ថ្ងៃព្រហស្បតិ៍ ទី១៦ ខែមីនា ឆ្នាំ២០២៣
អំណានព្រះគម្ពីរពេលព្រឹក៖ អ្នកផារិស៊ីក៏ឈរតាំងអធិស្ឋានតែម្នាក់ឯងដូច្នេះថា ឱព្រះអង្គអើយ ទូលបង្គំអរព្រះគុណដល់ទ្រង់ ព្រោះទូលបង្គំមិនដូចជាមនុស្សឯទៀត ដែលជាមនុស្សប្លន់ ទុច្ចរិត ហើយកំផិត ឬដូចជាអ្នកយកពន្ធនេះទេ ទូលបង្គំតមក្នុង១អាទិត្យ២ដង ហើយក៏ថ្វាយ១ភាគក្នុង១០ ពីរបស់ទាំងអម្បាលម៉ានដែលទូលបង្គំបានចំណេញផង។ លូកា ១៨:១១-១២
អំណានប្រចាំថ្ងៃ៖ បើសិនជាអ្នកសម្លឹងមើលទៅមនុស្ស នោះអ្នកមិនសម្លឹងមើលទៅឯព្រះឡើយ
កាលព្រះយេស៊ូវកំពុងតែមានបន្ទូលទៅកាន់មនុស្ស១ក្រុម ដែលគិតថា ខ្លួនជាមនុស្សបរិសុទ្ធទ្រង់ក៏បានប្រាប់រឿងប្រៀបប្រដូចមួយអំពីពួកផារីសុី និងពួកអ្នកមានបាប។ ពួកផារីសុីគិតថា ខ្លួនគេបរិសុទ្ធស្រាប់ហើយពួកគេ ទៅព្រះវិហារទៅថ្វាយបង្គំ ដោយសង្ឃឹមថា នឹងបានឮមនុស្សដទៃសរសើរ ដល់ខ្លួន។ គេគិតថាដោយធ្វើការថ្វាយបង្គំគេ នឹងទទួលបានការយល់ព្រម ពីព្រះជាម្ចាស់។ នៅក្នុងគ្រាដដែលនោះមនុស្សម្នា ដែលឃើញអ្នកនោះថ្វាយ បង្គំនឹងគិតថា គេពិតជាមនុស្សមានព្រលឹងវិញ្ញាណណាស់។ គេសង្ឃឹមថា ទាំងព្រះជាម្ចាស់ហើយនិងមនុស្សនឹងចូលចិត្តគេ។ ពួកផារីសុីក៏ជាមនុស្សដែលឆាប់តម្កើងខ្លួនណាស់ដែរ។ គេមើលទៅដូចជាមនុស្សសុចរិតគេដើរ និង អធិស្ឋានធ្វើហាក់បី ដូចជាមនុស្សសុចរិត។ គេមិននៅក្បែរមនុស្សដទៃឡើយគេចង់ប្រាប់ថា «កុំឲ្យមកជិតអញឡើយដ្បិតអញបរិសុទ្ធជាងឯង»។ អេសាយ៦៥ៈ៥។ គេពេញចិត្តថា ខ្លួនល្អហើយ គិតថាទាំងព្រះជាម្ចាស់ និងមនុស្សក៏ពេញចិត្តជាមួយនិងសេចក្តីល្អរបស់ខ្លួនដែរ។
ពួកផារីសុីអធិស្ឋានថា «ឱព្រះអង្គអើយទូលបង្គំអរព្រះគុណដល់ទ្រង់ព្រោះទូលបង្គំមិនដូចជា មនុស្សឯទៀតដែលជាមនុស្សប្លន់ ទុច្ចរិត ហើយកំផិតឬដូចជាអ្នកយកពន្ធនោះទេ»។ លូកា១៨ៈ១១។ ការវិនិច្ឆ័យពីអត្តចរិតរបស់គេគឺផ្អែកទៅលើមនុស្សដទៃទៀតដែលមិនរស់នៅទៅតាមភាពបរិសុទ្ធ របស់ព្រះជាម្ចាស់។ ចិត្តគំនិតរបស់គេងាកបែរចេញពីព្រះជាម្ចាស់ ពីព្រោះ តែគេសម្លឹងមើលទៅមនុស្សដទៃ។ ហេតុនេះហើយបានជាគេគិតថា ខ្លួនគេល្អណាស់នោះ។ គេនិយាយពីអំពើល្អរបស់គេ «ទូលបង្គំក្នុង១អាទិត្យ២ដង ហើយក៏ថ្វាយ១ភាគក្នុង១០ពីរបស់ទាំងអម្បាលម៉ានដែលទូលបង្គំបានចំណេញផង»។ លូកា ១៨ៈ១២។ សាសនារបស់ពួកផារីសុី គឺមិនបានទៅដល់ចិត្តឡើយ។ គេមិនមែនរកចរិតលក្ខណៈដូចជាព្រះជាម្ចាស់ឡើយ ដែលព្រះទ័យរបស់ទ្រង់មានពោរពេញទៅដោយសេចក្តីស្រឡាញ់ និងមេត្តាករុណា។ គេពេញចិត្តជាមួយនិងសាសនាដែលពាក់ព័ន្ធទៅនឹងអ្វីដែលល្អមើលចំពោះមនុស្សដទៃតែប៉ុណ្ណោះ។ ភាពសុចរិតរបស់គេគឺជារបស់គេផលផ្លែនៃការងាររបស់គេនិងវិនិច្ឆ័យដោយកម្រិតយល់ដឹងរបស់មនុស្ស។
អំណានព្រះគម្ពីរពេលល្ងាច៖ ម៉ាកុស ១៖១-៨
ខចងចាំ៖ «សូមកុំស្អប់យើងខ្ញុំឡើយ ដោយយល់ដល់ព្រះនាមទ្រង់ សូមកុំបង្អាប់បល្ល័ង្កនៃសិរីល្អរបស់ទ្រង់ សូមនឹកចាំឡើងវិញ ហើយកុំផ្តាច់សេចក្តីសញ្ញា ដែលទ្រង់បានតាំងនឹងយើងខ្ញុំឡើយ»។ យេរេមា ១៤:២១
