​អំណានព្រះគម្ពីរពេលព្រឹក៖ សូម​ឲ្យ​គេ​ត្រូវ​ខ្មាស ហើយ​ភ័យ​ស្លុត​ជា​ដរាបអើ សូម​ឲ្យ​គេ​ត្រូវ​ស្រឡាំងកាំង ហើយ​វិនាស​ទៅដើម្បី​ឲ្យ​គេ​បាន​ដឹង​ថា គឺ​ទ្រង់​តែ​១​អង្គព្រះនាម​ជា​យេហូវ៉ាដែល​ជា​ព្រះ​ដ៏​ខ្ពស់​បំផុត​លើ​ផែនដី​ទាំង​មូល។ ទំនុកតម្កើង ៨៣:១៧-១៨

អំណានប្រចាំថ្ងៃ ការសុគតរបស់ស្តេចហេរ៉ូឌ

មុននេះបន្តិច ទ្រង់បានទទួលការសរសើរតម្កើង ហើយនិងការថ្វាយបង្គំពីសំណាក់ហ្វូងមនុស្សទាំងនោះ ប៉ុន្តែ នៅពេលនេះទ្រង់បានដឹងខ្លួនថា ទ្រង់កំពុងតែស្ថិតនៅក្នុងព្រះហស្តរបស់ព្រះដែលមានអំណាចជាងទ្រង់។ នៅពេលនេះ ទ្រង់កំពុងតែមានវិប្បដិសារីជាខ្លាំង ទ្រង់បាននឹកឃើញពីបញ្ជាដ៏ឃោរឃៅរបស់ទ្រង់ឱ្យគេប្រហារជីវិតលោកយ៉ាកុប។ ទ្រង់​បាននឹក​ឃើញ​ការដែល ទ្រង់បៀតបៀនដល់ពួកជំនុំរបស់ព្រះ ព្រមទាំងការដែល​ទ្រង់​ប៉ង​នឹងប្រហារជីវិតសាវកពេត្រុស តែត្រូវបានព្រះជួយរំដោះឱ្យលោករួចពីកណ្តាប់ដៃរបស់ទ្រង់ផងដែរ។ ទ្រង់ក៏បាននឹកឃើញពីការដែលទ្រង់ប្រហារជីវិតទាហានយាមគុកដោយគ្មានមេត្តា ដោយព្រោះតែសេចក្តីក្រោធ ហើយ​និងការមិនពេញព្រះទ័យដែលគ្មានហេតុផលរបស់ទ្រង់ ក្នុងកាលដែល​ពេត្រុសរួចពីគុក។ ទ្រង់បានជ្រាបយ៉ាងច្បាស់ថា ព្រះដែលបានជួយរំដោះសាវកពេត្រុសឱ្យរួចពីស្លាប់នោះ កំពុងតែដាក់ទោសទ្រង់ ដែលជា​អ្នកបៀត​បៀនដល់ព្រះអង្គហើយ។ ទ្រង់បានជ្រាបពីការនេះ ហើយវាបានធ្វើឱ្យទ្រង់មានការឈឺចាប់ជាខ្លាំង។ ទ្រង់បានជ្រាបពីក្រឹត្យវិន័យរបស់ព្រះ ដែលបាន​ចែងថា «កុំឱ្យមានព្រះឯណានៅចំពោះទ្រង់ឱ្យសោះ» តែទ្រង់បែរជាទទួលការថ្វាយបង្គំពីហ្វូងមនុស្ស ដូច្នេះហើយទ្រង់បានធ្វើឱ្យពែងនៃអំពើបាបរបស់ទ្រង់ពេញទៅដោយសេចក្តីក្រោធរបស់ព្រះ។

ទេវតាដែលបានយាងចុះពីស្ថានសួគ៌ ដើម្បីមករំដោះពេត្រុសឱ្យរួចពីអំណាចនៃការបៀតបៀន ​នោះ គឺជាអ្នកនាំសារពីសេចក្តីក្រោធរបស់ព្រះ ហើយនិងការជំនុំជម្រះដល់ស្តេចហេរ៉ូឌ។ ទេវតាបានពាល់ពេត្រុសឱ្យបានភ្ញាក់ពីដំណេកដ៏លង់លក់របស់គាត់ តែទេវតាអង្គនេះ បានពាល់ដល់ស្តេច​ដែលពេញទៅដោយអំពើបាបយ៉ាងឃោរឃៅនេះទៅវិញ។ ព្រះទ្រង់បានចាក់ក្តីអាម៉ាស់ទៅលើអំនួតរបស់ស្តេចហេរ៉ូឌ ដោយសារតែទ្រង់បានតម្កើងខ្លួនចំពោះហ្វូងមនុស្ស ដើម្បីឱ្យគេសរសើរទ្រង់។ ស្តេចហេរ៉ូឌបានសុគត ក្រោមការជំនុំជម្រះរបស់ព្រះយ៉ាងវេទនានិងឈឺចាប់ជាទីបំផុតទាំងខាង​រាងកាយនិងទាំងខាងផ្លូវចិត្ត។

​សេចក្តីជំនុំជម្រះនេះ គឺជាឧទាហរណ៍មួយដែលបានសម្តែងដល់ហ្វូងមនុស្សអំពីឫទ្ធានុភាពរបស់ព្រះ ហើយឱ្យពួកគេបាន​ឃើញថា​សាវក​របស់ទ្រង់ត្រូវបានរំដោះឱ្យរួចពីការបៀតបៀនហើយនិងសេចក្តីស្លាប់ តែអ្នកដែលបៀតបៀនដល់រាស្ត្ររបស់ទ្រង់នឹងត្រូវព្រះជំនំជម្រះវិញ។ ដំណឹងនេះត្រូវបានឮដល់គ្រប់ទីកន្លែង ហើយក៏បានធ្វើឱ្យមនុស្សជាច្រើនជឿដល់​ទ្រង់ដែរ។

​អំណានព្រះគម្ពីរពេលល្ងាច៖ កូរិនថូសទី២​ ជំពូក​ ៣២:៩-២៣