ថ្ងៃសៅរ៍ ទី៣០ ខែកក្កដា ឆ្នាំ២០២២
អំណានព្រះគម្ពីរពេលព្រឹក៖ ដូច្នេះ ត្រូវឲ្យយើងរាល់គ្នាសង្វាតនឹងចូល ទៅក្នុងសេចក្តីសំរាកនោះ ក្រែងលោអ្នកណាដួលទៅ តាមក្បួនមិនជឿ ដូចជាគេដែរ ១២ ពីព្រោះ ឯព្រះបន្ទូលនៃព្រះរស់នៅ ហើយពូកែផង ក៏មុតជាងដាវណាមានមុខ២ ទាំងធ្លុះចូលទៅ ទាល់តែកាត់ព្រលឹង និងវិញ្ញាណ ហើយសន្លាក់ និងខួរឆ្អឹងដាច់ពីគ្នា ទាំងពិចារណាអស់ទាំងគំនិត ដែលចិត្តគិត ហើយដែលសំរេចដែរ។ ហេព្រើរ ៤:១១-១២
អំណានប្រចាំថ្ងៃ មនុស្សនៃអំពើបាប
ការសម្របសម្រួលរវាងអ្នកមិនជឿសាសនា និងគ្រីស្ទសាសនានេះ បានធ្វើឱ្យមនុស្សដែលមានបាប ដូចជាមានចែងទុកមកជាមុននៅក្នុងបទទំនាយថាជាអ្នកលើកតម្កើងខ្លូនឱ្យខ្ពស់ជាងព្រះកាន់តែរីកចម្រើនឡើង។ ប្រព័ន្ធសាសនាក្លែងក្លាយដ៏ធំសម្បើមនោះ គឺជាស្នាដៃឯកនៃអំណាចរបស់សាតាំង ជានិមិត្តរូបនៃការខំប្រឹងប្រែងរបស់វា ដើម្បីអង្គុយនៅលើបល្ល័ង្កគ្រប់គ្រងផែនដីតាមតែចិត្តរបស់វា។
ដើម្បីការពារជ័យជំនះនិងកិត្តិយសរបស់លោកិយ គេបានដឹកនាំពួកជំនុំឱ្យស្វែងរកការគាប់ចិត្តនិងការគាំទ្រពីសំណាក់ពួកអ្នកមានអំណាចលើផែនដី ហើយការប្រព្រឹត្តិដូច្នេះគឺជាការបដិសេធន៍ព្រះគ្រីស្ទ គេបានទាក់ទាញពួកជំនុំឱ្យស្មោះស្ម័គ្រចំពោះតំណាងរបស់សាតាំង ដែលជាមេដឹកនាំ (បូជាចារ្យ) របស់ពួកជំនុំរ៉ូម។
គោលលទ្ធិដ៏ធំមួយរបស់សាសនារ៉ូម គឺថាសម្តេចប៉ាបជាមេដឹកនាំពួកជំនុំជាសាកលមួយរូបរបស់ព្រះគ្រីស្ទ ដែលគេអាចមើលឃើញ ហើយដែលមានអំណាចដ៏ខ្ពស់បំផុតលើបូជាចារ្យ និងគ្រូគង្វាលទាំងឡាយ នៅគ្រប់ផ្នែកនៃពិភពេលាក។ លើសពីនេះទៅទៀត សម្តេចប៉ាបត្រូវបានគេតែងតាំងឱ្យមានងារជាព្រះ។
សាតាំងបានដឹងយ៉ាងច្បាស់ថា ព្រះគម្ពីរដ៏បរិសុទ្ធអាចនឹងធ្វើឱ្យមនុស្សមើលឃើញនូវការបោកប្រាស់របស់វា ហើយអាចនឹងតយុទ្ធជាមួយនឹងអំណាចរបស់វាបាន។ គឺដោយសារព្រះបន្ទូលនោះហើយ ដែលសូម្បីតែព្រះអង្គសង្គ្រោះនៃពិភពលោកនេះក៏វាបានយកព្រះបន្ទូលមកប្រើដើម្បីតយុទ្ធជាមួយនឹងទ្រង់ដែរ។ នៅគ្រប់ទាំងការល្បួងរបស់វាមកលើទ្រង់ ព្រះគ្រីស្ទបានប្រើខែលនៃសេចក្តីពិតដ៏អស់កល្ប ដោយមានបន្ទូលថា «ដ្បិតមានសេចក្តីចែងទុកមកថា»។ សត្រូវរបស់ទ្រង់បានជំទាស់ទៅនឹងអំណាចនៃព្រះបន្ទូលរបស់ព្រះ។ ដើម្បីឱ្យសាតាំងអាចរក្សាឥទ្ធិពលរបស់វាមកលើ មនុស្សលោក និងធ្វើឱ្យអំណាចរបស់សម្តេចប៉ាបកាន់តែខ្ពស់ វាត្រូវតែធ្វើឱ្យមនុស្សមិនយល់ដឹងពីព្រះគម្ពីរ។ ព្រះគម្ពីរនឹងលើកតម្កើងព្រះ ហើយតាំងមនុស្សនៅក្នុងតំណែងពិតរបស់ពួកគេ ដូច្នេះហើយបានជាសាតាំងត្រូវតែលុបបំបាត់ចោល និងបិទបាំងនូវសេចក្តីពិតដ៏ពិសេសនេះ។ ពួកជំនុំរ៉ូមបានយកគំនិតប្រាកដនិយមនេះមកប្រើ។ គេបានហាមប្រាមការចែកចាយព្រះគម្ពីរអស់រយៈពេលរាប់រយឆ្នាំ។ គេបានរារាំងមនុស្សមិនឱ្យអានព្រះគម្ពីរឡើយ សូម្បីតែមានព្រះគម្ពីរនៅក្នុងផ្ទះក៏មិនបានដែរ ហើយពួកសម្តេចសង្ឃ និងពួកបូជាចារ្យដែលគ្មានសីលធម៌ជាអ្នកបកស្រាយព្រះគម្ពីរ នៅក្នុងការបង្រៀនរបស់ពួកគេ។ ដោយធ្វើដូច្នេះមនុស្សស្ទើរតែពាសពេញសាកលលោកទទួលស្គាល់សម្តេចប៉ាបជាព្រះ ដែលមានអំណាចកំពូល មកលើសាសនា ហើយនិងរដ្ឋ (នយោបាយ)។
អំណានព្រះគម្ពីរពេលល្ងាច៖ ថែស្សាឡូនីចទី១ ជំពូក ២:១-១២
ខចងចាំ៖ ពីនេះទៅមុខ នឹងមានមកុដនៃសេចក្តីសុចរិត បំរុងទុកឲ្យខ្ញុំ ដែលព្រះអម្ចាស់ដ៏ជាចៅក្រមសុចរិត ទ្រង់នឹងប្រទានមកខ្ញុំនៅថ្ងៃនោះ មិនមែនដល់ខ្ញុំតែម្នាក់ប៉ុណ្ណោះ គឺដល់អស់អ្នកណាដែលចូលចិត្តនឹងដំណើរទ្រង់យាងមកវិញនោះដែរ។ ធីម៉ូថេទី២ ៤:៨
