​អំណានព្រះគម្ពីរពេលព្រឹក៖ ប៉ុន្តែ ព្រះ​ដែល​ទ្រង់​មាន​សេចក្តី​មេត្តាករុណា​ដ៏​លើស​លប់ ដោយ​ព្រោះ​សេចក្តី​ស្រឡាញ់​ជា​ខ្លាំង ដែល​ទ្រង់​មាន​ដល់​យើង​រាល់​គ្នា ក្នុង​កាល​ដែល​យើង​នៅ​ស្លាប់​ក្នុង​ការ​រំលង​នៅ​ឡើយ នោះ​ទ្រង់​បាន​ប្រោស​ឲ្យ​យើង​រាល់​គ្នា​បាន​រស់ ជា​មួយ​នឹង​ព្រះគ្រីស្ទ​គឺ​ដោយ​ព្រះគុណដែល​អ្នក​រាល់​គ្នា​បាន​សង្គ្រោះ។ អេភេសូរ២:៤-៥

អំណានប្រចាំថ្ងៃ ជើងឯកនៃសេចក្តីពិត

ក្រោយពីបានចាកចេញពីពួកជំនុំរ៉ូមមក លូធើរបានទទួលសញ្ញាប័ត្របណ្ឌិតផ្នែកសាសនានៅឯសាកលវិទ្យាល័យវិតធិនប៊ើក។ នៅពេលនេះ គាត់​មានសេរីភាពអាចចំណាយពេលសិក្សាគម្ពីរដែល​គាត់ស្រឡាញ់ ជាង​ពេល​ណាៗទាំងអស់ នៅក្នុងជីវិតរបស់គាត់។ គាត់បានប្តេជ្ញា និងស្បថថា គាត់នឹងសិក្សាព្រះគម្ពីរយ៉ាងយកចិត្តទុកដាក់ ព្រមទាំងអធិប្បាយតែព្រះបន្ទូលរបស់ព្រះមួយមុខគត់ ហើយគាត់នឹងមិននិយាយអ្វីដែលជាការបង្រៀនរបស់ពួកប៉ាបអស់មួយជីវិតរបស់គាត់។ នៅពេលនេះ គាត់មិនមែន​គ្រាន់​តែ​ជាសង្ឃ ឬជាសាស្ត្រាចារ្យប៉ុណ្ណោះទេ តែជាអ្នកនាំដំណឹងពីព្រះគម្ពីរដ៏ពិតវិញ។ គាត់ត្រូវបានព្រះត្រាស់ហៅឱ្យធ្វើជាអ្នកចម្អែតដល់ហ្វូងចៀម ដែលស្រេកឃ្លានសេចក្តីពិតរបស់ទ្រង់។ គាត់បានប្រកាសថា អ្នកគ្រីស្ទាន មិនគួរ​ទទួលគោលលទ្ធិណា ក្រៅពីសេចក្តីពិតដែលបានចែងនៅក្នុងព្រះគម្ពីរបរិសុទ្ធទេ។ ការប្រកាសរបស់គាត់នេះ បានធ្វើឱ្យមានការរំជើបរំជួល​ដល់​គ្រឹះស្ថានរបស់អំណាចប៉ាប ហើយពួកគេក៏បានទប់ស្កាត់ និងបង្ក្រាបការ កែទម្រង់នេះ។

ឥឡូវនេះលោកលូធើរបានចូលកាន់តំណែងរបស់គាត់ជាជើងឯកនៃសេចក្តីពិត ដោយអង់អាចក្លាហាន។ សំឡេងនៃការព្រមានដ៏ស្មោះត្រង់យ៉ាងខ្លាំងរបស់គាត់បានឮចេញពីអាសនា គាត់បាន​បង្ហាញនៅចំពោះមុខមនុស្សនូវលទ្ធផលនៃអំពើបាប ហើយបានបង្រៀនពួកគេថា គ្មានមនុស្ស​ណាម្នាក់ដែលអាចជួយបន្ធូរ ឬរំដោះយើងឱ្យរួចពីទណ្ឌកម្មរបស់វាបានឡើយ។ មានតែការលន់តួបាបចំពោះព្រះ ហើយមានជំនឿលើព្រះគ្រីស្ទប៉ុណ្ណោះ ដែលអាចជួយសង្គ្រោះយើងពីអំពើបាបបាន។ យើងមិនអាចទិញព្រះគុណរបស់ព្រះគ្រីស្ទបានឡើយ ផ្ទុយទៅវិញ វាជាអំណោយទានដែល​ឥតគិតថ្លៃ​ពីព្រះវិញ។ គាត់បានប្រាប់មិនឱ្យពួកគេទិញប័ណ្ណលោះបាបពីប៉ាបទេ ប៉ុន្តែឱ្យពួកគេសម្លឹងមើលទៅឯព្រះអង្គសង្គ្រោះ ដែលជាប់ឆ្កាង ដោយជំនឿវិញ។ គាត់បានអះអាងប្រាប់ពួកគេថា មានតែការងាកចេញពីការ​ខំប្រព្រឹត្ត​ដោយ​ខ្លួនឯង ហើយបែរមករកព្រះគ្រីស្ទ ហើយជឿលើទ្រង់មួយទេ ដែលអាចឱ្យយើងរកឃើញសេចក្តីសុខសាន្តហើយនិងអំណរ។

​អំណានព្រះគម្ពីរពេលល្ងាច៖ យេរេមា ជំពូក​ ៣៦:២០-៣២