នាក់ដែលមានឈ្មោះថាស៊ីម៉ូន ម៉ាកុស ហើយ​បាន​ផ្ចាញ់​គេ ក្នុងកាលដែលគេតាមគាត់ទៅឯក្រុងរ៉ូម ដើម្បីរារាំងការផ្សាយដំណឹងល្អ នោះបានធ្វើឱ្យពួកអ្នកមានអំណាចស្អប់គាត់ជាខ្លាំង។ ព្រះចៅអធិរាជណេរ៉ូ ជាស្តេចនិយមមន្តអាគម ដែលបានគាំទ្រដល់ស៊ីម៉ូន ម៉ាកុសនោះបានយកលេសទាស់នឹងសាវកពេត្រុស ហើយក៏បានចេញបញ្ជាឱ្យចាប់ខ្លួនពេត្រុស។ ព្រះចៅអធិរាជអង្គនោះបានព្យាបាទលោកពេត្រុសយ៉ាងខ្លាំង ដោយសារតែគាត់បានធ្វើឱ្យសមាជិកមួយចំនួនរបស់ទ្រង់ក្លាយជាគ្រីស្ទានដែរ កាលពី​ការ​ជាប់ទោសលើកមុន។ ដោយសារហេតុនេះហើយ បានជាស្តេច​អង្គនេះបានធ្វើឱ្យការជាប់ទោសលើកនេះវេទនាជាងមុនទៅទៀត ដើម្បីកុំឱ្យគាត់មានឱកាសនឹងនិយាយពីព្រះយេស៊ូវទៀត។ មិនតែប៉ុណ្ណោះ ទ្រង់ចង់កាត់ទោសប្រហារជីវិតពេត្រុសយ៉ាងឆាប់ជាទីបំផុត ឱ្យតែទ្រង់រកបានហេតុផលសមរម្យណាមួយ។ អធិរាជ ណេរ៉ូ មានការស្ញប់ស្ញែង​យ៉ាងខ្លាំងចំពោះអំណាចនៃសម្តីរបស់ពេត្រុសកាលពីរឿងក្តីមុនហើយក៏បាន ពន្យារការកាត់ទោសនេះ ដោយពុំបានធ្វើការដោះលែង ឬចោទប្រកាន់ដែរ។ មិនយូរប៉ុន្មាន ក្រោយ​ពីការកាត់ទោសពេត្រុស ប៉ុលក៏ត្រូវបានគេបញ្ជូនទៅសម្លាប់ដែរ ប៉ុន្តែ ដោយ​​​សារគាត់ជាជនជាតិរ៉ូម នោះគ្មានអ្នកណាម្នាក់មានសិទ្ធិនឹងធ្វើទារុណកម្មដល់គាត់ឡើយ ដូច្នេះហើយគាត់ត្រូវបានគេសម្លាប់ដោយកាត់ក្បាលវិញ។

​អំណានព្រះគម្ពីរពេលល្ងាច៖ កិច្ចការ ជំពូក​ ២៧:២១-៤៤