ថ្ងៃអាទិត្យ ទី១៨ ខែកញ្ញា ឆ្នាំ២០២២
អំណានព្រះគម្ពីរពេលព្រឹក៖ តើអ្នកណានឹងកាត់ទោសគេបាន ដ្បិតព្រះគ្រីស្ទទ្រង់បានសុគតជំនួសគេហើយ តែដែលថា ទ្រង់រស់ឡើងវិញ នោះមានទំនងជាងទ្រង់ក៏គង់នៅខាងស្តាំនៃព្រះ ហើយជាអ្នកអង្វរជំនួសយើងរាល់គ្នាដែរ។ រ៉ូម ៨:៣៤
អំណានប្រចាំថ្ងៃ បទពិសោធន៍របស់ពួកយូដាបានកើតឡើងម្តងទៀត
ទេវតាបានបង្ហាញខ្ញុំត្រឡប់ទៅការប្រកាសពីការយាងមកលើកទី១របស់ព្រះគ្រីស្ទ។ ព្រះបានចាត់លោកយ៉ូហានមកដោយវិញ្ញាណនិងអំណាចរបស់លោកអេលីយ៉ា ដើម្បីរៀបចំផ្លូវថ្វាយព្រះយេស៊ូវ។ អ្នកដែលបដិសេធដំណឹងរបស់លោកយ៉ូហាន នឹងមិនបានទទួលផលប្រយោជន៍ពីការបង្រៀនរបស់ព្រះយេស៊ូវឡើយ។ ការប្រឆាំងរបស់គេទៅនឹងការប្រកាសឱ្យដឹងជាមុនពីការយាងមករបស់ទ្រង់បានកំណត់ថា គេពិតជានឹងមិនមានភស្តុតាងដ៏ធំបំផុត ដែលបញ្ជាក់ថា ទ្រង់ជាព្រះមែស្ស៊ីឡើយ។ សាតាំងបានដឹកនាំអ្នកដែលបដិសេធដំណឹងរបស់លោកយ៉ូហានឱ្យបន្តទៅមុខទៀត រហូតបដិសេធព្រះយេស៊ូវ ហើយឆ្កាងទ្រង់។ ដោយការធ្វើដូច្នេះ ពួកគេបានដាក់ខ្លួនគេនៅកន្លែងដែលគេមិនអាចទទួលព្រះពរនៅថ្ងៃបុណ្យទី៥០ (ប៉ង់តាកុស) ដែលបានបង្រៀនគេពីវិធីចូលទៅក្នុងទីបរិសុទ្ធនៃស្ថានសួគ៌។
ការរហែកនៃវាំងននក្នុងព្រះវិហារបង្ហាញថា ព្រះលែងទទួលយញ្ញបូជានិងបញ្ញត្តិរបស់ពួកយូដាតទៅទៀតហើយ។ ការថ្វាយតង្វាយដុតដ៏ធំត្រូវបានថ្វាយរួចហើយ ហើយត្រូវបានព្រះទទួលយកផង រួចព្រះវិញ្ញាណបរិសុទ្ធដែលបានយាងចុះមកនៅថ្ងៃបុណ្យទី៥០ បាននាំគំនិតរបស់ពួកសាវកពីទីបរិសុទ្ធនៅផែនដី ទៅទីបរិសុទ្ធនៃស្ថានសួគ៌ ដែលព្រះយេស៊ូវបានយាងចូល ដោយព្រះលោហិតរបស់ទ្រង់ ដើម្បីខ្ចាយមកលើពួកសាវក នូវប្រយោជន៍នៃការប្រោសលោះរបស់ទ្រង់ ឱ្យធួននឹងបាបមនុស្សលោក។ ប៉ុន្តែ ពួកយូដាបានស្ថិតនៅក្នុងភាពងងឹតសូនឈឹង។ គេបានបាត់បង់ពន្លឺដែលពួកគេមាន ស្តីអំពីផែនការនៃការសង្គ្រោះ ហើយគេនៅតែទុកចិត្តលើយញ្ញបូជានិងតង្វាយឥតប្រយោជន៍របស់គេតទៅទៀតដដែល។ ទីបរិសុទ្ធនៅស្ថានសួគ៌បានជំនួសទីបរិសុទ្ធនៅផែនដីហើយ តែគេមិនបានដឹងពីការផ្លាស់ប្តូរនេះឡើយ។ ហេតុដូច្នេះហើយ ពួកគេមិនបានទទួលប្រយោជន៍ពីការសុំអង្វរករព្រះវរបិតារបស់ព្រះយេស៊ូវ ជំនួសមនុស្សលោក នៅទីបរិសុទ្ធឡើយ។
អំណានព្រះគម្ពីរពេលល្ងាច៖ ហេព្រើរ ជំពូក ៧:២៣-២៦
ខចងចាំ៖ ដូច្នេះ ចូរប្រែចិត្ត ហើយវិលមកចុះ ដើម្បីឲ្យបាបរបស់អ្នករាល់គ្នាបានលុបចេញ ប្រយោជន៍ឲ្យមានពេលលំហើយ មកពីចំពោះព្រះអម្ចាស់។ កិច្ចការ ៣:១៩
