ថ្ងៃអាទិត្យ ទី២៨ ខែសីហា ឆ្នាំ២០២២
អំណានព្រះគម្ពីរពេលព្រឹក៖ ឱព្រះអង្គអើយ សូមពិនិត្យមើលឲ្យបានស្គាល់ចិត្តទូលបង្គំផងសូមល្បងលឲ្យបានជ្រាបអស់ទាំងគំនិតនៃទូលបង្គំចុះសូមទតមើលបើមានអំពើអាក្រក់ណានៅក្នុងទូលបង្គំហើយនាំទូលបង្គំតាមផ្លូវដ៏នៅអស់កល្បជានិច្ច។ ទំនុកតម្កើង ១៣៩:២៣-២៤
អំណានប្រចាំថ្ងៃ ការរៀបចំខ្លួនចំាជួបព្រះអម្ចាស់
មនុស្សជាច្រើនបានទទួលការបៀតបៀនពីពួកបងប្អូនរបស់ខ្លួន ដែលគ្មានសេចក្តីជំនឿ។ ដើម្បីរក្សានូវតំណែងរបស់ពួកគេឱ្យគង់វង្សនៅក្នុងព្រះវិហារ មនុស្សខ្លះបានសម្ងំស្ងៀម ចំពោះសេចក្តី សង្ឃឹមរបស់ពួកគេ ប៉ុន្តែ ខ្លះទៀតដឹងថាភក្តីភាពចំពោះព្រះបានជំរុញគេមិនឱ្យលាក់បាំងសេចក្តី ពិត ដែលព្រះបានប្រទានមកដល់គេនោះឡើយ។ មនុស្សមិនតិចទេដែលត្រូវបានគេកាត់ផ្តាច់ចេញពីសមាជិកពួកជំនុំ ដោយសារតែការជឿទៅលើការយាងមកវិញរបស់ព្រះគ្រីស្ទតែមួយគត់។ ពិតជាមានតម្លៃណាស់អស់អ្នកដែលបានទ្រាំទ្រនូវការសាកល្បងសេចក្តីជំនឿរបស់ពួកគេ ដូចហោរាបានចែងមកថា «ពួកបងប្អូនរបស់ឯងរាល់គ្នាដែលស្អប់ឯង ជាពួកអ្នកដែលកាត់ឯងរាល់គ្នាចេញ ដោយព្រោះឈ្មោះអញ គេបានពោលថា ចូរឱ្យឯងរាល់គ្នាតម្កើងព្រះយេហូវ៉ាឡើង ដើម្បីឱ្យយើងបានឃើញសេចក្តីអំណររបស់ឯងផង ប៉ុន្តែគឺគេដែលនឹងត្រូវអៀនខ្មាសវិញ» អេសាយ ៦៦:៥។
ទេវតារបស់ព្រះកំពុងទតមើលយ៉ាងយកចិត្តទុកដាក់នូវលទ្ធផលនៃការព្រមាននេះ។ នៅពេលដែលពួកជំនុំជារាងកាយរបស់ព្រះគ្រីស្ទបានច្រានចោលនូវសារនោះ ពួកទេវតាបានយាងចេញពីពួកគេទាំងក្រៀមក្រំ។ ប៉ុន្តែ នៅក្នុងពួកជំនុំមានមនុស្សជាច្រើន មិនទាន់បានសាកល្បងជាមួយនឹងសេចក្តីពិតនៃការយាងមកជាលើកទីពីរនោះនៅឡើយ។ មនុស្សជាច្រើននាក់ត្រូវបានបោកបញ្ឆោតដោយប្តី ប្រពន្ធ ឪពុកម្តាយ ឬកូនៗឱ្យជឿថាសូម្បីតែស្តាប់សារដែលបង្រៀនដោយពួកអ្នកជឿទៅលើការយាងមកជាលើកទីពីរនោះក៏ជាអំពើបាបដែរ។ ពួកទេវតាទាំងឡាយបានលាក់ខ្លួន ឃ្លាំចាំមើលពួកមនុស្សទាំងនេះ យ៉ាងយកចិត្តទុកដាក់ ដ្បិតពន្លឺមួយទៀតមិនទាន់បានធ្លាក់មកបំភ្លឺដល់ពួកគេ ពីបល្ល័ង្ករបស់ព្រះនៅឡើយ។
ការរៀបចំជួបព្រះអម្ចាស់
អ្នកណាដែលបានទទួលសារនេះបានរង់ចាំការយាងមករបស់ព្រះអង្គសង្គ្រោះរបស់ពួកគេយ៉ាងអន្ទះសារកថ្លែងមិនបាន។ ពេលវេលាដែលពួកគេបានរង់ចាំជួបនឹងទ្រង់បានមកដល់ហើយ។ ពួកគេបានចូលមកដល់ពេលវេលានេះ ដោយស្ងៀមស្ងាត់យ៉ាងឱឡារិក។ ពួកគេបានសម្រាកនៅក្នុងទំនាក់ទំនងយ៉ាងផ្អែមល្ហែមជាមួយនឹងព្រះ សេចក្តីសុខសាន្តដ៏ពិតប្រាកដដែលនឹងក្លាយទៅជារបស់គេនៅក្នុងពេលអនាគតខាងមុខដ៏ភ្លឺចាំង។ គ្មាននរណាម្នាក់ដែលបានឆ្លងកាត់សេចក្តីសង្ឃឹមនិងការទុកចិត្តនេះ អាចនឹងបំភ្លេចគ្រាដ៏មានតម្លៃបំផុតនៃការរង់ចាំនោះបានឡើយ។ គេបានទុកចោលមុខជំនួញខាងលោកិយដ៏សំខាន់អស់រយៈពេលពីរបីសប្តាហ៍ ពួកអ្នកជឿទាំងឡាយបានពិនិត្យចិត្ត និងអារម្មណ៍របស់ពួកគេយ៉ាងយកចិត្តទុកដាក់ ហាក់បីដូចជានៅលើគ្រែនៃសេចក្តីស្លាប់ ហើយគេបានបិទភ្នែក ក្នុងរយៈពេលពីរបីម៉ោង សម្លឹងមើលទៅទស្សនីយភាពនៃលោកិយ។ ពួកគេដឹងជាក់ថា ពួកគេត្រូវរៀបចំខ្លួនដើម្បីជួបនឹងព្រះអង្គសង្គ្រោះ សំលៀកបំពាក់សរបស់ពួកគេ គឺជាភាពបរិសុទ្ធនៃព្រលឹង ជាអត្តចរិតដែលបានលាងសំអាតពីអំពើបាប ដោយព្រះលោហិតដែលធួននឹងបាបរបស់ព្រះគ្រីស្ទ។
អំណានព្រះគម្ពីរពេលល្ងាច៖ ដានីយ៉ែល ជំពូក ៨:១-១៤
ខចងចាំ៖ ទំាងរង់ចាំសេចក្តីសង្ឃឹមដ៏មានពរ គឺឲ្យបានឃើញដំណើរលេចមកនៃសិរីល្អរបស់ព្រះដ៏ជាធំ និងព្រះយេស៊ូវគ្រីស្ទ ជាព្រះអង្គសង្គ្រោះនៃយើង។ ទីតុស ២:១៣
