​អំណានព្រះគម្ពីរពេលព្រឹក៖ តែ​ទ្រង់​មាន​ព្រះបន្ទូល​តប​ថា ស៊ូ​ថា​ដូច្នេះ​វិញ មាន​ពរ​ហើយ អស់​អ្នក​ដែល​ស្តាប់​ព្រះបន្ទូល ហើយ​កាន់​តាម។ លូកា ១១:២៨

អំណានប្រចាំថ្ងៃ គ្រីស្ទានពីរប្រភេទ

មានមនុស្សពីរក្រុមក្នុងចំណោមអ្នកដែលបានប្រកាសថាជាអ្នកដើរតាមព្រះគ្រីស្ទ។ នៅពេលដែលក្រុមមួយសិក្សាពីព្រះជន្មរបស់ព្រះអង្គសង្គ្រោះ ហើយខំប្រឹងប្រែងកែតម្រង់នូវការខ្វះចន្លោះក្នុងសេចក្តីជំនឿ ដើម្បីប្រតិបត្តិទៅតាមខ្នាតគំរូរបស់គេ រីឯក្រុមមួយទៀតបានទាសចេញពីសេចក្តីពិត ហើយបើកបង្ហាញកំហុសរបស់គេនៅកណ្តាលវាល។ ទោះបីជាស្ថិតនៅក្នុងសភាវៈដ៏ល្អបំផុតយ៉ាងណាក៏ដោយ ក៏ពួកជំនុំមិនបានស្មោះត្រង់ បរិសុទ្ធ និងម៉ឺងម៉ាត់ ទាំងស្រុងនោះដែរ។ ព្រះអង្គសង្គ្រោះរបស់យើងបានបង្រៀនថា អស់អ្នកណាដែលនឹងបណ្តែតបណ្តោយខ្លួនឱ្យចូលទៅក្នុងអំពើបាប យ៉ាងពេញទំហឹង មិនត្រូវបានអនុញ្ញាតឱ្យចូលក្នុងពួកជំនុំឡើយ ដ្បិតទ្រង់បានផ្សាភ្ជាប់អង្គទ្រង់ ជាមួយនឹងមនុស្សលោក ដែលមានអត្តចរិត​ពោរពេញ​ទៅដោយកំហុស ហើយបានប្រទានដល់ពួកគេនូវអត្ថប្រយោជន៍នៃការបង្រៀន និងគំរូរបស់ទ្រង់ដែលពួកគេអាចនឹងមានឱកាសពិនិត្យមើលនិងកែតម្រូវកំហុសរបស់ពួកគេ។

ប៉ុន្តែ ពុំមានការរួបរួមគ្នា​រវាងព្រះអម្ចាស់នៃពន្លឺហើយនិងព្រះអម្ចាស់នៃក្តីងងឹតឡើយ ហើយ​ ក៏ពុំអាចនឹងមានការរួបរួមគ្នារវាងអ្នកដើរតាមរបស់មេដឹកនាំទាំងពីរនេះផងដែរ។ នៅពេលដែលពួកគ្រីស្ទានបានយល់ព្រមរួបរួមគ្នា ជាមួយនឹងអស់អ្នកដែលផ្លាស់ប្តូរសេចក្តីជំនឿតែពាក់កណ្តាលពី​មនុស្សដែលមិនជឿសាសនាមក ពួកគេបានចាប់ផ្តើមចូលទៅក្នុងផ្លូវដែលនាំគេឱ្យឃ្លាតពីសេចក្តីពិត កាន់តែឆ្ងាយទៅៗ។ សាតាំង​រីករាយក្រៃលែងដែលវាបានទទួលជ័យជំនះ ក្នុងការបោកប្រាស់ពួកអ្នកដើរតាមព្រះគ្រីស្ទជាច្រើនឱ្យបែរទៅដើរតាមវា។ បន្ទាប់មក វាបាននាំយកអំណាចរបស់វា ដើម្បីធ្វើឱ្យកាន់តែប៉ះពាល់យ៉ាងខ្លាំងដល់ពួកគេ ហើយបានជម្រុញពួកគេឱ្យបៀតបៀនដល់អ្នកដែលនៅតែទុកចិត្តលើព្រះដ៏ពិត។ គ្មាននរណា​អាចយល់ច្បាស់នូវការប្រឆាំងជំទាស់នឹងសេចក្តីជំនឿដ៏ពិតរបស់ពួកគ្រីស្ទាន ដូចជាអ្នកដែលធ្លាប់ជាអ្នកការពារសេចក្តីជំនឿនោះឡើយ ហើយពួកគ្រីស្ទានដែលបោះបង់ចោលសេចក្តីជំនឿពិតទាំងនេះ បានចូលរួមជា​មួយនឹងពួកគូកនដែលជាអ្នកជឿព្រះតែពាក់កណ្តាល ហើយដឹកនាំការវាយ​ប្រហារ​របស់ពួកគេ ប្រឆាំងទៅនឹងគោលលទ្ធិដ៏បរិសុទ្ធរបស់ព្រះគ្រីស្ទវិញ។

វាតម្រូវឱ្យមានការប្រទាញប្រទង់យ៉ាងតឹងតែង ចំពោះអ្នកដែលស្មោះត្រង់ទៅនឹងជំហរយ៉ាងរឹងមាំ ទាស់នឹងការបោកបញ្ឆោតនិងសម្អប់ ដែលបានក្លែងបន្លំចូលក្នុងសំលៀកបំពាក់នៃពួកសង្ឃ ព្រមទាំងបាន​ដាក់​បញ្ចូលការនោះ ចូលទៅក្នុងព្រះវិហារផង។ គេមិនបានទទួលយកព្រះគម្ពីរធ្វើជាខ្នាតគំរូនៃសេចក្តីជំនឿទេ។ គោលលទ្ធិនៃសេរីភាពខាងសាសនា ត្រូវបានផ្លាស់ប្រែជាការមិនជឿលើសាសនាទៅវិញ ហើយអ្នកដែលប្រព្រឹត្តតាមគោលលទ្ធិនោះ ត្រូវគេស្អប់ខ្ពើម ហើយ​ សម្លាប់ដោយមិនបាច់ជំនុំជម្រះ។

​អំណានព្រះគម្ពីរពេលល្ងាច៖ លូកា ជំពូក​ ៨:៤-១៥