ថ្ងៃសៅរ៍ ទី៨ ខែមេសា ឆ្នាំ២០២៣
អំណានព្រះគម្ពីរពេលព្រឹក៖ ឥឡូវនេះ ពួកអ្នកមានអើយ ចូរយំសោកចុះ ព្រមទាំងស្រែកទ្រហោផង ដោយព្រោះសេចក្តីវេទនា ដែលត្រូវមកលើអ្នករាល់គ្នា ទ្រព្យសម្បត្តិរបស់អ្នករាល់គ្នាបានពុករលួយ ហើយសំលៀកបំពាក់អ្នករាល់គ្នា ត្រូវកន្លាតកាត់អស់ហើយ មាសប្រាក់របស់អ្នករាល់គ្នាបានដុះស្នឹម ឯស្នឹមនោះ នឹងបានទុកសំរាប់ជាទីបន្ទាល់ ទាស់នឹងអ្នករាល់គ្នា ហើយនិងស៊ីសាច់អ្នករាល់គ្នាដូចជាភ្លើង ដ្បិតអ្នករាល់គ្នាបានខំប្រមូលបង្គរទ្រព្យសម្បត្តិឡើង នៅជាន់ក្រោយបង្អស់នេះ។ យ៉ាកុប ៥:១-៣
អំណានប្រចាំថ្ងៃ៖ កូនចៅស្មោះត្រង់របស់ព្រះជាម្ចាស់ នឹងត្រូវបានគេធ្វើ ទុក្ខបៀតបៀន
ព្រះគម្ពីរពិពណ៌នាលក្ខណៈរបស់លោកិយមុនពេលការយាងមកជាលើកទី២របស់ព្រះយេស៊ូវ។ លោកយ៉ាកុបដែលជាសាវ័កសរសេរអំពីសេចក្តីលោភលន់និងការជិះជាន់សង្កត់សង្កិនដែលនឹងកើតឡើងពាសពេញពិភពលោក។ គាត់ថ្លែងថា «ឥឡូវនេះពួកអ្នកមានអើយចូរយំសោកចុះព្រមទាំងស្រែកទ្រហោផងដោយព្រោះសេចក្តីវេទនាដែលត្រូវមកលើអ្នករាល់គ្នា។
ទ្រព្យសម្បត្តិរបស់អ្នករាល់គ្នាបានពុករលួយហើយសម្លៀកបំពាក់អ្នករាល់គ្នាត្រូវកន្លាតកាត់អស់ហើយមាសប្រាក់របស់អ្នករាល់គ្នាបានដុះស្នឹម ឯស្នឹមនោះនឹងបានទុកសម្រាប់ជាទីបន្ទាល់ទាស់នឹងអ្នករាល់គ្នាហើយនិងសុីសាច់អ្នករាល់គ្នាដូចជាភ្លើង ដ្បិតអ្នករាល់គ្នាបានខំប្រមូលបង្គរទ្រព្យសម្បត្តិឡើងនៅជាន់ក្រោយបង្អស់នេះ។ មើលប្រាក់ឈ្នួលដែលអ្នករាល់គ្នាបានបង្ខាំងចំពោះពួកជើងឈ្នួលជាអ្នកច្រូតនៅស្រែរបស់អ្នករាល់គ្នានោះក៏ស្រែកឡើងហើយសម្រែកនៃពួកអ្នកដែលច្រូតនោះបានឮទៅដល់ព្រះកាណ៌របស់ព្រះអម្ចាស់នៃពួកពលបរិវារដែរ។ អ្នករាល់គ្នាបាននៅលើផែនដីបែបប្រសើររុងរឿងតាមតែចិត្តសម្រើបស្រើបទាំងចំអែតចិត្តដូចជានៅថ្ងៃសម្លាប់សត្វ។ អ្នករាល់គ្នាបានកាត់ទោសក៏បានសម្លាប់មនុស្សសុចរិតតែគេមិនបានតយុទ្ធនឹងអ្នករាល់គ្នាវិញសោះ។ យ៉ាកុប ៥ៈ១-៦ នេះគឺជារូបភាពអ្វីដែលកើតមាននាសព្វថ្ងៃនេះ។ មនុស្សប្រើប្រាស់គ្រប់វិធីសាស្ត្រនៃការសង្កត់សង្កិននិងការជំរិតដើម្បីធ្វើឲ្យខ្លួនឯងមានកាន់តែខ្លាំង ខណៈពេលដែលសម្រែករបស់មនុស្សដែលស្រេកឃ្លានបានលាន់ឮដល់ព្រះកាណ៌របស់ព្រះជាម្ចាស់។ «ឯសេចក្តីយុត្តិធម៌បានត្រឡប់ថយចេញទៅ ហើយសេចក្តីសុចរិតក៏ឈរនៅទីឆ្ងាយដ្បិតសេចក្តីពិតបានដួលនៅកណ្តាលផ្លូវ ហើយសេចក្តីទៀងត្រង់ចូលមកមិនបាន។ អើសេចក្តីពិតក៏គ្មានដែរ ហើយអ្នកណាដែលលែងប្រព្រឹត្តិអំពើអាក្រក់នោះសុខចិត្តធ្វើជារំពាដល់គេហើយ។ អេសាយ ៥៩ៈ១៤,១៥។ការនេះត្រូវបានបំពេញនៅក្នុងជីវិតរបស់ព្រះយេស៊ូវនៅលើផែនដី។ ទ្រង់គោរពស្មោះស្ម័គ្រចំពោះបញ្ញត្តិរបស់ព្រះជាម្ចាស់ទ្រង់ទុកប្រពៃណីទំនៀមទម្លាប់និងសេចក្តីត្រូវការរបស់មនុស្សដែលពួកគេបានលើកតម្កើងជំនួសពួកគេ។ ដោយសារតែហេតុនេះហើយបានជាគេស្អប់និងធ្វើទុក្ខទោសដល់ទ្រង់។រឿងប្រភេទនេះកើតឡើងផ្ទួនៗ។ ច្បាប់នឹងទំនៀមទម្លាប់ប្រពៃណីរបស់មនុស្សត្រូវបានគេចាត់ទុកថា មានសារៈសំខាន់ជាងច្បាប់ឬក្រឹត្យវិន័យរបស់ព្រះជាម្ចាស់ទៅទៀតហើយដោយសារតែរឿងនេះអស់អ្នកទាំងឡាយណាដែលស្មោះស្ម័គ្រនឹងបញ្ញត្តិរបស់ព្រះជាម្ចាស់ត្រូវបានគេធ្វើទុក្ខបៀតបៀន។ដោយសារតែភាពស្មោះស្ម័គ្ររបស់ទ្រង់ចំពោះព្រះជាម្ចាស់ទ្រង់ត្រូវបានគេចោទប្រកាន់ថាជាអ្នកប្រព្រឹត្តិរំលងនិងជាអ្នកប្រមាថមាក់ងាយថ្ងៃបរិសុទ្ធ។ពួកគេនិយាយថាទ្រង់មានអារក្សនៅក្នុងអង្គទ្រង់ហើយក៏បដិសេធមិនទទួលទ្រង់ដោយនិយាយថា ទ្រង់ជាសាតាំង។ ដូចគ្នាដែរ សាវ័ករបស់ទ្រង់ក៏ត្រូវបានគេចោទប្រកាន់និងធ្វើខុសពីការពិត។ សាតាំងសង្ឃឹមនឹងប្រើការចោទប្រកាន់និងការធ្វើទុក្ខបៀតបៀនទាំងនេះដើម្បីនាំគ្រីស្ទានដែលស្មោះត្រង់ឲ្យចូលទៅក្នុងអំពើបាប ហើយនាំឲ្យមានភាពអាម៉ាស់ដល់ព្រះជាម្ចាស់។
អំណានព្រះគម្ពីរពេលល្ងាច៖ ម៉ាកុស ៥៖២១-៤៣
ខចងចាំ៖ «ដើម្បីនឹងសំដែងឲ្យឃើញសេចក្តីសុចរិតរបស់ព្រះ នៅជាន់ឥឡូវនេះ ប្រយោជន៍ឲ្យទ្រង់បានសុចរិត ព្រមទាំងរាប់ពួកអ្នកដែលមានសេចក្តីជំនឿ ជឿដល់ព្រះយេស៊ូវ ថាជាសុចរិតដែរ»។ រ៉ូម ៣:២៦
