ថ្ងៃសៅរ៍ ទី០៦ ខែសីហា ឆ្នាំ២០២២
អំណានព្រះគម្ពីរពេលព្រឹក៖ ព្រះយេហូវ៉ាទ្រង់មានព្រះបន្ទូលថា ឯងរាល់គ្នាជាស្មរបន្ទាល់របស់អញ ហើយជាអ្នកបំរើដែលអញបានរើសតាំង ដើម្បីឲ្យបានស្គាល់ ហើយជឿដល់អញ ព្រមទាំងយល់ថា គឺអញនេះហើយ ឥតមានព្រះណាកើតមកមុនអញទេ ហើយក្រោយអញក៏ឥតមានដែរ គឺអញ អញនេះហើយជាយេហូវ៉ា ក្រៅពីអញ គ្មានអ្នកសង្គ្រោះណាទៀតឡើយ។ អេសាយ ៤៣:១០-១១
អំណានប្រចាំថ្ងៃ
នៅក្នុងភាពងងឹតដែលគ្របដណ្តប់មកលើផែនដីអស់រយៈពេលដ៏យូរ ដែលគ្រប់គ្រងដោយអំណាចរបស់សម្តេចប៉ាបនោះ ពន្លឺនៃសេចក្តីពិតមិនបានរលត់ទាំងស្រុងទេ។ មានអ្នកធ្វើទីបន្ទាល់ពីព្រះនៅគ្រប់ជំនាន់ ហើយអ្នកទាំងនោះ ជាអ្នកមានជំនឿលើព្រះគ្រីស្ទយ៉ាងរឹងមាំ ថាទ្រង់គឺជា អ្នកសម្របសម្រួលតែមួយគត់ រវាងមនុស្សនិងព្រះជាអ្នកដែលយកព្រះគម្ពីរជាច្បាប់តែមួយគត់ក្នុងការរស់នៅ និងជាអ្នកលើកតម្កើងថ្ងៃសប្បាតហ៍ដ៏ពិត។ ពិភពលោកយើងសព្វថ្ងៃនេះគួរតែដឹងគុណដល់អ្នកទាំងនេះ ហើយ និងទង្វើរបស់គេ។ ប្រសិនបើគ្មានពួកគេទេ មនុស្សជំនាន់ក្រោយនឹងមិនដឹងពីសេចក្តីពិតឡើយ។ ពួកគេត្រូវបានគេចាត់ទុកថាជាពួកអ្នកទទឹងច្បាប់ ត្រូវបានគេទិតៀន ហើយមួលបង្កាច់។ ការសរសេរហើយនិងការបង្រៀន របស់ពួកគេ ត្រូវបានគេកៀបសង្កត់ ព្រមទាំងធ្វើឱ្យខុសពីការពិត។ ប៉ុន្តែ ទោះបីជាយ៉ាងណាក៏ដោយ ក៏ពួកគេនៅតែឈរយ៉ាងរឹងមាំដោយជំនឿ និង សេចក្តីសុចរិត ពីជំនាន់មួយ ទៅជំនាន់មួយ ដើម្បីជាកេរដំណែលដល់មនុស្សជំនាន់ក្រោយ។
សង្គ្រាមយ៉ាងជូរចត់បានវាយលុកទៅលើព្រះគម្ពីរ ហើយនៅពេលនោះមានព្រះគម្ពីរតិចតួចណាស់ ប៉ុន្តែ ទោះបីជាយ៉ាងណាក៏ដោយ ក៏ព្រះបានទ្រទ្រង់ព្រះបន្ទូលរបស់ទ្រង់មិនឱ្យគេបំផ្លាញទាំងស្រុងដែរ។ គេមិនអាចលាក់បាំងសេចក្តីពិតបានជារៀងរហូតឡើយ។ ព្រះទ្រង់អាចរំដោះព្រះបន្ទូលនៃជីវិតបានយ៉ាងស្រួល ដូចជាទ្រង់បានបើកទ្វារគុក ដើម្បីរំដោះអ្នកបំរើរបស់ទ្រង់ចេញដូច្នោះដែរ។ មនុស្សក្នុងបណ្តាប្រទេសនានា ក្នុងទ្វីបអឺរ៉ុបត្រូវបានព្រះវិញ្ញាណបណ្តាលឱ្យនាំគ្នាស្វែងយល់ពីព្រះបន្ទូលរបស់ព្រះ ដូចជាស្វែងរកកំណប់ដែលកប់ទុកដូច្នោះដែរ។ ព្រះបានបណ្តាល ហើយដឹកនាំគេឱ្យសិក្សាព្រះបន្ទូលដ៏បរិសុទ្ធ ហើយពួកគេបានសិក្សាយ៉ាងហ្មត់ចត់ និងយកចិត្តទុកដាក់ជាទីបំផុត មិនតែប៉ុណ្ណោះ ពួកគេសុខចិត្តទទួលយកពន្លឺដែលពួកគេរកឃីញ ទោះបីជាពួកគេត្រូវបាត់បង់អ្វីក៏ដោយ។ ទោះបីជានៅពេលនោះ ពួកគេមិនទាន់បានស្វែងយល់ពីគ្រប់ការទាំងអស់ក៏ដោយ ក៏ពួកគេអាចយល់ពីសេចក្តីពិត ពេលវេលាដែលព្រះគម្ពីរត្រូវតែបានបកប្រែជាភាសាផ្សេងៗ ហើយចែកចាយដល់មនុស្សនៅក្នុងទឹកដីនានា ជាភាសារបស់គេបានមកដល់។ ភាពងងឹតដូចពេលយប់កណ្តាល អធ្រាត្រនៃពិភព លោកនេះ បានមកដល់ទីបញ្ចប់ ហើយពន្លឺក៏បានចូលមកជំនួសវិញ។
អំណានព្រះគម្ពីរពេលល្ងាច៖ ទំនុកតម្កើង ជំពូក ១១៩:១៥៣-១៦៨
ខចងចាំ៖ គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្តាលឲ្យតែងទេ ក៏មានប្រយោជន៍សំរាប់ការបង្រៀន ការរំឭកឲ្យដឹងខ្លួន ការប្រដៅដំរង់ និងការបង្ហាត់ខាងឯសេចក្តីសុចរិត។ ធីម៉ូថេទី២ ៣:១៦
