ថ្ងៃអាទិត្យ ទី០៤ ខែកញ្ញា ឆ្នាំ២០២២
អំណានព្រះគម្ពីរពេលព្រឹក៖ ដ្បិតអញនឹងចាក់ទឹកទៅលើអ្នកណាដែលកំពុងស្រេក ព្រមទាំងបង្ហូរទឹកទៅលើដីហួតហែងផង អញនឹងចាក់វិញ្ញាណអញទៅលើពូជពង្សរបស់ឯង ហើយពររបស់អញ ទៅលើកូនចៅរបស់ឯង។ អេសាយ ៤៤:៣
អំណានប្រចាំថ្ងៃ ការរៀបចំខ្លួនចាំជូបព្រះ
ការផ្សព្វផ្សាយអំពីការយាងមកវិញរបស់ព្រះយេស៊ូវ មកពេលឆាប់ៗនេះ នាំមកនូវការកែទម្រង់និងការភ្ញាក់រឭក។ ការនេះក៏ស្រដៀងគ្នាទៅនឹងការកែប្រែចិត្តហើយវិលត្រឡប់មករកព្រះវិញរបស់សាសន៍អ៊ីស្រាអែលពីបូរាណ នៅពេលដែលពួកហោរាប្រកាសសារនៃការស្តីបន្ទោសនោះដែរ។ពួកគេស្វែងរកព្រះដោយអស់ពីចិត្ត ដោយលន់តួបាបរបស់ពួកគេ ព្រមទាំងលះបង់ចោលផ្លូវលោកិយនេះ ថែមទៀតផង។ ការរៀបចំខ្លួនដើម្បីទទួលព្រះជាម្ចាស់របស់ពួកគេ គឺជាបន្ទុករបស់ពួកជំនុំស្មោះត្រង់ដែលព្យាយាមអធិស្ឋាន។ មានការអធិស្ឋានយ៉ាងស្វិតស្វាញ និងការអំពាវនាវរកព្រះយ៉ាងអស់ពីចិត្ត។
សម្រែកពាក់កណ្តាលអធ្រាត្រនោះ មិនសូវមានការប្រកែកគ្នាច្រើនប៉ុន្មានទេ ព្រោះព្រះគម្ពីរបានបញ្ជាក់យ៉ាងច្បាស់លាស់។ ជាមួយគ្នានោះ ហាក់បីដូចជាមានអំណាចអ្វីម្យ៉ាងដែលជួយជំរុញនិងដឹកនាំចិត្តមនុស្ស។ អស់អ្នកដែលទទួលជឿនោះគ្មានមន្ទិលសង្ស័យអ្វីសោះឡើយ។ នៅពេលដែលព្រះយេស៊ូវកំពុងតែយាងចូលទៅក្រុងយេរូសាឡិម ហ្វូងមនុស្សដែលបានមកប្រជុំគ្នា ពីគ្រប់ទិសទីបាននាំគ្នាមកឯភ្នំដើមអូលីវ ហើយខណៈដែលពួកគេនាំគ្នារួមដំណើរជាមួយទ្រង់នោះ ពួកគេបាននាំគ្នាបន្លឺឡើងថា «មានពរហើយ ដ្បិតទ្រង់បានយាងមកក្នុងព្រះនាមរបស់ព្រះជាម្ចាស់» ម៉ាថាយ ២១:៩។ ដូចគ្នានោះដែរ អស់អ្នកដែលមិនជឿនឹងនាំគ្នាមកមើលការប្រជុំរបស់អ្នកដែលកំពុងរង់ចាំទាំងនោះ ដោយមានអ្នកខ្លះពោរពេញទៅដោយការងឿងឆ្ងល់ ឯអ្នកខ្លះទៀតក៏គ្រាន់តែមកចំអកឱ្យប៉ុណ្ណោះ។ ប៉ុន្តែ ពួកគេទាំងនោះក៏នឹងឃើញអំណាចនៃការធ្វើឱ្យជឿ តាមរយៈសារដែលពួកគេបានឮទេវតាពោលថា «មើលន៎ កូនកំឡោះបានមកដល់ហើយ» នោះ។ នៅគ្រានោះ ព្រះបានឆ្លើយតបទៅនឹងការអធិស្ឋាន តាមរយៈសេចក្តីជំនឿរបស់ពួកគេ ហើយសេចក្តីជំនឿនោះ គឺជាសេចក្តីជំនឿដែលជារង្វាន់របស់ពួកគេ។ ព្រះវិញ្ញាណនៃព្រះគុណរបស់ព្រះជាម្ចាស់បានយាងមកសណ្ឋិតលើអ្នកដែលស្វែងរកទ្រង់ដោយជំនឿ ដូចជាភ្លៀងដែលធ្លាក់ស្រោចស្រពលើផែនដី ដែលប្រេះក្រហែងដូច្នោះដែរ។ អស់អ្នកដែលរំពឹងថានឹងបានឈរចំពោះព្រះភក្ត្ររបស់ព្រះជាម្ចាស់ មានពេញដោយក្តីអំណរដែលមិនអាចប្រៀបផ្ទឹមបាន។ ព្រះវិញ្ញាណបរិសុទ្ធដ៏ស្រទន់របស់ព្រះជាម្ចាស់បានបន្ទន់ចិត្តរបស់ពួកគេ សិរីរុងរឿងរបស់ព្រះ បានបក់មកលើរាស្ត្ររបស់ទ្រង់ ដែលពោរពេញទៅដោយជំនឿដូចជារលកសមុទ្រ ដែលបានបក់មកម្តងហើយម្តងទៀតដូច្នោះដែរ។
អំណានព្រះគម្ពីរពេលល្ងាច៖ របាក្សត្រទី២ ជំពូក ១៤
ខចងចាំ៖ ហើយយើងខ្ញុំមានពាក្យទំនាយដ៏ពិតជាង ដែលគួរឲ្យអ្នករាល់គ្នាយកចិត្តទុកដាក់តាម ដូចជាតាមចង្កៀងដែលភ្លឺក្នុងទីងងឹត ទាល់តែថ្ងៃភ្លឺឡើង ហើយផ្កាយព្រឹករះឡើងក្នុងចិត្តអ្នករាល់គ្នា។ េពត្រុសទី២ ១:១៩
