​អំណានព្រះគម្ពីរពេលព្រឹក៖ ដ្បិត​យើង​រាល់​គ្នា​ជា​អ្នក​ធ្វើ​ការ​ជា​មួយ​នឹង​ព្រះ ឯ​អ្នក​រាល់​គ្នា​ជា​ស្រែ​ដែល​ព្រះ​ទ្រង់​ភ្ជួរ ហើយ​ជា​ផ្ទះ​ដែល​ព្រះ​ទ្រង់​ធ្វើ។ កូរិនថូសទី១ ៣:៩

អំណានប្រចាំថ្ងៃ៖ ​ចូរជឿទុកចិត្តលើព្រះ លើគ្រប់ទាំងអស់

ចំណែករបស់យើងគឺអធិស្ឋានហើយជឿ។ អធិស្ឋានដោយសង្ឃឹមថានឹងមានការឆ្លើយតបពីព្រះជាម្ចាស់ដែលស្តាប់ការអធិស្ឋាន​ ដោយ​ស្មោះអស់ពីចិត្តនានា។ ចូរចងចាំថា «យើងរាល់គ្នាជាអ្នកធ្វើការជាមួយនឹងព្រះ»។ កូរិនថូសទី១ ៣ៈ៩។ ចូរនិយាយនិងធ្វើឲ្យត្រូវគ្នាជាមួយនឹងការអធិស្ឋានរបស់អ្នក។ ការសាកល្បងនៃការរង់ចាំការឆ្លើយតប​នឹងបង្ហាញថា តើសេចក្តីអធិស្ឋានរបស់អ្នកពិតឬក៏គ្រាន់តែធ្វើទៅដោយសារតែអ្នកបានដឹងថា នោះ​គឺជាអ្វីដែលអ្នកត្រូវធ្វើ។

នៅពេលដែលអ្នកមានបញ្ហាសូមកុំរកអ្នកផ្សេងឲ្យជួយ។ ចូរជឿទុក​ចិត្តលើព្រះជាម្ចាស់ទាំងអស់។ ការប្រាប់ពីបញ្ហារបស់យើងទៅកាន់អ្នកដទៃ​មានតែធ្វើឲ្យយើងទន់ខ្សោយតែប៉ុណ្ណោះ ហើយក៏មិនបានប្រយោជន៍អ្វីដល់មនុស្សដែលយើងនិយាយទៅកាន់នោះដែរ។ យើងធ្វើឲ្យអ្នក​ដែលស្តាប់​បញ្ហា​ឬ​រឿងរ៉ាវរបស់យើងមានអារម្មណ៍ធុញថប់ ឬអស់កម្លាំង ពីព្រោះពួកគេមិនអាចជួយយើងបាន។ យើងព្យាយាមយកកម្លាំងចិត្តមក ពីមនុស្សដែល​មានអំពើបាប ហើយខ្សោយដូចជាខ្លួនពួកយើងខណៈពេលដែលកម្លាំងដ៏មានមហិទ្ធិឫទ្ធិរបស់ព្រះជាម្ចាស់កំពុងតែរង់ចាំប្រទានមកឲ្យយើង។

អ្នកមិនចាំ​បាច់ទៅដល់ជើងមេឃ ដើម្បីរកចំណេះប្រាជ្ញានោះទេ ពីព្រោះថាព្រះជាម្ចាស់ទ្រង់នៅជិតបង្កើយ។ ជំនាញនិងចំណេះដែលអ្នកកំពុងតែមានពេលឥឡូវ ឬក៏នឹងអាចមាននៅក្នុងពេលអនាគត នឹងមិនផ្តល់ភាពជោគជ័យដល់អ្នកបានទេ។ ភាពជោគជ័យបានមកពីព្រះជាម្ចាស់។​ អ្នកជឿព្រះជាម្ចាស់មិនត្រូវមានទំនុកចិត្តទៅលើមនុស្សច្រើនពេកទេ តែត្រូវមាន​ទំនុកចិត្ត ទៅលើព្រះជាម្ចាស់ឲ្យបានច្រើននៅក្នុងការងារអ្វី ដែលព្រះជាម្ចាស់​អាចធ្វើបាន។ ព្រះជាម្ចាស់ប្រាថ្នាចង់ឲ្យយើងឈោងទៅឯទ្រង់ដោយសេចក្តីជំនឿ។ ទ្រង់កំពុងតែរង់ចាំប្រទានឲ្យអ្នកនូវការយល់ដឹងចំពោះបញ្ហាទាំឡាយ​នៃលោកិយ​នេះក៏ដូចជាបញ្ហាខាងព្រលឹងវិញ្ញាណដែរ។ ព្រះជាម្ចាស់អាចធ្វើឲ្យអ្នកឆ្លាតវៃបាន ទ្រង់អាចប្រទានពាក្យសម្តីត្រឹមត្រូវឲ្យនិយាយក្នុងពេលដែលត្រឹមត្រូវ ហើយប្រទានជំនាញ ដែលអ្នកត្រូវការ ដើម្បីសម្រេចនូវអ្វីដែលត្រូវធ្វើ។ ចូរយកជំនាញរបស់អ្នកទៅធ្វើការងារសូមព្រះជាម្ចាស់នូវចំណេះប្រាជ្ញានោះ ទ្រង់នឹងប្រទានវាមកឲ្យអ្នក។

​អំណានព្រះគម្ពីរពេលល្ងាច៖ ម៉ាថាយ ២៧៖៣២-៤៤