​អំណានព្រះគម្ពីរពេលព្រឹក៖ ដ្បិត​ព្រះទ្រង់​មិន​បាន​ប្រទាន​ឲ្យ​យើង​មាន​វិញ្ញាណ ដែល​តែង​តែ​ខ្លាច​ឡើយ គឺ​ឲ្យ​មាន​វិញ្ញាណ​ដ៏​មាន​អំណាច សេចក្តី​ស្រឡាញ់ និង​ប្រាជ្ញា​នឹងធឹង​វិញ។ ធីម៉ូថេទី២ ១:៧

អំណានប្រចាំថ្ងៃ ឥទ្ធិពលដ៏មានអំណាច

គាត់បានប្រកាន់ជំនឿរបស់គាត់យ៉ាងរឹងមាំដូចថ្មដា ក្នុងខណៈដែល​អំណាច​ដ៏គួរឱ្យតក់​ស្លុត របស់លោកិយកំពុងតែវាយប្រហារគាត់ តែមិនបានធ្វើឱ្យគាត់ឈឺចាប់សោះនោះ។ ពាក្យពេចន៍ដ៏សាមញ្ញ តែពោរពេញទៅ​ដោយ​ព្រះចេស្តារបស់ព្រះ ហើយនិងសេចក្តីក្លាហាន ព្រមទាំងការប្តេជ្ញាដ៏មោះមុតរបស់គាត់បានធ្វើឱ្យអង្គសន្និបាតទាំងមូលមានចំណាប់អារម្មណ៍យ៉ាងខ្លាំង។ នេះជា​ភស្តុតាងមួយដែលបញ្ជាក់ថា លូធើរនឹងមិនត្រូវដាក់ឱ្យនៅក្រោមការកាត់ទោស ឬនៅក្រោមអំណាចឬក្រោមការគំរាមកំហែងរបស់ពួកជំនុំរ៉ូមទៀតឡើយ។

ព្រះគ្រីស្ទបានមានបន្ទូលតាមរយៈទីបន្ទាល់របស់លូធើរ ដោយ​អំណាច និងសេចក្តីថ្លៃថ្នូរដែលការនេះបានលើកទឹកចិត្តដល់ទាំងមិត្ត ទាំងសត្រូវរបស់គាត់ដោយក្តីអស្ចារ្យ។ ព្រះវិញ្ញាណរបស់ព្រះបានសណ្ឋិតនៅកណ្តាលអង្គសន្និបាតនោះ ហើយក៏បានបណ្តាលចិត្តរបស់អ្នកដឹកនាំជាច្រើនរូបនៃចក្រភពទាំងមូល។ ស្តេចមួយចំនួន ក៏បានបើកចិត្តទទួល និងផ្តល់យុតិធម៌ដល់អ្វីដែលលោកលូធើរបាននិយាយ។ មានមនុស្សជាច្រើន ក្នុងចំណោមនោះបានជឿលើសេចក្តីពិត តែមានអ្នកខ្លះក៏បាត់​ជំនឿ​ទៅ​វិញ។ មួយចំនួនទៀតដែលពុំបានបង្ហាញពីការកែប្រែជំនឿ នៅពេលនោះទេ តែពួកគេបានសិក្សាស្វែងយល់ពីការពិត ពីព្រះគម្ពីរដោយខ្លួនឯង ហើយក្រោយមកក៏បានធ្វើការផ្លាស់ប្តូរជំនឿរបស់គេដោយក្លាហាននិងបើកចំហរដែរ។

លោកមន្ត្រី ហ្វេដឺរិក (Federick) បានទន្ទឹងរង់ចាំពេលដែលគេនាំយកលោកលូធើរមកកាន់អង្គប្រជុំ ហើយនៅពេលនោះគាត់បានស្តាប់ប្រសាសន៍របស់លោកលូធើរដោយយកចិត្តទុកដាក់បំផុត។ នៅពេល​ដែល​គាត់ឃើញថា លូធើរមានភាពក្លាហាន និងបានប្រកាន់ជំហររបស់ខ្លួនយ៉ាងរឹងមាំ ដោយមិនបានចុះចូលជាមួយនឹងពួកគេ នោះគាត់មានការត្រេកអរ និង​មានមោទនភាពជាខ្លាំងដែលបានធ្វើជាអ្នកការពារលោកលូធើរ។ គាត់​បានពិចារណាប្រៀបធៀបគូភាគីទាំងសងខាង ហើយបាន​មើល​ឃើញ​យ៉ាង​ច្បាស់ថា អំណាចរបស់សម្តេចប៉ាប ពួកសង្គ្រាជ ហើយនិងអំណាច របស់​ស្តេច មិនអាចបៀតបៀនដល់អំណាចរបស់សេចក្តីពិតបានទេ។ ហើយលទ្ធិប៉ាបបានទទួលបរាជ័យយ៉ាងធ្ងន់ធ្ងរដែលត្រូវបានឮដល់គ្រប់ទាំងសាសន៍នៅគ្រប់ជំនាន់។

ប្រសិនបើលូធើរបានចុះចូលនៅចំណុចតូចណាមួយ នោះសាតាំង​ព្រមទាំងពួកបរិវាររបស់វា នឹងប្រាកដជាបានទទួលជ័យជំនះជាមិនខាន ប៉ុន្តែ​ភាពរឹងមាំរបស់លូធើរ គឺជាការមួយដែលបានរំដោះពួកជំនុំនៅសម័យនោះ ហើយបានចាប់ផ្តើមសម័យថ្មីដ៏ល្អប្រសើរមួយ។ ឥទ្ធិពលនៃបុរសម្នាក់ ដែល​ហ៊ានគិត ហ៊ានធ្វើកិច្ចការទាំងឡាយដែលទាក់ទងនឹងបញ្ហាសាសនានេះ មិនត្រឹមតែមានទៅលើពួកជំនុំ នៅម័យកាលរបស់គាត់ប៉ុណ្ណោះទេ ប៉ុន្តែគឺ​មានឥទ្ធិពលយ៉ាងខ្លាំង ដល់មនុស្សជំនាន់ក្រោយៗថែមទៀតផង។ ភាព​រឹង​មាំរបស់គាត់ នឹងលើកទឹកចិត្តដល់មនុស្សជំនាន់ក្រោយ នាពេលចុងបំផុត ដែលនឹងរងនូវការបៀតបៀនដូចគ្នានោះ។ ព្រះចេស្តារបស់ព្រះជាម្ចាស់នៅពីលើយោបល់របស់មនុស្ស ហើយក៏នៅពីលើអំណាចរបស់សាតាំងដែរ។

​អំណានព្រះគម្ពីរពេលល្ងាច៖ ដានីយ៉ែល ជំពូក​ ២:១-២៣