ថ្ងៃសុក្រ ទី០២ ខែកញ្ញា ឆ្នាំ២០២២
អំណានព្រះគម្ពីរពេលព្រឹក៖ នោះខ្ញុំមិនដែលលែងអរព្រះគុណ ដោយព្រោះអ្នករាល់គ្នាឡើយ គឺខ្ញុំតែងដំណាលពីអ្នករាល់គ្នា ក្នុងសេចក្តីអធិស្ឋានរបស់ខ្ញុំវិញ ដើម្បីនឹងសូមឲ្យព្រះនៃព្រះយេស៊ូវគ្រីស្ទ ជាព្រះអម្ចាស់នៃយើង គឺជាព្រះវរបិតាដ៏មានសិរីល្អ បានប្រទានឲ្យអ្នករាល់គ្នាបានព្រះវិញ្ញាណ ដែលប្រោសឲ្យមានប្រាជ្ញា ហើយក៏បើកសំដែង ឲ្យដឹងពីដំណើរស្គាល់ទ្រង់ ដើម្បីឲ្យភ្នែកចិត្តរបស់អ្នករាល់គ្នា បានភ្លឺឡើងប្រយោជន៍ឲ្យបានដឹងថា ដែលទ្រង់ហៅអ្នករាល់គ្នា នោះមានសេចក្តីសង្ឃឹមជាយ៉ាងណា ហើយថា សិរីល្អដ៏ប្រសើរក្រៃលែងនៃមរដកទ្រង់ ក្នុងពួកបរិសុទ្ធជាយ៉ាងណាផង ។ អេភេសូរ ១:១៦-១៨
អំណានប្រចាំថ្ងៃ ការរីកចម្រើនខាងភាពជ្រុលនិយម
នៅក្នុងរឿងប្រៀបប្រដូចអំពីស្ត្រីព្រហ្មចារី ១០នាក់ ក្នុងគម្ពីរម៉ាថាយ ជំពូក ២៥ បទពិសោធន៍ នៃពួកអ្នកអាត់វេនទីស្ទត្រូវបានពន្យល់បកស្រាយអត្ថន័យដោយអាពាហ៍ពិពាហ៍នៅបូព៌ាប្រទេស។ «គ្រានោះ នគរស្ថានសួគ៌នឹងបានដូចជាស្រីព្រហ្មចារី១០នាក់ ដែលយកចង្កៀងរៀងខ្លួនចេញទៅទទួលប្តីថ្មោងថ្មី»។ «តែដោយព្រោះប្តីក្រមកពេក បានជានាងទាំងនោះងោកងុយ ហើយដេកលក់ទៅ»។
ចលនាដ៏ធំនៅក្រោមការប្រកាសផ្សាយសារទីមួយ ស្របគ្នាទៅនឹងការចេញទៅរបស់ស្ត្រីព្រហ្មចារីទាំងអស់នោះ នៅពេលដែលគេរង់ចាំបានកន្លងផុតទៅការខកចិត្ត ហើយនិងការពន្យារពេល (មិនទាន់ឃើញព្រះយេស៊ូវយាងមក) តំណាងឱ្យការក្រមកដល់របស់កូនកម្លោះ។ បន្ទាប់ពី ពេលវេលាដ៏ជាក់លាក់នោះបានកន្លងផុតទៅ ពួកអ្នកជឿដ៏ស្មោះត្រង់នៅតែជឿថាទីបញ្ចប់នៃអ្វីៗទាំងអស់បានមកដល់ហើយ ប៉ុន្តែមិនយូរប៉ុន្មាន រឿងនោះក៏បានប្រែក្លាយទៅជាភស្តុតាងបញ្ជាក់ថា ពួកគេកំពុងតែលែងស្មោះស្ម័គ្រចំពោះព្រះរបស់គេ ហើយកំពុងតែធ្លាក់ចូលទៅក្នុងការដេកលក់របស់កូនក្រមុំ នៅក្នុងរឿងប្រៀបប្រដូច នៅពេលដែលកូនកម្លោះក្រមក។
នៅម្តុំពេលនោះ ការបង្រៀនខុសពីព្រះគម្ពីរបានចាប់ផ្តើមកើតឡើង។ មនុស្សខ្លះដែលបានអះអាងថាជឿទៅលើសារនេះដោយស្មោះ និងថាជាអ្នកដែលព្រះវិញ្ញាណដឹកនាំ បានបោះបង់ចោលព្រះបន្ទូលរបស់ព្រះ ដែលជាអ្នកណែនាំផ្លូវយ៉ាងពិតប្រាកដ ដោយបានធ្វើតាមគំនិតនិងការស្រមើលស្រមៃរបស់ខ្លួន។
ការអធិប្បាយពីសារទីមួយ នៅឆ្នាំ ១៨៤៣ និងពីសម្រែកពាក់កណ្តាលអាធ្រាត្រ នៅឆ្នាំ ១៨៤៤ បានបង្ក្រាបគំនិតជ្រុលនិយម ហើយនិងការប្រឆាំងជំទាស់។ អស់អ្នកដែលបានចូលរួមក្នុងក្រុមអ្នករង់ចាំការយាងមកជាលើកទីពីរយ៉ាងហ្មត់ចត់នេះ គេមានចិត្តស្រុះស្រួលគ្នា គេមានចិត្តពេញទៅដោយសេចក្តីស្រឡាញ់ដល់គ្នាទៅវិញទៅមក និងស្រឡាញ់ដល់ព្រះយេស៊ូវដែលពួកគេបានសង្ឃឹមថានឹងបានជួបទ្រង់នៅពេលឆាប់ៗនេះ។ សេចក្តីជំនឿស្ម័គ្រស្មោះ សេចក្តីសង្ឃឹមដ៏មានពរ បានលើកពួកគេឡើងខ្ពស់ហួសពីការគ្រប់គ្រងនៃឥទ្ធិពលរបស់មនុស្ស ហើយបានធ្វើជាខែលប្រឆាំងទល់នឹងការវាយប្រហាររបស់សាតាំង។
អំណានព្រះគម្ពីរពេលល្ងាច៖ ម៉ាថាយ ជំពូក ២៥:១-២៩
ខចងចាំ៖ ទំាងរង់ចាំសេចក្តីសង្ឃឹមដ៏មានពរ គឺឲ្យបានឃើញដំណើរលេចមកនៃសិរីល្អរបស់ព្រះដ៏ជាធំ និងព្រះយេស៊ូវគ្រីស្ទ ជាព្រះអង្គសង្គ្រោះនៃយើង។ ទីតុស ២:១៣
