ថ្ងៃសុក្រ ទី៦ ខែមករា ឆ្នាំ២០២៣
អំណានព្រះគម្ពីរពេលព្រឹក៖ នោះព្រះយេស៊ូវទ្រង់មានព្រះបន្ទូលថា ទុកឲ្យកូនក្មេងមកឯខ្ញុំចុះ កុំឃាត់វាឡើយ ដ្បិតនគរស្ថានសួគ៌មានសុទ្ធតែមនុស្សដូចវារាល់គ្នា។ ម៉ាថាយ ១៩:១៤
អំណានប្រចាំថ្ងៃ៖ កុមារតូចៗអាចធ្វើជាគ្រីស្ទានបាន
កុមារដែលមានចរិតលក្ខណៈល្អបំផុតបានធំរីកចម្រើនឡើងនៅក្នុងបរិយាកាសធម្មជាតិសាមញ្ញមិនប៉ះពាល់ឬទទួលឥទ្ធិពលនៃអំពើបាបរបស់លោកិយនៅជុំវិញខ្លួនពួកគេ។ វាមិនមែនជារឿងល្អទេដែលគាំទ្រសេចក្តីអំនួតរបស់ក្មេងដោយបន្តសរសើរនូវអ្វីដែលពួកគេធ្វើ ហើយថាតាមពាក្យដែលពួកគេនិយាយនៅចំពោះមុខពួកគេ។ មិនត្រូវជម្រុញ ឬលើកទឹកចិត្តភាពអំនួតឬមោទនភាពដោយបន្តសរសើរពាក្យសម្តីកាយវិការរបស់ពួកគេ ឬក៏ពួកគេស្អាតយ៉ាងណានោះទេ។ ពួកគេក៏មិនត្រូវស្លៀកសម្លៀកបំពាក់ណាដែលថ្លៃឬឆើតឆាយដែរ។ ធ្វើបែបនេះនាំឲ្យពួកគេមានអំនួត ហើយនាំឲ្យពួកគេមានចិត្តច្រណែនឈ្នានីសនឹងមិត្តភក្តិរបស់ពួកគេ។
ត្រូវអប់រំបង្រៀនកុមារតូចៗតាមរបៀបងាយៗឲ្យសមទៅតាមអាយុរបស់ពួកគេ។ ត្រូវបង្ហាត់បង្រៀនពួកគេឲ្យចេះជួយការងារតូចតាចដោយពេញចិត្តនិងសប្បាយរីករាយ ហើយនឹងមានបទពិសោធន៍សមទៅតាមអាយុរបស់ពួកគេ។ នៅក្នុងរឿងប្រៀបប្រដូចស្លឹកដំបូងតំណាងឲ្យវ័យកុមារ ហើយនោះគឺជាស្លឹកដំបូងដែលមានសម្រស់ស្រស់ស្អាតពិសេសរបស់ខ្លួន។ មិនត្រូវបង្ខំកុមារឲ្យឆាប់ធំពេញវ័យទេ តែត្រូវទុកឲ្យពួកគេធំទៅតាមធម្មជាតិរបស់ពួកគេឲ្យពួកគេមានភាពស្រស់បំព្រងនិងសក្តិសមទៅនឹងវ័យកុមាររបស់ពួកគេ។
កុមារតូចៗអាចជាគ្រីស្ទានមានសេចក្តីជំនឿនិងបទពិសោធន៍សមទៅតាមអាយុកាលរបស់ពួកគេ។ ទាំងអស់នេះគឺជាអ្វីដែលព្រះជាម្ចាស់រំពឹងចង់ឃើញពួកគេ។ កុមារត្រូវការ ការបង្រៀនអប់រំខាងព្រលឹងវិញ្ញាណ ហើយឪពុកម្តាយត្រូវផ្តល់ឱកាសឲ្យពួកគេរៀបចំបង្កើតអត្តចរិតឲ្យដូចជាព្រះយេស៊ូវ។
អំណានព្រះគម្ពីរពេលល្ងាច៖ ម៉ាថាយ ១៣៖៣១-៣៥
ខចងចាំ៖ «ទ្រង់ក៏ថែរក្សា ហើយស្រោចស្រប់ផែនដី ព្រមទាំងធ្វើឲ្យមានផលកាន់តែច្រើនឡើង ដោយទន្លេនៃព្រះមានទឹកពេញ រួចទ្រង់ផ្គត់ផ្គង់ឲ្យមានស្រូវ ដោយរៀបចំផែនដី យ៉ាងនោះ ទ្រង់ស្រោចគន្លងទាំងប៉ុន្មានជាបរិបូរក៏ពង្រាបអាចម៍បំណះ ហើយធ្វើឲ្យដីទន់ ដោយទឹកភ្លៀង ក៏ប្រទានពរដល់ពន្លក ទ្រង់ប្រោសប្រទានឲ្យឆ្នាំបានប្រកបដោយសេចក្តីសប្បុរសនៃទ្រង់វិលខួប ហើយអស់ទាំងផ្លូវទ្រង់ ក៏ស្រក់ជាសេចក្តីបរិបូរ»។ ទំនុកតម្កើង ៦៥៖៩-១១
