ថ្ងៃអាទិត្យ ទី១១ ខែកញ្ញា ឆ្នាំ២០២២
អំណានព្រះគម្ពីរពេលព្រឹក៖ ដូច្នេះ ចូរប្រែចិត្ត ហើយវិលមកចុះ ដើម្បីឲ្យបាបរបស់អ្នករាល់គ្នាបានលុបចេញ ប្រយោជន៍ឲ្យមានពេលលំហើយ មកពីចំពោះព្រះអម្ចាស់។ កិច្ចការ ៣:១៩
អំណានប្រចាំថ្ងៃ ការសំអាតទីបរិសុទ្ធ
ដូចជាអំពើបាបរបស់មនុស្សពីបុរាណត្រូវបានសំអាត ហើយផ្ទេរដាក់ទៅក្នុងទីបរិសុទ្ធនៅផែនដីដោយសារឈាមរបស់សត្វដែលបានថ្វាយជាតង្វាយលោះបាប ជានិមិត្តរូបនោះ អំពើបាបរបស់យើងក៏ត្រូវបានផ្ទេរទៅកាន់ទីបរិសុទ្ធនៅស្ថានសួគ៌ តាមរយៈព្រះលោហិតរបស់ព្រះយេស៊ូវគ្រីស្ទ ជាការពិតដែរ។ ដូចដែលការសំអាតទីបរិសុទ្ធនៅលើផែនដីត្រូវបានអនុវត្តដោយការយកអំពើបាបចេញពីទីបរិសុទ្ធនោះ នៅស្ថានសួគ៌ក៏ត្រូវបានធ្វើដូចគ្នានេះដែរ គឺព្រះជាម្ចាស់បានយកអំពើបាបដែលបានកត់ត្រានៅក្នុងទីបរិសុទ្ធចេញ។ នេះគឺជាការចាំបាច់មួយដែលព្រះបានធ្វើ គឺទ្រង់បានពិនិត្យ សៀវភៅកំណត់ត្រា (បញ្ជីជីវិត) ដើម្បីរកអ្នកដែលបានលន់តួបាបរបស់ខ្លួន តាមរយៈជំនឿលើព្រះគ្រីស្ទ ឱ្យគេទទួលរង្វាន់នៅពេលដែលទ្រង់ធ្វើការជំនុំជំរះអំពើបាប។ ដូច្នេះ ការសំអាតទីបរិសុទ្ធ គឺជាការពិនិត្យអង្កេត ដើម្បីធ្វើការជំនុំជំរះ ហើយការនេះត្រូវតែធ្វើឡើងមុនពេលដែលព្រះគ្រីស្ទ យាងមក ដើម្បីនឹងសង្គ្រោះ និងធ្វើការជំនុំជំរះ។ ដ្បិតនៅពេលដែលទ្រង់យាងមក នោះទ្រង់នឹងយករង្វាន់មកជាមួយ ដើម្បីប្រទានឱ្យដល់អស់អ្នកដែលទ្រង់រាប់ជាសុចរិត វិវរណៈ ២២:១២។ ដូច្នេះ អស់អ្នកដែលបានតាមដានពន្លឺនាំមុខនៃព្រះបន្ទូលក្នុងបទទំនាយនេះ បានយល់ឃើញថា ថ្ងៃផុតកំណត់នៃរយៈពេល ២៣០០ ថ្ងៃ នាឆ្នាំ ១៨៤៤ នោះ មិនមែនជាថ្ងៃដែលព្រះគ្រីស្ទយាងមកកាន់ផែនដីនេះទេ ផ្ទុយទៅវិញ គឺទ្រង់បានយាងចូលទៅក្នុងទីបរិសុទ្ធបំផុត នៃទីបរិសុទ្ធនៅស្ថានសួគ៌ទេ គឺចូលទៅចំពោះព្រះភ្រក្តរបស់ព្រះវរបិតា ដើម្បីបំពេញកិច្ចចុងបញ្ចប់ជាការរៀបចំការយាងមកកាន់ផែនដីវិញរបស់ទ្រង់។
អំណានព្រះគម្ពីរពេលល្ងាច៖ ហេព្រើរ ជំពូក ៩:២៣-២៨
ខចងចាំ៖ ដូច្នេះ ដែលមានសំដេចសង្ឃយ៉ាងធំ១អង្គ ដែលទ្រង់បានយាងកាត់អស់ទាំងជាន់ស្ថានសួគ៌ គឺព្រះយេស៊ូវជាព្រះរាជបុត្រានៃព្រះ នោះត្រូវតែឲ្យយើងមានចិត្តដាច់ស្រឡះនឹងជឿតាមចុះ ដ្បិតសំដេចសង្ឃនៃយើង ទ្រង់មិនមែនមិនអាចនឹងអាណិតអាសូរ ដល់សេចក្តីកំសោយរបស់យើងរាល់គ្នានោះទេ ព្រោះទ្រង់បានត្រូវសេចក្តីល្បួងគ្រប់យ៉ាង ដូចជាយើងរាល់គ្នាដែរ តែឥតធ្វើបាបឡើយ ដូច្នេះ ត្រូវឲ្យយើងរាល់គ្នា មកដល់បល្ល័ង្កនៃព្រះគុណ ដោយក្លាហាន ដើម្បីនឹងទទួលសេចក្តីមេត្តា ហើយរកបានព្រះគុណសំរាប់នឹងជួយដល់ពេលត្រូវការចុះ។ ហេព្រើរ ៤:១៤-១៦
