ថ្ងៃសុក្រ ទី២៩ ខែកក្កដា ឆ្នាំ២០២២
អំណានព្រះគម្ពីរពេលព្រឹក៖ ដូច្នេះ ដែលអ្នករាល់គ្នាបានទទួលព្រះគ្រីស្ទយេស៊ូវ ជាព្រះអម្ចាស់ បែបយ៉ាងណា នោះចូរដើរក្នុងទ្រង់តាមបែបយ៉ាងនោះចុះ ដោយបានចាក់ឫស ហើយស្អាងឡើងក្នុងទ្រង់ ទាំងតាំងនៅខ្ជាប់ខ្ជួនក្នុងសេចក្តីជំនឿ ដូចជាបានបង្រៀនដល់អ្នករាល់គ្នាហើយ ព្រមទាំងអរព្រះគុណកាន់តែច្រើនឡើងផង។ ចូរប្រយ័ត្ន ក្រែងមានអ្នកណាចាប់អ្នករាល់គ្នាធ្វើជារំពា ដោយពាក្យបរមត្ថ និងពាក្យបញ្ឆោតជាអសារឥតការ តាមសណ្តាប់បុរាណរបស់មនុស្ស តាមបថមសិក្សានៅនាលោកីយ៍ គឺមិនមែនតាមព្រះគ្រីស្ទទេ។ កូល៉ុស ២:៦-៨
អំណានប្រចាំថ្ងៃ
នៅក្នុងសំបុត្រទីពីររបស់គាត់ទៅកាន់ពួកជំនុំថែស្សាឡូនីច សាវកប៉ុលបានរៀបរាប់ប្រាប់ឱ្យដឹងជាមុនអំពីការបោះបង់ជំនឿដ៏ធំដែលនឹងបង្កឱ្យបង្កើតអំណាចរបស់សម្តេចប៉ាបឡើង។ គាត់បានប្រកាសថា ថៃ្ងរបស់ព្រះគ្រីស្ទ នឹងមិនត្រូវមកនោះទេ «ទាល់តែសេចក្តីក្បត់សាសនាមកជាមុន ហើយមនុស្សដែលជាតួបាបនោះបានលេចមក គឺជាមនុស្សដែលត្រូវហិនវិនាស ដែលទាស់ទទឹង ហើយលើកឡើងខ្ពស់លើសជាងរបស់អ្វីដែលហៅថាព្រះ ឬរបស់អ្វីដែលគេគោរពប្រតិបត្តិផង ដល់ម៉្លេះបានជាវានឹងអង្គុយនៅដូចជាព្រះ នៅក្នុងព្រះវិហារនៃព្រះ ទាំងសំដែងខ្លូនថាជាព្រះផង»។ ហើយលើសពីនេះទៅទៀត លោកប៉ុលព្រមានបងប្អូនរបស់គាត់ថា «ដ្បិតសេចក្តីអាថ៌កំបាំងរបស់ការទទឹងច្បាប់កំពុងតែបណ្តាលឡើងហើយ» (ថែស្សាឡូនីចទី២ ២២:៣, ៤, ៧)។
គាត់បានឃើញកំហុសឆ្គងបានលូនចូលសន្សឹមៗទៅក្នុងព្រះវិហារ ដែលនឹងរៀបចំផ្លូវសម្រាប់ការលូតលាស់នៃអំណាចរបស់សម្តេចប៉ាបតាំងពីដំបូងមកម៉្លេះ។
សេចក្តីអាថ៌កំបាំងរបស់ការទទឹងច្បាប់ ដំបូងឡើយបានលួចនាំនូវការបោកបញ្ឆោតនិងការប្រមាថរបស់វា ចូលមកដោយស្ងៀមស្ងាត់បន្តិចម្តងៗ ក្រោយមកដោយបើកចំហយ៉ាងទូលំទូលាយ នៅពេលដែលវាមានកម្លាំងគ្រប់គ្រាន់ ហើយបានមានអំណាចគ្រប់គ្រងលើគំនិតមនុស្ស។ ប្រពៃណីរបស់អ្នកមិនជឿសាសនាបានរកឃើញផ្លូវចូលទៅក្នុងព្រះវិហារគ្រីស្ទាន សឹងតែមិនដឹងខ្លួន។ វិញ្ញាណ នៃការសម្របសម្រួលនិងភាពដូចគ្នាត្រូវបានបញ្ឈប់ នៅពេលណាមួយ ដោយភ្លើងនៃការបៀតបៀន ដែលពួកជំនុំបានស៊ូរងទ្រាំនៅក្រោមអ្នកមិនជឿសាសនា។ ប៉ុន្តែ ខណៈដែលការបៀតបៀនបានឈប់ ហើយគ្រីស្ទ សាសនាបានចូល ទៅក្នុងតុលាការនិងក្នុងព្រះរាជវាំងរបស់ស្តេច គេបានទុកភាពសាមញ្ញនៃការបន្ទាបព្រះកាយរបស់ព្រះគ្រីស្ទនិងពួកសាវករបស់ទ្រង់ចោលមួយឡែក ដោយសារតែភាពរុងរឿងនិងអំនួតរបស់សង្ឃនឹងពួកអ្នកគ្រប់គ្រង ដែលមិនជឿសាសនាគ្រីស្ទ ហើយគេបានយកទ្រឹស្តីនិងប្រពៃណីរបស់មនុស្សមកជំនួសសេចក្តីត្រូវការរបស់ព្រះវិញ។ ការផ្លាស់ប្រែជំនឿសាសនាតែឈ្មោះរបស់ព្រះចៅកុងស្តង់ទីន នៅដើមសតវត្សរ៍ទី៤ បានធ្វើឱ្យមានភាពរីករាយដ៏អស្ចារ្យ ហើយពិភពលោកបានដើរចូលទៅក្នុងពួកជំនុំ នៅក្នុងសំលៀកបំពាក់នៃសេចក្តីសុចរិត។ ឥឡូវនេះភាពពុករលួយបានកើនឡើងយ៉ាងឆាប់រហ័ស។ នៅពេលដែលមើលទៅហាក់ដូចជាឃើញថាជំនឿពុករលួយនេះបានបរាជ័យទៅហើយ នោះវាកំពុងតែមានជោគជ័យទៅវិញ។ វិញ្ញាណរបស់ពួកគេ (អ្នកមិនជឿ) បានគ្រប់គ្រងលើពួកជំនុំ។ គោលលទ្ធិពិធីផ្សេងៗខាងសាសនា ហើយនិងជំនឿឆ្វេងនិយមរបស់គេ ត្រូវបានបញ្ចូលទៅក្នុងសេចក្តីជំនឿនិងការថ្វាយបង្គំរបស់ពួកអ្នកដែលបានប្រកាសថាដើរតាមព្រះគ្រីស្ទ។
អំណានព្រះគម្ពីរពេលល្ងាច៖ ទំនុកតម្កើង ជំពូក ១១៩:៣៣-៤៨
ខចងចាំ៖ ពីនេះទៅមុខ នឹងមានមកុដនៃសេចក្តីសុចរិត បំរុងទុកឲ្យខ្ញុំ ដែលព្រះអម្ចាស់ដ៏ជាចៅក្រមសុចរិត ទ្រង់នឹងប្រទានមកខ្ញុំនៅថ្ងៃនោះ មិនមែនដល់ខ្ញុំតែម្នាក់ប៉ុណ្ណោះ គឺដល់អស់អ្នកណាដែលចូលចិត្តនឹងដំណើរទ្រង់យាងមកវិញនោះដែរ។ ធីម៉ូថេទី២ ៤:៨
