ថ្ងៃអាទិត្យ ទី០៧ ខែសីហា ឆ្នាំ២០២២
អំណានព្រះគម្ពីរពេលព្រឹក៖ ឯអ្នកណាដែលមានព្រះរាជបុត្រា នោះក៏មានជីវិតដែរ តែអ្នកណាដែលគ្មានព្រះរាជបុត្រានៃព្រះទេ នោះគ្មានជីវិតឡើយ។ ខ្ញុំបានសរសេរសេចក្តីទាំងនេះ ផ្ញើមកអ្នករាល់គ្នា ដែលជឿដល់ព្រះនាមព្រះរាជបុត្រានៃព្រះ ដើម្បីឲ្យអ្នករាល់គ្នាបានដឹងថា អ្នករាល់គ្នាមានជីវិតអស់កល្បជានិច្ចហើយ។ យ៉ូហានទី១ ៥:១២-១៣
អំណានប្រចាំថ្ងៃ ភាពបរិសុទ្ធនៃថ្ងៃសប្បាតហ៍ត្រូវបានជំនួសដោយថ្ងៃអាទិត្យ «ផ្កាយព្រឹក (ដើមកំណើត) នៃអ្នកកែទម្រង់»
នាសតវត្សរ៍ទី ១៤ នៅប្រទេសអង់គ្លេសមាន «ផ្កាយព្រឹកនៃការកែទម្រង់» (អ្នកបដិវត្តន៍សាសនាដំបូង) ម្នាក់បានកើតឡើង។ លោក ចន វីគ្លីហ្វ (John Wycliffe)។ មិនមែនគ្រាន់តែជាអ្នកកែទម្រង់ដំបូង នៅប្រទេសអង់គ្លេសតែមួយប៉ុណ្ណោះទេ ប៉ុន្តែនៅក្នុងពិភពគ្រីស្ទសាសនាទាំងមូលតែម្តង។
ព្រះជាម្ចាស់បានទតឃើញាថា វាជាការប្រពៃណាស់ដែលផ្ទុកផ្តាក់ការងារកែទម្រង់ដល់អ្នកដែលមានការចេះដឹងខ្ពស់ និងមានភាពសុចរិត និងភាពថ្លៃថ្នូរចំពោះការងាររបស់ខ្លួនដ្បិតធ្វើដូច្នេះ នឹងធ្វើឱ្យពួកអ្នកដែលប្រឆាំងមានការកោតក្រែង ហើយក៏ដើម្បីការពារមិនឱ្យអ្នកដែលប្រឆាំងនឹងសេចក្តីពិត ចោទប្រកាន់ ឬសើចចំអកដាក់ ការតស៊ូមតិ ពីសេចក្តីពិតនោះបាន។
នៅពេលដែល ចន វីគ្លីហ្វ បានសិក្សានិងស្វែងយល់ពីអ្វីដែលគាត់បានរៀននៅឯសាលា រួចហើយគាត់ក៏បានធ្វើការសិក្សាបន្ថែមទៀតទៅលើព្រះគម្ពីររបស់ព្រះ។ នៅក្នុងការសិក្សាព្រះគម្ពីរនោះគាត់បានយល់ឃើញថាអ្វីដែលគាត់ធ្លាប់បានយល់ឃើញថាត្រូវពីមុនមកនោះសុទ្ធតែខុសទាំងអស់។ តាមរយៈការសិក្សាព្រះគម្ពីរ គាត់បានដឹង និងឃើញពីផែនការនៃសេចក្តីសង្គ្រោះរបស់ព្រះ ហើយមានតែព្រះគ្រីស្ទមួយអង្គប៉ុណ្ណោះដែលជាអ្នកការពារយើង។ គាត់បានយល់ឃើញថា ពួកជំនុំរ៉ូមបានបោះបង់ចោលមាគា៌របស់ព្រះគម្ពីរ ហើយក្រោយមក គាត់ក៏បានថ្វាយជីវិតរបស់គាត់ ហើយប្តេជ្ញាថានឹងបំរើព្រះ និងប្រកាសប្រាប់ដល់មនុស្សដទៃ ពីសេចក្តីពិត ដែលគាត់បានស្វែងយល់ឃើញនោះ។
