ថ្ងៃពុធ ទី០៣ ខែសីហា ឆ្នាំ២០២២
អំណានព្រះគម្ពីរពេលព្រឹក៖ ដូច្នេះ ដែលមានសំដេចសង្ឃយ៉ាងធំ១អង្គ ដែលទ្រង់បានយាងកាត់អស់ទាំងជាន់ស្ថានសួគ៌ គឺព្រះយេស៊ូវជាព្រះរាជបុត្រានៃព្រះ នោះត្រូវតែឲ្យយើងមានចិត្តដាច់ស្រឡះនឹងជឿតាមចុះ ដ្បិតសំដេចសង្ឃនៃយើង ទ្រង់មិនមែនមិនអាចនឹងអាណិតអាសូរ ដល់សេចក្តីកំសោយរបស់យើងរាល់គ្នានោះទេ ព្រោះទ្រង់បានត្រូវសេចក្តីល្បួងគ្រប់យ៉ាង ដូចជាយើងរាល់គ្នាដែរ តែឥតធ្វើបាបឡើយ ដូច្នេះ ត្រូវឲ្យយើងរាល់គ្នា មកដល់បល្ល័ង្កនៃព្រះគុណ ដោយក្លាហាន ដើម្បីនឹងទទួលសេចក្តីមេត្តា ហើយរកបានព្រះគុណសំរាប់នឹងជួយដល់ពេលត្រូវការចុះ។ ហេព្រើរ ៤:១៤-១៦
អំណានប្រចាំថ្ងៃ យុគសម័យខ្មៅងងឹត
ការបៀតបៀនបានកើតឡើងដល់អ្នកស្មោះត្រង់កាន់តែឃោរឃៅខ្លាំងឡើងៗ ជាងកាលពីមុន ហើយពិភពលោកនេះបានប្រែក្លាយទៅជាសមរភូមិប្រយុទ្ធដ៏ធំ។ គេបានរកឃើញថាពួកជំនុំរបស់ព្រះគ្រីស្ទ បានភៀសខ្លួនទៅរស់នៅកន្លែងដាច់ស្រយាលនៅទីរហោស្ថាន ដូចជាហោរាបានសំដែងទុកមក ថា «រួចស្ត្រីនោះក៏រត់ទៅឯទីរហោស្ថាន នៅទីនោះព្រះបានរៀបចំកន្លែងឱ្យនាង ដើម្បីនឹងចិញ្ចឹមនាង នៅទីនោះអស់រវាង ១២៦០ថ្ងៃ»។យុគសម័យខ្មៅងងឹតការកើនឡើងនៃអំណាចរបស់ពួកជំនុំរ៉ូម បានចាប់ផ្តើមយុគសម័យកាលខ្មៅងងឹត។ នៅពេលដែលអំណាចរបស់ពួកជំនុំនេះបានកើនឡើង ភាពងងឹតកាន់តែជ្រៅទៅៗ។ សេចក្តីជំនឿត្រូវបានផ្ទេរពីព្រះគ្រីស្ទ ជាគ្រឹះដ៏ពិត ទៅសម្តេចប៉ាបនៃទីក្រុងរ៉ូម។ ជំនួសឱ្យការទុកចិត្តដល់ព្រះរាជបុត្រារបស់ព្រះ ដើម្បីការលើកលែងទោសពីអំពើបាបទាំងឡាយ និងដើម្បីសេចក្តីសង្គ្រោះដ៏អស់កល្ប មនុស្សបានសម្លឹងមើលទៅសម្តេចប៉ាបនៃពួកជំនុំរ៉ូមំាុងកាតូលិក ទៅពួកសង្ឃ ហើយនិងពួកសង្គ្រាជ ថាជាអ្នកដែលបានទទួលអំណាចពីព្រះទៅវិញ។ គេបានបង្រៀនដល់បណ្តាជនថា សម្តេចប៉ាបគឺជាសន្ធាការី (អ្នកនាំសម្រុះសម្រួល) របស់គេ ហើយថាគ្មានអ្នកណាដែលអាចចូលទៅព្រះបាន ក្រៅពីសម្តេចប៉ាប ជាលោកឪពុកនោះឡើយ លើកលែងតែតាមរយៈលោកប៉ុណ្ណោះ ហើយលើសពីនេះទៅទៀតគេថា លោកតំណាងឱ្យព្រះ ជំនួសពួកគេ ដូច្នោះហើយបានជាមនុស្សត្រូវតែគោរពដល់លោកទាំងស្រុង។ ការមិនគោរពតាមតម្រូវការរបស់សម្តេចប៉ាបជាបុព្វហេតុដែលនាំឱ្យអ្នកប្រឆាំងទាំងនោះទទួលទារុណកម្មដ៏សាហាវឃោរឃៅ។
ដូច្នេះមនុស្សបានបង្វែរគំនិតរបស់គេចេញពីព្រះ ទៅរកពួកមនុស្សដែលប្រព្រឹត្តខុស ជាមនុស្សសាហាវឃោរឃៅ ជាព្រះអម្ចាស់នៃភាពងងឹតដែលប្រើអំណាចរបស់ខ្លួនឯងមកលើពួកគេ។ អំពើបាបបានលាក់ខ្លួននៅក្នុងសំលៀកបំពាក់បរិសុទ្ធ។ នៅពេលដែលព្រះគម្ពីរខាងសាសនាត្រូវបានហាមឃាត់ ហើយមនុស្សបានលើកខ្លួនឯងជាធំ ជាព្រះអាទិទេពយើងត្រូវតែមើលទៅការក្លែងបន្លំ ការបោកប្រាស់ ហើយនិងអំពើទុច្ចរិតដ៏ថោកទាប។ ការលើកតម្កើងច្បាប់និងប្រពៃណីរបស់មនុស្ស គឺជាការបង្ហាញឱ្យឃើញយ៉ាងច្បាស់នូវការពុករលួយ (មិនបរិសុទ្ធ) ជាលទ្ធផលនៃការលុបបំបាត់ចោលនូវច្បាប់របស់ព្រះ ដែលមិនធ្លាប់កើតមានកន្លងមក។
អំណានព្រះគម្ពីរពេលល្ងាច៖ ទំនុកតម្កើង ជំពូក ១៩៩:១០៥-១២០
ខចងចាំ៖ គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្តាលឲ្យតែងទេ ក៏មានប្រយោជន៍សំរាប់ការបង្រៀន ការរំឭកឲ្យដឹងខ្លួន ការប្រដៅដំរង់ និងការបង្ហាត់ខាងឯសេចក្តីសុចរិត។ ធីម៉ូថេទី២ ៣:១៦
