ថ្ងៃសុក្រ ទី២២ ខែកក្កដា ឆ្នាំ២០២២
អំណានព្រះគម្ពីរពេលព្រឹក៖ ដូច្នេះ ដែលយើងរាល់គ្នាបានរាប់ជាសុចរិត ដោយការជឿ នោះឈ្មោះថាយើងបានមេត្រីនឹងព្រះ ដោយសារព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នាហើយ ក៏ដោយសារទ្រង់ យើងមានផ្លូវចូលក្នុងព្រះគុណនេះ ជាទីដែលយើងកំពុងឈរនៅដោយសេចក្តីជំនឿ ហើយយើងអួតពីសេចក្តីសង្ឃឹមដល់សិរីល្អនៃព្រះផង មិនតែប៉ុណ្ណោះសោត យើងនៅតែអួតក្នុងកាលដែលមានទុក្ខលំបាកដែរ ដោយដឹងថា សេចក្តីទុក្ខលំបាកបង្កើតឲ្យមានសេចក្តីទ្រាំទ្រ សេចក្តីទ្រាំទ្របង្កើតឲ្យមានសេចក្តីស៊ាំថ្នឹក សេចក្តីស៊ាំថ្នឹកបង្កើតឲ្យមានសេចក្តីសង្ឃឹម ឯសេចក្តីសង្ឃឹមក៏មិនដែលនាំឲ្យយើងមានសេចក្តីខ្មាសឡើយ ពីព្រោះសេចក្តីស្រឡាញ់របស់ព្រះ បានផ្សាយមកសព្វក្នុងចិត្តយើងរាល់គ្នា ដោយសារព្រះវិញ្ញាណបរិសុទ្ធ ដែលព្រះបានប្រទានមកយើងហើយ។ រ៉ូម ៥:១-៥
អំណានប្រចាំថ្ងៃ សេចក្តីសុខសាន្ត សេចក្តីជំនឿ និងទំនុកចិត្ត
ក្នុងមួយជីវិតរបស់លោកប៉ុលនៅលើផែនដីនេះ គាត់បានរស់នៅក្នុងសភាពដូចជានៅស្ថានសួគ៌ដែរ។ អស់អ្នកដែលបានស្គាល់គាត់ បានដឹងពីឥទ្ធិពលរបស់គាត់ និងពីទំនាក់ទំនងរបស់គាត់ជាមួយនឹងព្រះគ្រីស្ទ និងជាមួយនឹងពួកទេវតា។ នេះហើយគឺជាអំណាចនៃសេចក្តីពិត។
ឥទ្ធិពលនៃជីវិតដ៏បរិសុទ្ធដែលផុសចេញពីក្នុងចិត្តដោយមិនដឹងខ្លួននេះហើយ គឺជាសេចក្តីអធិប្បាយដ៏មានប្រសិទ្ធិភាពបំផុត ដែលជាទីពេញចិត្តដល់គ្រីស្ទសាសនា។ ការជជែកវែកញែក ដែលជួនកាលមិនអាចឆ្លើយបាននោះ គ្រាន់តែអាចធ្វើឱ្យមានការទាស់ទែងគ្នាតែប៉ុណ្ណោះ តែគំរូរបស់គ្រីស្ទានដែលយកព្រះជាធំ មានអំណាចដែលមិនអាចទប់ទល់បាន។ ក្នុងខណៈដែលគាត់រងទុក្ខនោះ លោកប៉ុលមិនបានគិតពីខ្លួនឯងទេ តែគាត់បានខ្លោចផ្សាចិត្ត នឹកអាណិតដល់សាវកដទៃទៀត ដែលគាត់នឹងទៅចោលពួកគេ ហើយទុកឱ្យពួកគេនៅរងទុក្ខជាមួយនឹងសម្អប់ និងការបៀតបៀន។ គាត់បានខ្នះខ្នែងគ្រប់យ៉ាងដើម្បីពង្រឹងនិងលើកទឹកចិត្តដល់ក្រុមអ្នកគ្រីស្ទានថ្មីៗ ដែលបានទៅមើលការស្លាប់របស់គាត់នៅទីនោះ ដោយរំឭកគេពីសេចក្តីសន្យាដែលព្រះបានសន្យាដល់អស់អ្នកដែលត្រូវគេបៀតបៀនដោយសារសេចក្តីសុចរិត។ គាត់បានអះអាងប្រាប់គេគ្រប់គ្នាថាអ្វីដែលព្រះទ្រង់មានបន្ទូល ទាក់ទងនឹងអស់អ្នកដែលត្រូវគេបៀតបៀន និងអស់អ្នកដែលស្មោះត្រង់ ជាមួយនឹងទ្រង់នោះ ទ្រង់មិនដែលបំភ្លេចចោលឡើយ តែពួកគេនឹងងើបឡើងដោយពន្លឺវិញ ដ្បិតសិរីល្អរបស់ព្រះជាម្ចាស់នឹងចែងចាំងដល់គេ។ ពួកគេនឹងប្រដាប់កាយដោយសំលៀកបំពាក់ យ៉ាងស្រស់ស្អាត នៅពេលដែលសិរីល្អរបស់ព្រះត្រូវបានបើកសម្តែង។ នៅក្នុងរយៈពេលដ៏ខ្លីនេះ ពួកគេនឹងត្រូវល្បួង ហើយនិងត្រូវរងទុក្ខ ប៉ុន្តែគេត្រូវតែលើកទឹកចិត្តខ្លួនឯងដោយការពោលថា យើងដឹងហើយ យើងបានស្គាល់ដល់អ្នកដែលយើងជឿ។ ទ្រង់មានអំណាចនឹងថែរក្សាយើង ហើយទ្រង់នឹងរក្សានូវព្រះបន្ទូលដែលទ្រង់បានសន្យាជាមួយយើងជានិច្ច ដ្បិតការរងទុក្ខនេះនឹងត្រូវដល់ទីបញ្ចប់ ហើយសេចក្តីអំណរនៃសេចក្តីសុខសាន្តនឹងមកគ្រងជំនួសវិញ។
អំណានព្រះគម្ពីរពេលល្ងាច៖ រ៉ូម ជំពូក ១:១-៧
ខចងចាំ៖ តែយើងដឹងថា គ្រប់ការទាំងអស់ផ្សំគ្នា សំរាប់សេចក្តីល្អដល់ពួកអ្នកដែលស្រឡាញ់ព្រះ គឺដល់ពួកអ្នកដែលទ្រង់ហៅមក តាមព្រះដំរិះទ្រង់។ រ៉ូម ៨:២៨
