ថ្ងៃព្រហស្បតិ៍ ទី០១ ខែកញ្ញា ឆ្នាំ២០២២
អំណានព្រះគម្ពីរពេលព្រឹក៖ ហើយយើងខ្ញុំមានពាក្យទំនាយដ៏ពិតជាង ដែលគួរឲ្យអ្នករាល់គ្នាយកចិត្តទុកដាក់តាម ដូចជាតាមចង្កៀងដែលភ្លឺក្នុងទីងងឹត ទាល់តែថ្ងៃភ្លឺឡើង ហើយផ្កាយព្រឹករះឡើងក្នុងចិត្តអ្នករាល់គ្នា។ ពេត្រុសទី២ ១:១៩
អំណានប្រចាំថ្ងៃ ពេលវេលានៃការរង់ចាំ
ចាប់តាំងពីការច្រានចោលនូវសារទីមួយមក ការផ្លាស់ប្តូរដ៏ក្រៀមក្រំមួយបានកើតឡើងនៅក្នុងពួកជំនុំ។ នៅពេលដែលសេចក្តីពិតត្រូវបានគេទាត់ចោល សេចក្តីខុសឆ្គងត្រូវបានគេទទួលយក និងបានជាទីស្រឡាញ់របស់គេ។ សេចក្តីស្រឡាញ់ចំពោះព្រះ និងសេចក្តីជំនឿទៅលើព្រះបន្ទូលរបស់ទ្រង់ត្រូវបានធ្លាក់ចុះ។ ពួកជំនុំបានធ្វើឱ្យព្រះវិញ្ញាណរបស់ព្រះកើតទុក្ខ ហើយព្រះបានដកយកព្រះវិញ្ញាណបរិសុទ្ធចេញពីពួកជំនុំ។
ខណៈដែលឆ្នាំ ១៨៤៣ បានកន្លងផុតទៅទាំងស្រុង ដោយមិនឃើញមានការយាងមកវិញរបស់ព្រះយេស៊ូវ អស់អ្នកដែលបានរង់ចាំការលេចមករបស់ទ្រង់ដោយសេចក្តីជំនឿ មានការសង្ស័យនិងមានភាពអល់អែក។ ប៉ុន្តែ ថ្វីបើមានការខកចិត្តក៏ដោយ ក៏មនុស្សជាច្រើននៅតែបន្តស្រាវជ្រាវព្រះគម្ពីរ ដោយពិនិត្យសាជាថ្មីរកភស្តុតាងនៃសេចក្តីជំនឿរបស់គេ ហើយគេបានសិក្សាពីបទទំនាយ ដោយយកចិត្តទុកដាក់ ដើម្បីទទួលពន្លឺបន្ថែមទៀត។ ការគាំទ្រដល់តំណែងរបស់ពួកគេពីទីបន្ទាល់នៃព្រះគម្ពីរ មើលទៅហាក់បីដូចជាច្បាស់លាស់ ហើយប្រាកដប្រជាឥតសង្ស័យ។ សញ្ញាទាំងប៉ុន្មាន ដែលមិនអាចច្រឡំនោះ បានចង្អុលប្រាប់ពីការយាងមករបស់ព្រះគ្រីស្ទ កាន់តែជិតមកដល់ហើយ។ ពួកអ្នកជឿមិនអាចពន្យល់អំពីការខកចិត្តរបស់ពួកគេបានទេ ប៉ុន្តែពួកគេបានដឹងច្បាស់ថាព្រះបានដឹកនាំគេ នៅក្នុងបទពិសោធន៍របស់ពួកគេកន្លងមកនេះ។
សេចក្តីជំនឿរបស់ពួកគេកាន់តែរឹងមាំឡើង ដោយការខំប្រឹងសំភីសិក្សាព្រះគម្ពីរ ដែលប្រាប់ឱ្យដឹងអំពីការពន្យារពេល។ នៅដើមឆ្នាំ ១៨៤២ ព្រះវិញ្ញាណរបស់ព្រះបានបណ្តាលចិត្តលោក ឆាល ហ្វីច (Charles Fittch) ឱ្យបែងចែកតារាងនៃបទទំនាយ ដែលពួកអាត់វេនទីស្ទចាត់ទុកថាជាការសម្រេចតាមការបង្គាប់របស់ហោរាហាបាគុកឱ្យ «កត់ការជាក់ស្តែងនេះទុក ត្រូវឱ្យចារិកឱ្យច្បាស់នៅលើក្តារចុះ»។ ទោះជាយ៉ាងនេះក៏ដោយ ក៏គ្មានអ្នកណាបានឃើញការពន្យារពេលបានកើតឡើងនៅក្នុងបទទំនាយដដែលនោះដែរ។ បន្ទាប់ពីការខកចិត្តមក អត្ថន័យនៃបទគម្ពីរនេះបានលេចរូបរាងឡើងយ៉ាងច្បាស់។ ហោរាបានចែងថា «ដ្បិតការជាក់ស្តែងនេះទុកសម្រាប់ដល់វេលា កំណត់ ក៏កំពុងស្រូតឱ្យដល់ពេលនោះ ហើយនៅគ្រានោះនឹងមិនកុហកទេ បើសិនជាបង្អង់យូរ ក៏ចូររង់ចាំចុះ ដ្បិតនឹងមកជាពិតឥតរារង់ឡើយ» ( ហាបាគុក ២:២-៣)។
ពួកអ្នកដែលកំពុងតែរង់ចាំមានក្តីអំណរជាខ្លាំង ដោយព្រះដែលជ្រាបពីចុងបញ្ចប់ តាំងពីការចាប់ផ្តើម ទ្រង់បានទតមើលមកមនុស្សគ្រប់សម័យកាល ព្រះអង្គបានទតឃើញជាមុននូវការខកចិត្តរបស់ពួកគេ ហើយទ្រង់បានប្រទាននូវព្រះបន្ទូលទាំងឡាយនៃការលើកទឹកចិត្តនិងសេចក្តីសង្ឃឹមដល់ពួកគេ។
អំណានព្រះគម្ពីរពេលល្ងាច៖ ដានីយ៉ែល ជំពូក ១០
ខចងចាំ៖ ទំាងរង់ចាំសេចក្តីសង្ឃឹមដ៏មានពរ គឺឲ្យបានឃើញដំណើរលេចមកនៃសិរីល្អរបស់ព្រះដ៏ជាធំ និងព្រះយេស៊ូវគ្រីស្ទ ជាព្រះអង្គសង្គ្រោះនៃយើង។ ទីតុស ២:១៣
