ថ្ងៃព្រហស្បតិ៍ ទី១៨ ខែសីហា ឆ្នាំ២០២២
អំណានព្រះគម្ពីរពេលព្រឹក៖ មានគ្នា២នាក់ នោះវិសេសជាងនៅតែឯង ពីព្រោះគេមានរង្វាន់យ៉ាងល្អកើតពីការនឿយហត់របស់ខ្លួន ដ្បិតបើដួល នោះម្នាក់នឹងជ្រោងគ្នាឡើងវិញ តែវរហើយ អ្នកណាដែលដួលក្នុងកាលដែលនៅតែម្នាក់ឯង ឥតមានគ្នានឹងជួយជ្រោងឡើងវិញ។ សាស្តា ៤:៩-១០
អំណានប្រចាំថ្ងៃ ចូរជួយគាំទ្រគា្នទៅវិញទៅមក
ខ្ញុំបានឃើញថា លោកលូធើរមានភាពវាងវៃ ហើយម៉ឺងម៉ាត់ ព្រមទាំងមានក្តីក្លាហាន ក្នុងការទិតៀនអំពើបាប ដោយប្រកាសពីសេចក្តីពិតវិញ។ គាត់មិនបានព្រួយឬក្រែងខ្លាចចំពោះបុគ្គលណាមួយ ឬក៏សាតាំងឡើយ ព្រោះគាត់បានដឹងថា មានព្រះមួយអង្គដែលនៅខាងគាត់ ដែលមានឫទ្ធិអំណាចលើសទាំងអស់។ ភាពមោះមុតនិងអង់អាចក្លាហានរបស់គាត់នោះ ជួនកាលអាចនាំឱ្យមានគ្រោះថ្នាក់ដ៏ធំដល់គាត់ដែរ ហេតុដូច្នេះហើយបានជាព្រះ ទ្រង់បានរៀបចំ មេឡាន់ថុន ជាអ្នកដែលមានលក្ខណៈផ្ទុយគ្នាពីលូធើរក្នុងការជួយសម្រួលដល់ការកែទម្រង់នេះ។ មេឡាន់ថុន គឺជាមនុស្សម្នាក់ដែលមានភាពទន់ភ្លន់ ភ័យខ្លាច មានការប្រុងប្រយ័ត្នខ្ពស់ ហើយពោរពេញទៅដោយការអត់ធ្មត់ តែក៏ជាអ្នកដែលព្រះជាម្ចាស់គាប់ព្រះទ័យដែរ។ គាត់គឺជាមនុស្សម្នាក់ដែលមានការចេះដឹងខ្ពស់ខាងព្រះបន្ទូល ហើយក៏មានការវិនិច្ឆ័យយ៉ាងសុចរិតដែរ។ គាត់ក៏ស្រឡាញ់សេចក្តីពិតនៃព្រះបន្ទូលរបស់ព្រះប្រហាក់ប្រហែលនឹងលូធើរដែរ។ ព្រះជាម្ចាស់បានបណ្តាលឱ្យគេទាំងពីរនាក់មានចិត្តដូចគ្នា ហើយក៏ជាមិត្តដ៏ល្អនឹងគ្នាដែរ។ លូធើរតែងតែជាជំនួយដ៏ធំដល់ មេឡាន់ថុន ក្នុងកាលដែលមេឡាន់ថុនមានការភ័យខ្លាច ហើយមានការយឺតយ៉ាវ រីឯមេឡាន់ថុនវិញ ក៏ជាជំនួយដ៏ធំដល់លូធើរ ក្នុងកាលដែលលូធើរធ្លាក់ក្នុងគ្រោះថ្នាក់ ដោយសារភាពឆេវឆាវរបស់គាត់ដែរ។ ការប្រុងប្រយ័ត្នខ្ពស់របស់មេឡាន់ថុនបានធ្វើឱ្យលូធើររួចពីគ្រោះថ្នាក់ជាច្រើនលើកច្រើនសារ។ បើគ្មានមេឡាន់ថុនទេ នោះលូធើប្រាកដជាធ្លាក់ក្នុងភាពអន្តរាយជាមិនខាន។ រីឯលូធើរវិញក៏បានជួយ ជំរុញឱ្យការងារមានភាពឆាប់រហ័សដែរ ហើយប្រសិនបើគ្មានលូធើរទេ នោះមេឡាន់ថុនក៏មិនអាចសម្រេចកិច្ចការនោះបានដែរ។ ព្រះជាម្ចាស់បានសម្តែងគតិបណ្ឌិតរបស់ទ្រង់ឱ្យខ្ញុំឃើញ ក្នុងការដែលទ្រង់ជ្រើសរើសអ្នកទាំងពីរ ឱ្យធ្វើការជាមួយគ្នា ក្នុងការកែទម្រង់។
អំណានព្រះគម្ពីរពេលល្ងាច៖ ដានីយ៉ែល ជំពូក ២:២៤-៤៩
ខចងចាំ៖ ឯអ្នកណាដែលមានគំនិតជាប់តាមទ្រង់ នោះទ្រង់នឹងថែរក្សាអ្នកនោះ ឲ្យមានសេចក្តីសុខពេញខ្នាត ដោយព្រោះគេទុកចិត្តនឹងទ្រង់។ អេសាយ ២៦:៣
