​អំណានព្រះគម្ពីរពេលព្រឹក៖ យើង​ក៏​មាន​សេចក្តី​ក្លាហាន ដល់​ទ្រង់​យ៉ាង​ដូច្នេះ​ដែរ គឺ​ថា បើ​យើង​នឹង​សូម​អ្វី ដែល​ត្រូវ​តាម​ព្រះហឫទ័យ​ទ្រង់ នោះ​ទ្រង់​នឹង​ទទួល​ព្រម។ យ៉ូហានទី១ ៥:១៤

អំណានប្រចាំថ្ងៃ ការឆ្លើយតបទៅនឹងសេចក្តីអធិស្ឋាន

លោកពេត្រុសក៏បានធ្វើដំណើរឆ្ពោះទៅកាន់ផ្ទះមួយ ដែលពួកជំនុំបានប្រជុំគ្នាអធិស្ឋាន ហើយគាត់បានដឹងថា ពួកគេកំពុងតែអធិស្ឋានឱ្យគាត់ដោយអស់ពីចិត្តរបស់គេគ្រប់គ្នា។ គាត់ក៏គោះទ្វារមុខ នោះមាន​ស្រីបំរើ​ម្នាក់ឈ្មោះ រ៉ូដា មកផ្ទៀងស្តាប់។ លុះស្គាល់សំឡេងពេត្រុសហើយ នោះនាងមានសេចក្តីអំណរដ៏ពន្លឹក ដល់ម៉្លេះបានជាភ្លេចទាំងបើកទ្វារ រត់ចូលទៅប្រាប់គេវិញថា លោកពេត្រុសឈរនៅមាត់ទ្វារ។ តែគេស្តីថា ឯងវង្វេងហើយ តែនាងនៅតែថា ប្រាកដមែនៗ រួចគេថា ជាទេវតា​របស់​គាត់ទេ។ ឯពេត្រុស គាត់ចេះតែគោះទ្វារថែម កាលគេបានបើកទ្វារ ឃើញ​នោះ គេមានសេចក្តីស្រឡាំងកាំង តែគាត់ធ្វើគ្រឿងសំគាល់នឹងដៃ ឱ្យគេ​ស្ងៀមទៅ រួចក៏រ៉ាយរឿងប្រាប់គេពីដំណើរដែលព្រះអម្ចាស់បាននាំគាត់ចេញពីគុកជាយ៉ាងណា ហើយគាត់ផ្តាំគេថា សូមប្រាប់រឿងនេះដល់យ៉ាកុប និងពួកបងប្អូនឱ្យដឹងផង នោះគាត់ចេញទៅឯកន្លែង១ទៀតទៅ»។ ពួក​បង​ប្អូនដែលកំពុងតែអធិស្ឋាន ដោយតមអត់ បានពេញដោយ​សេចក្តីអំណរ ហើយនិងការសរសើរតម្កើងដល់ព្រះ ដែលទ្រង់បានឮការអធិស្ឋានរបស់គេ ព្រមទាំងឆ្លើយតបដោយជួយរំដោះពេត្រុសឱ្យរួចពីកណ្តាប់ដៃរបស់ស្តេចហេរ៉ូឌ។ នៅព្រឹកនោះ មានហ្វូងមនុស្សជាច្រើនបានមកជុំគ្នាដើម្បីធ្វើ​បន្ទាល់ពីការស្លាប់របស់ពេត្រុស។ ពេលនោះ ស្តេចហេរ៉ូឌបានចាត់ក្បួនទាហានឱ្យទៅយកពេត្រុសមក ដើម្បីកុំឱ្យគាត់រត់គេចខ្លួនបាន និងដើម្បីគំរាមដល់បក្សពួករបស់គាត់ ព្រមទាំងជាការបង្ហាញនូវអំណាចរបស់ទ្រង់ដល់ហ្វូងមនុស្សផង។ មានទាហាននៅយាមទ្វារគុក ដូច​ដែលបាន​កំណត់​ឱ្យ ហើយទ្វារទាំងប៉ុន្មានក៏នៅរឹងមាំដូចដើមដដែល។ ទាហានពីរនាក់ ដែលគេដាក់ច្រវាក់ជាប់ជាមួយនឹងពេត្រុសនៅក្នុងគុកក៏នៅតែជាប់ច្រវាក់ដដែល តែអ្នកទោសបានបាត់ទៅហើយ។

នៅពេលដែលគេទូលរឿងទាំងនេះដល់ទ្រង់ នោះស្តេចហេរូឌ៉មានសេចក្តីក្រោធជាខ្លាំង ហើយបានដាក់ទោសដល់អ្នកយាមគុកដោយគ្មានត្រាប្រណី។ ទ្រង់បានប្រហារជីវិតពួកគេ ដោយសារតែទោសឧក្រិដ្ឋដែលគេបានដេកលក់ ក្នុងការបំពេញតួនាទីរបស់ខ្លួន។ នៅពេលជាមួយគ្នានោះដែរ ស្តេចហេរ៉ូឌជ្រាបថា គ្មានអំណាចរបស់មនុស្សណាម្នាក់ បានចូលទៅរំដោះ​ពេត្រុស​ពីគុក ក្រៅពីព្រះនោះទេ ប៉ុន្តែទ្រង់បានប្តេជ្ញាមិនព្រមទទួលជឿថា ព្រះកំពុងតែធ្វើឱ្យការរបស់ទ្រង់ត្រូវទទួលបរាជ័យនោះឡើយ។ ទ្រង់មិនចង់ឱ្យទ្រង់ត្រូវអាម៉ាស់ឡើយ ដូច្នេះហើយទ្រង់ក៏បានលើកខ្លួនឯងឡើង ប្រឆាំង​នឹងព្រះវិញ។

​អំណានព្រះគម្ពីរពេលល្ងាច៖ កិច្ចការ ជំពូក​ ១២:១១-១៧