ថ្ងៃព្រហស្បតិ៍ ទី៩ ខែកុម្ភៈ ឆ្នាំ២០២៣
អំណានព្រះគម្ពីរពេលព្រឹក៖ នៅថ្ងៃនោះ ព្រះយេហូវ៉ា ជាព្រះនៃគេ ទ្រង់នឹងជួយសង្គ្រោះគេ ទុកដូចជាហ្វូងចៀម ជារាស្ត្ររបស់ទ្រង់ ដ្បិតគេនឹងបានដូចជាត្បូងដាំនៅមកុដដែលភ្លឺផ្លេក នៅលើស្រុករបស់ទ្រង់។ សាការី ៩:១៦
អំណានប្រចាំថ្ងៃ៖ ព្រះយេស៊ូវឲ្យតម្លៃយើងគ្រប់គ្រាន់ ដល់ថ្នាក់ទ្រង់ប្រទានអ្វីគ្រប់យ៉ាងដែលជារបស់ផងទ្រង់
រឿងប្រៀបប្រដូចអំពីបុរសអ្នកជំនួញស្វែងរកគុជឬកែវមុក្តាដែលមានគុណភាពល្អមានន័យពីរយ៉ាង វាមិនត្រឹមតែទាក់ទងទៅនឹងមនុស្សស្វែងរកនគរឋានសួគ៌ប៉ុណ្ណោះទេ ប៉ុន្តែ វាក៏ទាក់ទងទៅនឹងព្រះយេស៊ូវស្វែងរកមរតកដែលទ្រង់បាត់បង់ផងដែរ។ ព្រះយេស៊ូវជាព្រះខាងជំនួញទ្រង់ស្វែងរកគុជឬកែវមុក្តាដែលមានគុណភាពល្អបានទតឃើញគុជឬកែវមុក្តាដែលមានតម្លៃមិនអាចកាត់ថ្លៃបាននៅក្នុងមនុស្សដែលមានអំពើបាប។ ព្រះយេស៊ូវបានទតឃើញថា ទ្រង់មានសមត្ថភាពក្នុងការប្រោសលោះមនុស្សដែលអាក្រក់ និងហិនហោចដោយសារតែអំពើបាប។ ចិត្តដែលធ្លាប់ជាសមរភូមិនៃការប្រយុទ្ធជាមួយសាតាំងហើយដែលធ្លាប់បានសង្គ្រោះដោយអំណាចនៃសេចក្តីស្រឡាញ់គឺមានតម្លៃខ្លាំងចំពោះព្រះដ៏ប្រោសលោះជាងអស់អ្នកដែលមិនធ្លាប់ប្រព្រឹត្តិអំពើបាបទៅទៀត។ នៅពេលដែលព្រះជាម្ចាស់ទតមើលមនុស្សដែលទទួលយកព្រះយេស៊ូវមកនៅក្នុងចិត្តហើយត្រូវបានលោះដោយសារព្រះលោហិតរបស់ព្រះយេស៊ូវទ្រង់ទតឃើញថា អ្នកនោះមិនមែនមានបាប ឬគ្មានតម្លៃនោះទេ តែនឹងក្លាយទៅជាមនុស្សដែលមានលក្ខណៈដូចជាព្រះ។ ទ្រង់ប្រមូលទ្រព្យសម្បត្តិទាំងអស់នៃផែនដី ហើយចេញបង់ថ្លៃដើម្បីទិញគុជឬកែវមុក្តា។ ហើយព្រះយេស៊ូវ ដោយទ្រង់បានរកឃើញគុជឬកែវមុក្តាទ្រង់ដាក់វាទៅលើមកុដទ្រង់វិញ។ «ពួកគេនឹងភ្លឺចិញ្ចែងចិញ្ចាចលើទឹកដីរបស់ខ្លួនដូចត្បូងពេជ្រភ្លឺចាំងពីមកុដ»។ សាការី ៩ៈ១៦។ ព្រះអម្ចាស់នៃពិភពទាំងមូលមានព្រះបន្ទូលថា៖ «នៅថ្ងៃដែលយើងបានកំណត់ទុកអ្នកទាំងនោះនឹងទៅជាប្រជារាស្ត្រដែលជាចំណែកមរតករបស់យើងផ្ទាល់»។ ម៉ាឡាគី ៣ៈ១៧។
អំណានព្រះគម្ពីរពេលល្ងាច៖ ម៉ាថាយ ២២៖១-១៤
ខចងចាំ៖ «មួយទៀត នគរស្ថានសួគ៌ក៏ប្រៀបដូចជាអ្នកឈ្មួញម្នាក់ ដែលរកកែវមុក្តាយ៉ាងល្អ កាលណាបានឃើញ១ដែលមានតម្លៃណាស់ នោះគាត់ទៅលក់របស់ទ្រព្យទាំងអស់មកទិញកែវមុក្តានោះ»។ ម៉ាថាយ ១៣:៤៥-៤៦
