​អំណានព្រះគម្ពីរពេលព្រឹក៖ គង់​តែ​អញ​នឹង​ជំនុំ​ជម្រះ​ឲ្យ​ស្ត្រី​មេម៉ាយ​នេះ​ជា​មិន​ខាន ដោយ​ព្រោះ​នាង​នាំ​ឲ្យ​រំខាន​ចិត្ត​អញ​ខ្លាំង​ណាស់ ក្រែង​នាង​ចេះ​តែ​មក​រំអុក​ជានិច្ច​ដូច្នេះ​ទៅ នឹង​នាំ​ឲ្យ​អញ​ពិបាក​ចិត្ត​ទៅ​ទៀត។ លូកា ១៨:៥

អំណានប្រចាំថ្ងៃ៖ព្រះជាម្ចាស់មានសេចក្តីអាណិតមេត្តាដែលមិនអាចវាល់ ឬវាស់បាន ចំពោះអស់អ្នកដែលខ្វះខាត

ចៅក្រមដែលគេនិយាយនៅក្នុងរឿងប្រៀបប្រដូចនេះ គឺមិនខ្វល់អំពីអ្វីដែលខុសនិងអ្វីដែលត្រូវឡើយ ហើយគាត់ក៏មិនមានសេចក្តីអាណិតដល់ប្រជាជនដែលកំពុងរងទុក្ខដែរ។ ស្ត្រីមេម៉ាយដែលចេះតែមករកចៅក្រមឲ្យជួយគាត់បានអង្វរសូមឲ្យចៅក្រមជួយ តែចៅក្រមនោះបានបណ្តេញគាត់ចេញម្តងហើយម្តងទៀត។ ទោះបីស្ត្រីមេម៉ាយនោះត្រូវចៅក្រមបណ្តេញចេញជាច្រើនលើកច្រើនសារក៏ដោយក៏គាត់នៅតែត្រឡប់មកវិញដដែល។ចៅក្រមដឹងថាអ្វីដែលគាត់សូមនោះគឺត្រឹមត្រូវហើយគាត់អាចជួយគាត់បានភ្លាមៗ ប៉ុន្តែគាត់មិនជួយ។ គាត់ចង់បង្ហាញពីសេរីភាពក្នុង​ការប្រើឬមិន​ប្រើអំណាចរបស់គាត់ ហើយគាត់សប្បាយចិត្តនឹងឃើញស្ត្រីនោះសូមអង្វរគាត់ដោយគ្មានបានទទួលជំនួយពីគាត់សោះ។ ប៉ុន្តែ ស្ត្រីមេម៉ាយម្នាក់នេះមិនព្រមចុះចាញ់ឬបាក់ទឹកចិត្តឡើយ។ គាត់មិនបណ្តោយ​ឲ្យចៅក្រមដែលមានអំនួតនឹងរឹងរូសមករារាំងគាត់មិនឲ្យត្រឡប់មកវិញមកសូមអង្វរឲ្យជួយឡើយ​ ហើយនៅទីបំផុតចៅក្រមក៏យល់ព្រមជួយគាត់។ ចៅក្រមបាន​និយាយ​ថា «ទោះបើអញមិនខ្លាចដល់ព្រះឬព្រមញញើតចំពោះមនុស្សណាក៏ដោយគង់តែអញជំនុំជម្រះឲ្យស្ត្រីមេម៉ាយនេះជាមិនខានដោយព្រោះនាងនាំឲ្យរំខាន​ចិត្ត​អញខ្លាំងណាស់ក្រែងនាងចេះតែមករំអុកជានិច្ច ដូច្នេះទៅនឹងនាំឲ្យអញពិបាកចិត្តទៅទៀត។ លូកា ១៨ៈ៤-៧ ហើយព្រះយេស៊ូវ​បានមាន​បន្ទូល​ថា «ចំណែកព្រះវិញដែលទ្រង់មានព្រះហឫទ័យអត់ធ្មត់ដល់ពួករើសតាំងរបស់ទ្រង់ដែលគេអំពាវនាវរកទ្រង់ទាំងយប់ទាំងថ្ងៃនោះ តើទ្រង់មិនសងសឹកជំនួសគេដែរទេឬអី?» ខ្ញុំប្រាប់អ្នករាល់គ្នាជាប្រាកដថា ទ្រង់នឹងសងសឹកជំនួសអ្នកទាំងនោះជាប្រញាប់មិនខាន លូកា ៧ៈ៨។ ព្រះយេស៊ូវបានបញ្ជាក់យ៉ាងច្បាស់ថា គឺមានភាពខុសគ្នាឆ្ងាយណាស់រវាងចៅក្រមដែលមិនយុត្តិធម៌នេះ ហើយនិងព្រះជាម្ចាស់នោះ។ ចៅក្រមជួយស្ត្រីដោយសារតែហេតុផលមានភាពអាត្មានិយមពីព្រោះគាត់មិនចង់ឲ្យស្ត្រីមេម៉ាយនោះមករំខានគាត់តទៅទៀត។ គាត់គ្មានចិត្តអាណិត​ឬអាសូរដល់ស្ត្រីនោះឡើយគាត់មិនខ្វល់អំពីការរងទុក្ខឬការឈឺចាប់វេទនារបស់ស្ត្រីមេម៉ាយនោះឡើយ។ខុសប្លែកពីអាកប្បកិរិយារបស់ព្រះជាម្ចាស់ចំពោះអស់អ្នកដែលស្វែងរកទ្រង់។ ការអធិស្ឋានរបស់អ្នកដែលខ្វះខាត​និងអ្នកដែលមានទុក្ខព្រួយគឺទ្រង់យកចិត្តទុកដាក់រួមជាមួយនិងសេចក្តីអាណិតអាសូរដែលមិនអាចវាល់បាន។

​អំណានព្រះគម្ពីរពេលល្ងាច៖ ម៉ាកុស ៤៖១-២០