ថ្ងៃអង្គារ ទី២៣ ខែសីហា ឆ្នាំ២០២២
អំណានព្រះគម្ពីរពេលព្រឹក៖ ខ្ញុំក៏ឃើញទេវតា១ទៀត កំពុងហោះកាត់កណ្តាលមេឃ ទាំងមានដំណឹងល្អដ៏នៅអស់កល្បជានិច្ច សំរាប់នឹងថ្លែងប្រាប់ដល់មនុស្សនៅផែនដី គឺដល់គ្រប់អស់ទាំងសាសន៍ គ្រប់ពូជអំបូរ គ្រប់ភាសា ហើយគ្រប់ទាំងគ្រួសារដែរ ទេវតានោះបន្លឺសំឡេងយ៉ាងខ្លាំងថា ចូរកោតខ្លាចដល់ព្រះ ហើយសរសើរសិរីល្អរបស់ទ្រង់ចុះ ដ្បិតពេលដែលទ្រង់ត្រូវជំនុំជំរះ នោះបានមកដល់ហើយ ចូរក្រាបថ្វាយបង្គំដល់ព្រះដ៏បង្កើតផ្ទៃមេឃ ផែនដី សមុទ្រ និងរន្ធទឹកទាំងប៉ុន្មានចុះ។ វិវរណៈ ១៤:៦-៧
អំណានប្រចាំថ្ងៃ
បទទំនាយនៃសាររបស់ទេវតាទីមួយ នៅក្នុងគម្ពីរវិវរណៈជំពូក ១៤ បានបង្ហាញការសម្រេច (បទទំនាយនេះ) នៅក្នុងចលនាអាត់វ៉ិន នៅឆ្នាំ ១៨៤០-១៨៤៤។ ទាំងនៅក្នុងប្រទេសអឺរ៉ុប និងអាមេរិក ពួកមនុស្សដែលមានជំនឿរឹងមាំនិងជាអ្នកព្យាយាមអធិដ្ឋានមានការរំជួលចិត្តជាខ្លាំងខណៈដែលព្រះបានត្រាស់ហៅពួកគេឱ្យចាប់អារម្មណ៍ ទៅនឹងបទទំនាយនិងសិក្សាព្រះបន្ទូលរបស់ព្រះ ពួកគេបានឃើញភស្តុតាងដែលគួរឱ្យទុកចិត្តបានថា ទីបញ្ចប់នៃពិភពលោកនេះបានមកដល់ហើយ។ ព្រះវិញ្ញាណរបស់ព្រះបានជម្រុញពួកអ្នកបំរើរបស់ទ្រង់ឱ្យផ្តល់នូវការព្រមានពីដំណើរនេះឱ្យផ្សព្វផ្សាយសារនៃដំណឹងល្អដ៏នៅអស់កល្បនេះឱ្យបានឆ្ងាយនិងទូលំទូលាយ «ចូរកោតខ្លាចដល់ព្រះ ហើយសរសើរសិរីល្អរបស់ទ្រង់ចុះ ដ្បិតពេលដែលទ្រង់ត្រូវជំនុំជម្រះ នោះបានមកដល់ហើយ» វិវរណៈ ១៤:៧។
នៅទីណាដែលបេសកជន (អ្នកផ្សព្វផ្សាយដំណឹងល្អ) ចូលដល់ទីនោះត្រូវតែឮពីសេចក្តីស្រឡាញ់នៃការយាងមកជាឆាប់របស់ព្រះគ្រីស្ទ។ ក្រុមផ្សេងៗដែលនៅកន្លែងខុសៗគ្នា បានសិក្សាព្រះគម្ពីរ ហើយបានរកឃើញសេចក្តីពិតថា ការយាងមករបស់ព្រះអង្គសង្គ្រោះ ព្រះយេស៊ូវ ជិតមកដល់ហើយ។ នៅក្នុងផ្នែកខ្លះនៃទ្វីបអឺរ៉ុប ជាកន្លែងដែលច្បាប់បានហាមប្រាមដល់ការអធិប្បាយ (ផ្សព្វផ្សាយ) ពីគោលលទ្ធិនៃការយាងមកជាលើកទីពីររបស់ព្រះយេស៊ូវ គេបានជំរុញឱ្យកុមារធ្វើការប្រកាសដំណឹងល្អនោះ ហើយមានមនុស្សជាច្រើនបានស្តាប់ការព្រមាននេះ ដោយយកចិត្តទុកដាក់។ ព្រះបានត្រាស់ហៅលោក វី លៀម មីលើរ (William Miller) ហើយនិងសហការីរបស់គាត់ឱ្យ ទទួលខុសត្រូវផ្សព្វផ្សាយសារនោះ នៅក្នុងប្រទេសអាមេរិក ហើយពន្លឺត្រូវបានអុជបំភ្លឺ ដោយសារការងាររបស់ពួកគេបានបំភ្លឺដល់ទីកន្លែងដ៏ឆ្ងាយជាច្រើន។ ព្រះទ្រង់បានចាត់ទេវតារបស់ទ្រង់ ឱ្យផ្លាស់ប្តូរចិត្តកសិករម្នាក់ដែលមិនបានជឿទៅលើព្រះគម្ពីរឱ្យសិក្សាពីបទទំនាយ។ ទេវតារបស់ព្រះបានទៅជួបកសិករដែលព្រះបានជ្រើសរើសនោះយ៉ាងរហ័ស ដើម្បីដឹកនាំគំនិតរបស់គាត់ និងបើកបង្ហាញឱ្យគាត់យល់ពីបទទំនាយ ដែលរាស្ត្ររបស់្រទង់មិនធ្លាប់បានដឹង។ ការចាប់ផ្តើមនៃសេចក្តីពិតជាបន្តបន្ទាប់ត្រូវបានប្រទាន មកដល់គាត់ ហើយទេវតាបានដឹកនាំគាត់ឱ្យស្រាវជ្រាវពីសេចក្តីពិតមួយទៅសេចក្តីពិតមួយទៀត រហូតទាល់តែគាត់បានសម្លឹងមើលទៅព្រះបន្ទូលរបស់ព្រះ ដោយការអស្ចារ្យ និងការកោតសរសើរ។ នៅទីនោះគាត់បានឃើញបណ្តាញនៃសេចក្តីពិតដ៏ល្អឥតខ្ចោះ។ ព្រះបន្ទូលដែលពីមុនគាត់ធ្លាប់បានចាត់ទុកជាពាក្យធម្មតា (ដែលព្រះមិនបានបណ្តាល) ឥឡូវនេះបានបើកសំដែងឱ្យគាត់ឃើញច្បាស់ពីសោភណភាព និងសិរីល្អរបស់ព្រះគម្ពីរនោះ។ គាត់បានឃើញដោយយល់ថា ចំណែកមួយនៃព្រះគម្ពីរ ពន្យល់ន័យពីផ្នែកមួយទៀត ហើយនៅពេលដែលគាត់មិនយល់វគ្គណាមួយ គាត់បានរកឃើញថាផ្នែកផ្សេងមួយទៀតនៃព្រះបន្ទូលបានពន្យល់ពីវគ្គដែលគាត់មិនយល់នោះ។ គាត់បានគោរពព្រះបន្ទូលដ៏ពិសិដ្ឋរបស់ព្រះដោយក្តីអំណរជាមួយនឹងការគោរពនិងការកោតស្ញប់ស្ញែងដ៏ជ្រាលជ្រៅបំផុត។
អំណានព្រះគម្ពីរពេលល្ងាច៖ ដានីយ៉ែល ជំពូក ៥:១-១២
ខចងចាំ៖ ខ្ញុំក៏ឃើញទេវតា១ទៀត កំពុងហោះកាត់កណ្តាលមេឃ ទាំងមានដំណឹងល្អដ៏នៅអស់កល្បជានិច្ច សំរាប់នឹងថ្លែងប្រាប់ដល់មនុស្សនៅផែនដី គឺដល់គ្រប់អស់ទាំងសាសន៍ គ្រប់ពូជអំបូរ គ្រប់ភាសា ហើយគ្រប់ទាំងគ្រួសារដែរ ទេវតានោះបន្លឺសំឡេងយ៉ាងខ្លាំងថា ចូរកោតខ្លាចដល់ព្រះ ហើយសរសើរសិរីល្អរបស់ទ្រង់ចុះ ដ្បិតពេលដែលទ្រង់ត្រូវជំនុំជំរះ នោះបានមកដល់ហើយ ចូរក្រាបថ្វាយបង្គំដល់ព្រះដ៏បង្កើតផ្ទៃមេឃ ផែនដី សមុទ្រ និងរន្ធទឹកទាំងប៉ុន្មានចុះ។ វិវរណៈ ១៤:៦-៧
