ថ្ងៃពុធ ទី២៤ ខែសីហា ឆ្នាំ២០២២
អំណានព្រះគម្ពីរពេលព្រឹក៖ ក៏ឲ្យប៉ះនឹងមាត់ខ្ញុំ ដោយពោលថា នែរងើកនេះបានប៉ះនឹងបបូរមាត់អ្នកហើយ ឯសេចក្តីទុច្ចរិតរបស់អ្នក នោះបានដកចេញ ហើយអំពើបាបរបស់អ្នកបានអត់ទោសឲ្យផង។ ៨ រួចខ្ញុំឮសូរសៀងរបស់ព្រះអម្ចាស់ មានព្រះបន្ទូលមកថា តើអញនឹងចាត់អ្នកណាឲ្យទៅ តើអ្នកណានឹងទៅឲ្យអញ នោះខ្ញុំទូលឆ្លើយថា ទូលបង្គំនៅឯណេះហើយ សូមចាត់ទូលបង្គំចុះ។ អេសាយ ៦:៧-៨
អំណានប្រចាំថ្ងៃ ការផ្សព្វផ្សាយព្រះរាជសាររបស់ព្រះ
ខណៈដែលគាត់បានពិនិត្យតាមដានបទទំនាយទាំងនោះ គាត់បានឃើញថា មនុស្សនៅលើផែនដីនេះកំពុងតែរស់នៅក្នុងគ្រាចុងបញ្ចប់នៃប្រវត្តិសាស្ត្ររបស់ពិភពលោកហើយ ប៉ុន្តែពួកគេមិនបានដឹងពីរឿងនេះឡើយ។ គាត់បានសម្លឹងមើលទៅឯពួកជំនុំ ហើយបានឃើញថាពួកគេសុទ្ធតែពុករលួយ ពួកគេបានដកយកសេចក្តីស្រឡាញ់របស់ពួកគេចេញពីព្រះយេស៊ូវ ហើយបានដាក់ក្តីស្រឡាញ់នោះនៅលើលោកិយវិញ ពួកគេកំពុងតែស្វែងរកកិត្តិយសខាងលោកិយ ជំនួសឱ្យកិត្តិយសដែលមកពីលើស្ថានសួគ៌ ដោយស្រវាចាប់យកនូវទ្រព្យសម្បត្តិលោកិយ ជំនួសឱ្យការរក្សាទ្រព្យសម្បត្តិទុកនៅឯនគរស្ថានសួគ៌វិញ។ គាត់បានមើលឃើញនូវការកំពុត សេចក្តីងងឹត ហើយនិងសេចក្តីស្លាប់នៅគ្រប់ទីកន្លែង។ វិញ្ញាណរបស់គាត់បានច្របូកច្របល់ក្នុងចិត្តរបស់គាត់។ ព្រះទ្រង់បានត្រាស់ហៅគាត់ឱ្យចាកចេញពីចំការរបស់គាត់ ដូចជាទ្រង់បានត្រាស់ហៅលោកអេលីសេ ឱ្យចាកចេញពីគោ និងពីស្រែរបស់គាត់ដែលគាត់កំពុងភ្ជួរ ហើយដើរតាមលោកអេលីយ៉ាដូច្នោះដែរ។ ដោយការភ័យញ័ររន្ធត់ លោក វីលៀម មីលើរ បានចាប់ផ្តើមបើកសំដែងនូវអាថ៌កំបាំងពីអាណាចក្ររបស់ព្រះ ដល់បណ្តាជន ដោយបាននាំអ្នកស្តាប់របស់គាត់ឱ្យបានយល់ពីបទទំនាយទាំងឡាយរហូតដល់ការយាងមកជាលើកទីពីររបស់ព្រះគ្រីស្ទ។ ទីបន្ទាល់នៃព្រះគម្ពីរបានចង្អុលប្រាប់ឱ្យដឹងពីការយាងមករបស់ព្រះគ្រីស្ទ នៅក្នុងឆ្នាំ ១៨៤៣ បានដាស់ឱ្យមនុស្សចាប់អារម្មណ៍សុះសាយ។ គាត់បានដឹកនាំមនុស្សជាច្រើនឱ្យបានទទួលជឿថា