ថ្ងៃចន្ទ ទី០១ ខែសីហា ឆ្នាំ២០២២
អំណានព្រះគម្ពីរពេលព្រឹក៖ ចូរឲ្យនឹកចាំពីថ្ងៃឈប់សំរាក ដើម្បីញែកថ្ងៃនោះចេញជាបរិសុទ្ធ ក្នុងរវាង៦ថ្ងៃ នោះត្រូវឲ្យឯងធ្វើអស់ទាំងការរបស់ឯងចុះ តែឯថ្ងៃទី៧ នោះគឺជាថ្ងៃឈប់សំរាកថ្វាយព្រះយេហូវ៉ាជាព្រះនៃឯងវិញ នៅថ្ងៃនោះមិនត្រូវធ្វើអ្វីឲ្យសោះ ទោះខ្លួនឯងឬកូនប្រុសកូនស្រីឯងក្តី ទោះបាវប្រុស ឬបាវស្រីឯងក្តី ទោះសត្វរបស់ឯង ឬអ្នកដទៃដែលនៅផ្ទះឯងក្តី ដ្បិតក្នុង៦ថ្ងៃព្រះយេហូវ៉ាទ្រង់បានធ្វើផ្ទៃមេឃ ផែនដី ហើយនឹងសមុទ្រ ព្រមទាំងរបស់សព្វសារពើនៅស្ថានទាំងនោះដែរ រួចដល់ថ្ងៃទី៧ ទ្រង់ឈប់សំរាក ហេតុនោះបានជាព្រះយេហូវ៉ាទ្រង់បានប្រទានពរដល់ថ្ងៃឈប់សំរាក ហើយក៏ញែកចេញជាបរិសុទ្ធ។។ និក្ខមនំ២០:៨-១១
អំណានប្រចាំថ្ងៃ ភាពបរិសុទ្ធនៃថ្ងៃសប្បាតហ៍ត្រូវបានជំនួសដោយថ្ងៃអាទិត្យ
ខណៈដែលនៅជាអ្នកមិនជឿព្រះនៅឡើយ ព្រះចៅកុងស្តង់ទីនបានចេញច្បាប់មួយ បញ្ជាឱ្យមនុស្សនៅក្នុងទីក្រុងរ៉ូមទាំងមូលគោរពប្រតិបត្តិថ្ងៃអាទិត្យ ជាថ្ងៃបុណ្យជាតិ។ បន្ទាប់ពីការបំផ្លាស់ បំប្រែជំនឿរបស់ទ្រង់មក ព្រះអង្គនៅតែមិនបោះបង់ចោលការគាំទ្រថ្ងៃអាទិត្យដដែល ហើយពេលនោះទ្រង់បានត្រាស់បង្គាប់ឱ្យគេគោរពតាមជំនឿថ្មីរបស់ទ្រង់ គឺគ្រីស្ទសាសនា។ ប៉ុន្តែ កិត្តិយសដែលបង្ហាញដោយថ្ងៃនោះ មិនទាន់គ្រប់គ្រាន់ល្មម ដើម្បីបញ្ឈប់ពួកគ្រីស្ទានពីការគោរពថ្ងៃសប្បាតហ៍ដ៏ពិតជាថ្ងៃដ៏បរិសុទ្ធរបស់ព្រះជាម្ចាស់ឡើយ។ គេត្រូវតែឈានមួយជំហានទៀត ហើយគេត្រូវតែលើកតម្កើងថ្ងៃបរិសុទ្ធក្លែងក្លាយ ឱ្យបានស្មើនឹងថ្ងៃបរិសុទ្ធដ៏ពិតប្រាកដ។ ពីរបីឆ្នាំបន្ទាប់ពីព្រះរាជក្រឹត្យរបស់ព្រះចៅកុងស្តង់ទីនមក សម្តេចសង្ឃនៃពួកជំនុំរ៉ូមបានផ្តល់កិត្តិយសដល់ថ្ងៃអាទិត្យ ដោយឱ្យឈ្មោះថាជាថ្ងៃនៃព្រះអម្ចាស់។ ដូច្នេះគេបានដឹកនាំមនុស្សឱ្យគោរពថ្ងៃនោះ បន្តិចម្តងៗ តាមព្រះរាជក្រឹត្យដ៏ពិសិដ្ឋនោះ។ តែក៏នៅតែមានមនុស្សរក្សាថ្ងៃសប្បាតហ៍ដើមដដែលដែរ។មេបោកប្រាសមិនទាន់បានបំពេញការងាររបស់វាចប់សព្វគ្រប់នៅឡើយទេ។ វាបានសម្រេចចិត្តដើម្បីប្រមូលពួកគ្រីស្ទាននៅទូទាំងពិភពលោក ឱ្យមកនៅក្រោមទង់ជ័យរបស់វា និងឱ្យទទួលអំណាចរបស់វា តាមរយៈអ្នកតំណាងរបស់វា ដែលអ្នកមានអំនួតបានអះអាងថាគេជាអ្នកតំណាងរបស់ព្រះគ្រីស្ទ។ តាមរយៈជនក្រៅសាសន៍ ដែលបានបំផ្លាស់បំប្រែតែពាក់កណ្តាល ពួកសង្គ្រាជដែលមានមហិច្ឆតា ហើយនិងពួកមេដឹកនាំព្រះវិហារដែលស្រឡាញ់លោកិយ សាតាំងបានសម្រេចនូវគោលបំណងរបស់វា។ ក្រុមប្រឹក្សាដ៏ធំត្រូវបានប្រជុំគ្នាយូរៗម្តង ដោយគេបានកោះអញ្ជើញអ្នកមានតំណែងខ្ពស់ៗនៅក្នុងព្រះវិហារ ទូទាំងពិភពលោកមកចូលរួម។ សឹងតែនៅរៀងរាល់អង្គប្រជុំ ថ្ងៃសប្បាតហ៍ដែលព្រះបានបង្កើត ត្រូវបានគេបន្ទាបចុះបន្តិច ខណៈដែលថ្ងៃអាទិត្យ ត្រូវបានគេលើកតម្កើងឡើង។ ទីបំផុតថ្ងៃបុណ្យនៃពួកអ្នកមិនជឿព្រះត្រូវបានគេលើកតម្កើងឡើង ឱ្យដូចជាថ្ងៃដែលព្រះបានតែងតាំងដែរ ហើយថ្ងៃសប្បាតហ៍នៃព្រះគម្ពីរត្រូវបានគេប្រកាសថាជាថ្ងៃបុរាណរបស់ពួកសាសន៍យូដា ហើយអ្នកណាដែលគោរពថ្ងៃនោះត្រូវបានគេចាត់ទុកថាជាមនុស្សដែលគេស្អប់ខ្ពើម។
អំណានព្រះគម្ពីរពេលល្ងាច៖ ទំនុកតម្កើង ជំពូក ១១៩:៦៥-៨៨
ខចងចាំ៖ គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្តាលឲ្យតែងទេ ក៏មានប្រយោជន៍សំរាប់ការបង្រៀន ការរំឭកឲ្យដឹងខ្លួន ការប្រដៅដំរង់ និងការបង្ហាត់ខាងឯសេចក្តីសុចរិត។ ធីម៉ូថេទី២ ៣:១៦
