ថ្ងៃសៅរ៍ ទី២៧ ខែសីហា ឆ្នាំ២០២២
អំណានព្រះគម្ពីរពេលព្រឹក៖ ចូរប្រយ័ត្ននឹងពួកគ្រូក្លែងក្លាយ ដែលគេមកឯអ្នករាល់គ្នា ដោយពាក់រោមចៀមបំប្លែងខ្លួន តែខាងក្នុងរបស់គេ ជាឆ្កែចចកដែលឆ្មក់ស៊ីវិញ អ្នករាល់គ្នានឹងស្គាល់គេបាន ដោយសារផលគេបង្កើត តើដែលបេះផ្លែទំពាំងបាយជូរពីគុម្ពបន្លា ឬផ្លែល្វាពីដំបងយក្សឬទេ។ ម៉ាថាយ ៧:១៥-១៦
អំណានប្រចាំថ្ងៃ ការប្រឆំាង
មនុស្សជាច្រើនដែលបានប្រកាសថាខ្លួនជាអ្នកស្រឡាញ់ព្រះអង្គសង្គ្រោះបានប្រកាសថាពួកគេមិនប្រឆាំងនឹងការអធិប្បាយពីការយាងមករបស់ព្រះទេ ពួកគេបានប្រឆាំងតែនឹងពេលវេលាជាក់លាក់តែប៉ុណ្ណោះ។ ព្រះនេត្រទិព្វរបស់ព្រះបានជ្រាបពីចិត្តរបស់ពួកគេទាំងអស់។ ពួកគេមិនចង់ ឮពីការយាងមករបស់ព្រះគ្រីស្ទ ដើម្បីជំនុជម្រះពិភពលោក ដោយសុចរិតនោះទេ។ ពួកគេជាអ្នកបំរើមិនស្មោះត្រង់ ការងាររបស់ពួកគេនឹងមិនអាចទ្រាំនឹងការជំនុំជម្រះនៃព្រះដែលជ្រាបពីចិត្តមនុស្សឡើយ ហើយពួកគេមានការភ័យខ្លាច មិនហ៊ានជួបព្រះអម្ចាស់របស់ពួកគេឡើយ។ ពួកគេមិនបានរៀបចំទទួលស្វាគមន៍ព្រះយេស៊ូ ដូចជាពួកសាសន៍យូដា នៅជំនាន់ការយាងមកជាលើកទីមួយរបស់ព្រះគ្រីស្ទដែរ។ សាតាំងហើយនិងពួកទេវតារបស់វាមានសេចក្តីរីករាយក្រៃលែងហើយបានពោលពាក្យចំអកឡកឡឺយចំពោះព្រះគ្រីស្ទ ហើយនិងពួកទេវតាបរិសុទ្ធ ថារាស្ត្ររបស់្រទង់មានសេចក្តីស្រឡាញ់ដល់ទ្រង់តិចណាស់បានជាគេមិនចង់ឃើញទ្រង់យាងមកវិញ។
ពួកអ្នកចាំយាមមិនស្មោះត្រង់ទាំងនោះបានរារាំងដំណើរជឿនលឿននៃការងាររបស់ព្រះ។ នៅពេលដែលប្រជាជនបានភ្ញាក់រឭក ហើយបានចាប់ផ្តើមសួរពីផ្លូវនៃសេចក្តីសង្គ្រោះ ពួកអ្នកដឹកនាំទាំងអស់នេះបានជ្រៀតចូលក្នុងចន្លោះប្រជាជន ហើយនិងសេចក្តីពិត ដើម្បីធ្វើឱ្យគេភ័យខ្លាច ជាសម្ងាត់ ដោយបកស្រាយព្រះបន្ទូលរបស់ព្រះ ខុសពីការពិត។ នៅក្នុងការងារនេះ សាតាំងនិងគ្រូគង្វាលមិនស្មោះត្រង់បានរួបរួមគ្នា ដោយស្រែកឡើងថា សេចក្តីសុខសាន្ត សេចក្តីសុខសាន្ត នៅពេលដែលព្រះមិនបានមានបន្ទូលពីសេចក្តីសុខសាន្តនោះ។ ដូចជាពួកផារិស៊ីនៅជំនាន់ព្រះយេស៊ូវដែរ មានមនុស្សជាច្រើនបានបដិសេធមិនចូលក្នុងនគរស្ថានសួគ៌ ដោយខ្លួនគេផ្ទាល់ ហើយគេក៏បានរារាំងអស់អ្នកដែលកំពុងតែចូលទៅនោះដែរ។
គេប្រកាសសារនៃសេចក្តីពិតនេះដល់ទីណា អ្នកដែលបន្ទាបខ្លួននិងអ្នកស្មោះត្រង់បំផុតនៅក្នុងពួកជំនុំគឺជាអ្នកទទួលយកមុនគេ។ អស់អ្នកដែលបានសិក្សាព្រះគម្ពីរដោយខ្លួនឯងអាចឃើញលក្ខណៈខុសពីព្រះគម្ពីរនៃទស្សនៈរបស់បទទំនាយដែលគេនិយមចូលចិត្ត ហើយនៅទីណាដែលការខំប្រឹងប្រែងរបស់ពួកសង្ឃ ដើម្បីធ្វើឱ្យខូចសេចក្តីជំនឿមិនអាចបោកបញ្ឆោតប្រជាជនបាន នៅទីណាដែលពួកគេសិក្សាព្រះបន្ទូលរបស់ព្រះដោយខ្លួនឯង នោះគោលលទ្ធិនៃការយាងមករបស់ព្រះយេស៊ូវត្រូវបានគេប្រៀបធៀបជាមួយនឹងព្រះគម្ពីរដើម្បីបង្កើតជាអំណាចដ៏អស្ចារ្យ។
អំណានព្រះគម្ពីរពេលល្ងាច៖ អេសេគាល ជំពូក ៣៣:១-១៩
ខចងចាំ៖ ខ្ញុំក៏ឃើញទេវតា១ទៀត កំពុងហោះកាត់កណ្តាលមេឃ ទាំងមានដំណឹងល្អដ៏នៅអស់កល្បជានិច្ច សំរាប់នឹងថ្លែងប្រាប់ដល់មនុស្សនៅផែនដី គឺដល់គ្រប់អស់ទាំងសាសន៍ គ្រប់ពូជអំបូរ គ្រប់ភាសា ហើយគ្រប់ទាំងគ្រួសារដែរ ទេវតានោះបន្លឺសំឡេងយ៉ាងខ្លាំងថា ចូរកោតខ្លាចដល់ព្រះ ហើយសរសើរសិរីល្អរបស់ទ្រង់ចុះ ដ្បិតពេលដែលទ្រង់ត្រូវជំនុំជំរះ នោះបានមកដល់ហើយ ចូរក្រាបថ្វាយបង្គំដល់ព្រះដ៏បង្កើតផ្ទៃមេឃ ផែនដី សមុទ្រ និងរន្ធទឹកទាំងប៉ុន្មានចុះ។ វិវរណៈ ១៤:៦-៧