ការបកស្រាយពីរយៈពេលនៃបទទំនាយ គឺពិតជាត្រឹមត្រូវ គេបានទទួលសេចក្តីពិតដោយអំណរ ហើយបោះបង់ចោលនូវគំនិតដ៏មានអំនួតរបស់គេ។ គ្រូគង្វាលខ្លះបានទុកទស្សនៈនិងអារម្មណ៍របស់ខ្លួនមួយឡែក ហើយលះបង់ប្រាក់ខែនិងព្រះវិហាររបស់គេ ហើយមករួបរួមនៅក្នុងការប្រកាសអំពីការយាងមករបស់ព្រះយេស៊ូវ។ ទោះបីជាយ៉ាងណាក៏ដោយ ក៏មានតែគ្រូគង្វាលមួយចំនួនតូចប៉ុណ្ណោះ ដែលបានទទួលយកសារនេះ ដូច្នេះ ហើយបានជាដំណឹងនោះត្រូវបានប្រគល់ទៅឱ្យពួកស្មរបន្ទាល់ជាច្រើន។
ពួកកសិករបានចាកចេញពីស្រែចំការរបស់គេ ពួកជាងម៉ាស៊ីនបានចាកចេញពីឧបករណ៍របស់គេ ពួកឈ្មួញបានចាកចេញពីទំនិញទិញដូររបស់ខ្លួន ពួកអ្នកដែលមានវិជ្ជាជីវៈខ្ពង់ខ្ពស់បានចាកចេញពីមុខតំណែងរបស់ពួកគេ ហើយចំនួននេះក៏នៅតែតិច បើប្រៀបធៀបទៅនឹងទំហំការងារ ដែលនឹងត្រូវបំពេញឱ្យបានសម្រេច។ ស្ថានភាពនៃពួកជំនុំដែលគ្មានព្រះ (ប្រព្រឹត្តអាក្រក់) ហើយនិងពិភពលោក បានដាក់បន្ទុកយ៉ាងធ្ងន់ដល់អ្នកចាំយាមពិតប្រាកដ ហើយពួកគេសុខចិត្តរងទ្រាំនូវការលំបាក ការខ្វះខាត ព្រមទាំងទទួលរងនូវការឈឺចាប់គ្រប់បែបយ៉ាង ដើម្បីបំបែកមនុស្សចេញពីលោកិយ ឱ្យមកឯសេចក្តីសង្គ្រោះ។ ទោះបីជាមានការប្រឆាំងពីសាតាំងយ៉ាងណាក៏ដោយ ក៏ការងារនោះបានធ្វើដំណើរឆ្ពោះទៅមុខយ៉ាងលឿនដែរ ហើយមនុស្សរាប់ពាន់នាក់បានទទួលសេចក្តី ពិតនៃការយាងមកជាលើកទីពីរ។
អំណានព្រះគម្ពីរពេលល្ងាច៖ ដានីយ៉ែល ជំពូក ៥:១៣-៣០
ខចងចាំ៖ ខ្ញុំក៏ឃើញទេវតា១ទៀត កំពុងហោះកាត់កណ្តាលមេឃ ទាំងមានដំណឹងល្អដ៏នៅអស់កល្បជានិច្ច សំរាប់នឹងថ្លែងប្រាប់ដល់មនុស្សនៅផែនដី គឺដល់គ្រប់អស់ទាំងសាសន៍ គ្រប់ពូជអំបូរ គ្រប់ភាសា ហើយគ្រប់ទាំងគ្រួសារដែរ ទេវតានោះបន្លឺសំឡេងយ៉ាងខ្លាំងថា ចូរកោតខ្លាចដល់ព្រះ ហើយសរសើរសិរីល្អរបស់ទ្រង់ចុះ ដ្បិតពេលដែលទ្រង់ត្រូវជំនុំជំរះ នោះបានមកដល់ហើយ ចូរក្រាបថ្វាយបង្គំដល់ព្រះដ៏បង្កើតផ្ទៃមេឃ ផែនដី សមុទ្រ និងរន្ធទឹកទាំងប៉ុន្មានចុះ។ វិវរណៈ ១៤:៦-៧
