ថ្ងៃសៅរ៍ ទី២៤ ខែកញ្ញា ឆ្នាំ២០២២
អំណានព្រះគម្ពីរពេលព្រឹក៖ ដ្បិតមើល ថ្ងៃនោះកំពុងតែមកដល់ ថ្ងៃនោះឆេះធ្លោ ដូចជាគុកភ្លើង នោះអស់ពួកអ្នកឆ្មើងឆ្មៃ ហើយនឹងអស់ពួកអ្នកដែលប្រព្រឹត្តអំពើអាក្រក់ គេនឹងដូចជាជញ្ជ្រាំង ហើយថ្ងៃដែលត្រូវមកដល់នោះ នឹងឆេះបន្សុសគេទាំងអស់ទៅ ឥតទុកឲ្យគេមានឫស ឬមែកនៅសល់ឡើយ នេះហើយ ជាព្រះបន្ទូលរបស់ព្រះយេហូវ៉ា នៃពួកពលបរិវារ តែព្រះអាទិត្យ នៃសេចក្តីសុចរិតនឹងរះឡើង មានទាំងអំណាចប្រោសឲ្យជា នៅក្នុងចំអេងស្លាប សំរាប់ឯងរាល់គ្នាដែលកោតខ្លាចដល់ឈ្មោះអញ នោះឯងរាល់គ្នានឹងចេញទៅ លោតកព្ឆោងដូចជាកូនគោ ដែលលែងចេញពីក្រោល ហើយព្រះយេហូវ៉ានៃពួកពលបរិវារ ទ្រង់មានព្រះបន្ទូលថា នៅថ្ងៃដែលធ្វើការនោះ ឯងរាល់គ្នានឹងជាន់ឈ្លីពួកអាក្រក់បង់ ដ្បិតគេនឹងដូចជាផេះនៅក្រោមបាទជើងរបស់ឯងរាល់គ្នា។ ម៉ាឡាគី ៤:១-៣
អំណានប្រចាំថ្ងៃ៖ ទីបញ្ចប់នៃមនុស្សអាក្រក់
ខ្ញុំបានឃើញថាពួកទេវតារបស់ព្រះ មិនដែលគ្រប់គ្រងឆន្ទៈរបស់មនុស្សឡើយ។ ព្រះដាក់នៅពីមុខមនុស្សនូវសេចក្តីស្លាប់ ហើយនិងជីវិត។ មនុស្សអាចជ្រើសរើសដោយខ្លួនឯង។ មនុស្សជាច្រើនប្រាថ្នាចង់បានជីវិត ក៏ប៉ុន្តែ គេនៅតែបន្តដើរនៅក្នុងផ្លូវដ៏ធំទូលាយទៅរកសេចក្តីស្លាប់។ ពួកគេបែរទៅបះបោរប្រឆាំងនឹងការគ្រប់គ្រងរបស់ព្រះ ទោះបីជាទ្រង់មានសេចក្តីមេត្តាករុណា និងក្តីអាណិតអាសូរដ៏អស្ចារ្យ រហូតលះបង់ព្រះរាជបុត្រារបស់ទ្រង់ឱ្យមកសុគតជំនួសពួកគេក៏ដោយ។ អស់អ្នកដែលមិនព្រមទទួលយកសេចក្តីសង្គ្រោះ ដែលព្រះបានប្រទានដល់គេដោយក្តីស្រឡាញ់ ត្រូវតែទទួលទណ្ឌកម្ម។ ប៉ុន្តែ ខ្ញុំបានឃើញថាព្រះទ្រង់មិនបានចាក់សោទុកឱ្យពួកគេនៅក្នុងស្ថាននរក ឱ្យរងការឈឺចាប់យ៉ាងវេទនាគ្មានទីបញ្ចប់នោះឡើយ ហើយទ្រង់ក៏មិនបានយកពួកគេទ្បើងទៅស្ថានសួគ៌ ជាមួយក្រុមនៃពួកបរិសុទ្ធនោះដែរ ព្រោះពួកគេនឹងមិនអាចរស់នៅជាមួយនឹងអ្នកបរិសុទ្ធបានទេ។ ប៉ុន្តែ ព្រះទ្រង់នឹងបំផ្លាញពួកគេជាចុងបំផុត ហើយពួកគេនឹងមិនមានតទៅទៀតឡើយ។ ព្រះទ្រង់បានសូនមនុស្សមកពីធូលីដី ហើយអ្នកដែលមិនស្តាប់បង្គាប់និងអ្នកមិនបរិសុទ្ធ នឹងត្រូវបំផ្លាញដោយភ្លើង រួចគេនឹងត្រឡប់ទៅជាធូលីដីវិញ។ ខ្ញុំបានឃើញថា ភាពសប្បុរសនិងក្តីមេត្តាករុណារបស់ព្រះនៅក្នុងរឿងនេះ បានដឹកនាំអ្នកដែលកោតសរសើរដល់អត្តចរិតរបស់ទ្រង់ និងស្រឡាញ់ដល់ព្រះនាមដ៏បរិសុទ្ធរបស់ទ្រង់។ បន្ទាប់ពីពួកមនុស្សអាក្រក់ត្រូវបានបំផ្លាញអស់ពីដែនដីហើយនោះ ពួកពលបរិវារនៅស្ថានសួគ៌ នឹងពោលថា «អាម៉ែន»។
អំណានព្រះគម្ពីរពេលល្ងាច៖ ពេត្រុសទី២ ជំពូក ៣:១-១៣
ខចងចាំ៖ ដូច្នេះ ចូរប្រែចិត្ត ហើយវិលមកចុះ ដើម្បីឲ្យបាបរបស់អ្នករាល់គ្នាបានលុបចេញ ប្រយោជន៍ឲ្យមានពេលលំហើយ មកពីចំពោះព្រះអម្ចាស់។ កិច្ចការ ៣:១៩
