ថ្ងៃចន្ទ ទី២៥ ខែកក្កដា ឆ្នាំ២០២២
អំណានព្រះគម្ពីរពេលព្រឹក៖ កុំឲ្យឯងខ្លាចសេចក្តីដែលឯងត្រូវរងទុក្ខនោះឡើយ មើល អារក្សវារៀបនឹងបោះពួកឯងខ្លះទៅក្នុងគុកហើយ ដើម្បីនឹងល្បងលមើលឯង នោះឯងរាល់គ្នានឹងត្រូវរងវេទនាអស់ថ្ងៃ ដូច្នេះ ចូរនៅជាស្មោះត្រង់ដរាបដល់ស្លាប់ចុះ នោះអញនឹងឲ្យមកុដនៃជីវិតដល់ឯង។ វិវរណៈ ២:១០
អំណានប្រចាំថ្ងៃ បេសកកម្មទាំងជាប់ចំណង
ការខំប្រឹងប្រែងបំផ្លាញពួកជំនុំនៃព្រះគ្រីស្ទរបស់សាតាំង ដោយប្រើអំពើហិង្សាមិនបានប្រយោជន៍ឡើយ។ មហាវិវាទដែលពួកសាវករបស់ព្រះយេស៊ូវបានលះបង់ជីវិតរបស់គេ មិនបានបញ្ឈប់ឡើយ នៅពេលដែលអ្នកប្រកាន់ជំនឿស្មោះត្រង់ទាំងនេះសុខចិត្តស្លាប់ដើម្បីរក្សាសេចក្តីជំនឿរបស់ពួកគេ។ ដោយសារការស្លាប់នេះ ពួកគេបានទទួលជ័យជំនះ។ ពួកអ្នកធ្វើការបំរើព្រះត្រូវបានគេសម្លាប់ ប៉ុន្តែ ការងាររបស់ទ្រង់បានដំណើរការទៅមុខយ៉ាងលឿន ដំណឹងល្អបានបន្តរីករាលដាលយ៉ាងទូលំទូលាយ ហើយចំនួនអ្នកជឿក៏បានកើនឡើង។ វាបានច្រៀតចូលទៅក្នុងតំបន់ទាំងឡាយ ដែលគេចូលទៅមិនដល់រហូតដល់អ្នកដឹកនាំសំខាន់នៃទីក្រុងរ៉ូម។ គ្រីស្ទានម្នាក់បាននិយាយថា ការប្រឆាំងជាមួយនឹងពួកអ្នកគ្រប់គ្រងដែលមិនជឿសាសនា ជាពួកមនុស្សដែលកំពុងតែជំរុញការបៀតបៀនឱ្យលឿនទៅមុខ អ្នកអាច «សម្លាប់ពួកយើង ដាក់ទារុណកម្មពួកយើង កាត់ទោសពួកយើងមកចុះ . . . អំពើអយុត្តិធម៌របស់អ្នក គឺជាភស្តុតាងបញ្ជាក់ថា យើងគឺជាមនុស្សសុចរិត.។ ឬអ្នកជាមនុស្សសាហាវឃោរឃៅ . . . វានឹងមានប្រយោជន៍ដល់អ្នក»។ វាដូច្នោះមែនហើយ ប៉ុន្តែ វារឹតតែអញ្ជើញមនុស្សដទៃឱ្យតស៊ូកាន់តែខ្លាំងឡើង។ «យើងស្លាប់កាន់តែច្រើន ដោយស្នាដៃអ្នក យើងកាន់តែមានចំនួនច្រើនឡើង ឈាមរបស់គ្រីស្ទានគឺជាគ្រាប់ពូជ»។ មនុស្សរាប់ពាន់នាក់ ត្រូវបានគេដាក់គុក និងសម្លាប់ចោល ប៉ុន្តែមនុស្សផ្សេងជាច្រើនទៀតបានកើតឡើង មកជំនួសអ្នកស្លាប់និងអ្នកជាប់គុកទាំងនោះយ៉ាងឆាប់រហ័យ។ ហើយអស់អ្នកដែលត្រូវបានសម្លាប់ ដោយសារសេចក្តីជំនឿរបស់ពួកគេ ត្រូវបានព្រះគ្រីស្ទការពារ និងត្រូវបានទ្រង់រាប់ថាជាអ្នកមានជ័យជំនះ។ ពួកគេបានតយុទ្ធយ៉ាងស្វិតស្វាញ ហើយគេនឹងបានទទួលមកុដនៃសិរីល្អ នៅពេល ព្រះគ្រីស្ទនឹងយាងមកជាលើកទីពីរ។ ការឈឺចាប់ទាំងប៉ុន្មាន ដែលពួកគេបានធន់ទ្រាំ បាននាំឱ្យពួកគ្រីស្ទានកាន់តែខិតជិតគ្នា និងកាន់តែទៅកៀកនឹងព្រះដ៏ប្រោសលោះរបស់ពួកគេខ្លាំងឡើងៗ។ គំរូនៃការរស់នៅ ហើយនិងទីបន្ទាល់ពីការស្លាប់របស់ពួកគេ គឺជាសក្ខីភាពដ៏រឹងមាំមិនចេះប្រែប្រួល អំពីសេចក្តីពិត ហើយគេសង្ឃឹមថា យ៉ាងហោចណាស់ ក៏នឹងបានជាប្រធានបទមួយដែលធ្វើឱ្យសាតាំងបោះបង់ចោលការរបស់វា ហើយមកចុះចូលនៅក្រោមទង់ជ័យនៃព្រះគ្រីស្ទដែរ។
ការសម្របសម្រួលជាមួយអ្នកមិនជឿដូច្នេះហើយបានជាសាតាំងបានរៀបចំផែនការរបស់វា ដើម្បីធ្វើសង្គ្រាមឱ្យបានជោគជ័យបន្ថែមទៀត ទាស់នឹងការគ្រប់គ្រងរបស់ព្រះ ដោយយកពួកជំនុំគ្រីស្ទានធ្វើជាច្រកចូល។ ប្រសិន បើវាអាចបោកប្រាស់អ្នកជឿព្រះគ្រីស្ទ ហើយនាំគេមិនឱ្យពេញចិត្តជាមួយនឹងព្រះបាន នោះកម្លាំង ការអត់ធ្មត់ ហើយនិងភាពរឹងមាំរបស់គេ នឹងត្រូវបរាជ័យ រួចពួកគេនឹងត្រូវធ្លាក់ជារំពា (ចំណី)របស់វាយ៉ាងងាយស្រួល។
អំណានព្រះគម្ពីរពេលល្ងាច៖ ទំនុកតម្កើង ជំពូក ១១៩:១-១៦
ខចងចាំ៖ ពីនេះទៅមុខ នឹងមានមកុដនៃសេចក្តីសុចរិត បំរុងទុកឲ្យខ្ញុំ ដែលព្រះអម្ចាស់ដ៏ជាចៅក្រមសុចរិត ទ្រង់នឹងប្រទានមកខ្ញុំនៅថ្ងៃនោះ មិនមែនដល់ខ្ញុំតែម្នាក់ប៉ុណ្ណោះ គឺដល់អស់អ្នកណាដែលចូលចិត្តនឹងដំណើរទ្រង់យាងមកវិញនោះដែរ។ ធីម៉ូថេទី២ ៤:៨
