​អំណានព្រះគម្ពីរពេលព្រឹក៖ព្រះយេស៊ូវ​មាន​ព្រះបន្ទូល​ទៅ​នាង​ថា តើ​ខ្ញុំ​មិន​បាន​ប្រាប់​នាង​ថា បើ​សិន​ជា​នាង​ជឿ នោះ​នាង​នឹង​ឃើញ​សិរីល្អ​នៃ​ព្រះ​ទេ​ឬ​អី។ យ៉ូហាន ១១:៤០

អំណានប្រចាំថ្ងៃ៖ ​អំណោយទានរបស់ព្រះជាម្ចាស់​ គឺមានសម្រាប់អស់អ្នក​ណាដែលយល់ព្រមស្តាប់បង្គាប់

ចំពោះតម្រូវការទាំងអស់របស់ព្រះជាម្ចាស់គឺដូចគ្នា។ អំណោយទានរបស់ទ្រង់ទាំងអស់គឺសន្យានៅលើល័ក្ខខ័ណ្ឌនៃការស្តាប់បង្គាប់។ នគរ​ឋានសួគ៌ គឺពោរពេញទៅដោយព្រះពរដែលព្រះជាម្ចាស់ចង់ចែកចាយជាមួយអស់អ្នកទាំងឡាយណាដែលចូលរួមសហការជាមួយទ្រង់។ អ្នកទាំងឡាយណាដែលស្តាប់បង្គាប់ទ្រង់អាចទាមទារការបំពេញកិច្ចសន្យារបស់ទ្រង់ដោយទុកចិត្ត។

យើងត្រូវតែជឿទុកចិត្តលើព្រះជាម្ចាស់ ដោយគ្មានការសង្ស័យឡើយ។ ជារឿយៗទ្រង់តែងតែពន្យារពេលឆ្លើយតប ការអធិស្ឋានរបស់យើងដើម្បី​សាកល្បងសេចក្តីជំនឿរបស់យើងឬក៏សាកល្បងភាពបរិសុទ្ធនៃចំណង់ប្រាថ្នារបស់យើង។ កាលណាសេចក្តីស្នើសុំរបស់យើង​ស្របទៅតាមពាក្យបន្ទូលរបស់ទ្រង់ យើងត្រូវតែជឿសេចក្តីសន្យារបស់ទ្រង់ ហើយសូមដល់ព្រះជាម្ចាស់នូវអ្វីដែលយើងត្រូវការ ដោយការប្តេជ្ញាចិត្តថា ព្រះជាម្ចាស់​នឹង​មិនបដិសេធយើងឡើយ។

ព្រះជាម្ចាស់មិនបានមានបន្ទូលថា សូមម្តងអ្នកនឹងបានទទួល​នោះ​ទេ។ ទ្រង់ប្រាប់ឲ្យយើងសូម។ ចូរខំអធិស្ឋានតទៅទៀតដោយកុំចុះចាញ់។ កាលណាយើងទូលសូមដល់ព្រះជាម្ចាស់កាន់តែច្រើន យើងកាន់តែគិតអំពីទ្រង់ ហើយសេចក្តីប្រាថ្នារបស់យើងដើម្បីទទួលបានមកពីព្រះជាម្ចាស់នូវអ្វី ដែលបាន​សូមនោះកើនឡើង។ នៅផ្នូរលោកឡាសារព្រះយេស៊ូវបានមានបន្ទូលទៅកាន់ម៉ាថា ថា «បើសិនជានាងជឿ នោះនាងនឹងឃើញសិរីល្អនៃព្រះ»។ យ៉ូហាន ១១ៈ៤០។

​អំណានព្រះគម្ពីរពេលល្ងាច៖ ម៉ាថាយ ២៧៖១១-២៦