ភារកិច្ចចំបងរបស់គាត់ គឺការបកប្រែព្រះគម្ពីរទាំងមូល ជាភាសាអង់គ្លេស ហើយនេះគឺជាព្រះគម្ពីរភាសាអង់គ្លេសដំបូងបង្អស់ដែលបានបកប្រែ។ នៅជំនាន់នោះ ការបោះពុម្ពជាសៀវភៅមិនទាន់មាននៅឡើយទេ ដូច្នេះ ការចម្លងព្រះគម្ពីរមានការយឺតយ៉ាវ ហើយហ្មត់ចត់ជាទីបំផុត។ ប៉ុន្តែ ទោះបីជាយ៉ាងណាក៏ដោយ ក៏ព្រះគម្ពីរនៅតែ ត្រូវបានគេចម្លង ហើយជនជាតិអង់គ្លេសក៏បានអានព្រះគម្ពីរជាភាសារបស់គេផ្ទាល់ ពន្លឺនៃព្រះបន្ទូលរបស់ព្រះក៏បាន ចែងចាំងនៅក្នុងទីងងឹត។ ព្រះជាម្ចាស់ទ្រង់បានរៀបចំការទាំងនេះសម្រាប់ការកែទម្រង់ដ៏ធំ។ ការអំពាវនាវឱ្យមនុស្សស្វែងរកហេតុផល បានធ្វើឱ្យពួកគេងើបឡើងប្រឆាំងនឹងការចុះចូល និងស្តាប់បង្គាប់ ដល់ការបង្រៀនរបស់សម្តេចប៉ាប។ កាលពីមុន មានតែអ្នកដែលមានឋានៈខ្ពស់ប៉ុណ្ណោះ ដែលមានសិទ្ធិអាចមានព្រះគម្ពីរ ដ្បិតព្រះគម្ពីរត្រូវបានគេសរសេរជាភាសាឡាតាំង។ តែនៅពេលនេះ ចន វីគ្លីហ្វ បានបង្រៀនពីគោលការកែទម្រង់ពីការសង្គ្រោះតាមរយៈសេចក្តីជំនឿលើព្រះយេស៊ូវគ្រីស្ទ និងពីការទទួលជឿលើព្រះគម្ពីរតែមួយគត់។ មានសង្ឃជាច្រើនបានចូលរួមជាមួយ ចន វីគ្លីហ្វ ហើយបានធ្វើការចែកចាយព្រះគម្ពីរ ព្រមទាំងបង្រៀនពីដំណឹងល្អ។ ការបង្រៀននោះ មានឥទ្ធិពលរហូតធ្វើឱ្យមានមនុស្សជាងពាក់កណ្តាលនៃប្រទេសអង់គ្លេសបានទទួលជឿ ហើយក៏បានធ្វើឱ្យអាណាចក្រដ៏ងងឹតនេះមានភាពរំជើបរំជួលយ៉ាងក្រៃលែង។
ការព្យាយាមប៉ុនប៉ងរបស់សត្រូវ ក្នុងការសម្លាប់គាត់ ដើម្បីបញ្ឈប់កិច្ចការរបស់គាត់នោះមិនបានជោគជ័យឡើយ។ នៅពេលដែល ចន វីគ្លីហ្វ មានអាយុបាន ៦១ឆ្នាំ គាត់បានស្លាប់ដោយសុខសាន្ត នៅក្នុងឋានៈជាអ្នកបំរើរបស់ព្រះ។
អំណានព្រះគម្ពីរពេលល្ងាច៖ ទំនុកតម្កើង ជំពូក ១១៩:១៦៩-១៧៦
ខចងចាំ៖ ចូរឲ្យនឹកចាំពីថ្ងៃឈប់សំរាក ដើម្បីញែកថ្ងៃនោះចេញជាបរិសុទ្ធ ក្នុងរវាង៦ថ្ងៃ នោះត្រូវឲ្យឯងធ្វើអស់ទាំងការរបស់ឯងចុះ តែឯថ្ងៃទី៧ នោះគឺជាថ្ងៃឈប់សំរាកថ្វាយព្រះយេហូវ៉ាជាព្រះនៃឯងវិញ នៅថ្ងៃនោះមិនត្រូវធ្វើអ្វីឲ្យសោះ ទោះខ្លួនឯងឬកូនប្រុសកូនស្រីឯងក្តី ទោះបាវប្រុស ឬបាវស្រីឯងក្តី ទោះសត្វរបស់ឯង ឬអ្នកដទៃដែលនៅផ្ទះឯងក្តី ដ្បិតក្នុង៦ថ្ងៃព្រះយេហូវ៉ាទ្រង់បានធ្វើផ្ទៃមេឃ ផែនដី ហើយនឹងសមុទ្រ ព្រមទាំងរបស់សព្វសារពើនៅស្ថានទាំងនោះដែរ រួចដល់ថ្ងៃទី៧ ទ្រង់ឈប់សំរាក ហេតុនោះបានជាព្រះយេហូវ៉ាទ្រង់បានប្រទានពរដល់ថ្ងៃឈប់សំរាក ហើយក៏ញែកចេញជាបរិសុទ្ធ។ និក្ខមនំ ២០:៨-១១
