ថ្ងៃពុធ ទី១០ ខែឧសភា ឆ្នាំ២០២៣
អំណានព្រះគម្ពីរពេលព្រឹក៖ តើមិនមែនឲ្យឯងបានចែកអាហារដល់អ្នកដែលឃ្លាន ហើយនាំមនុស្សក្រដែលត្រូវដេញពីផ្ទះគេមកឯផ្ទះឯងទេឬអី ឬបើកាលណាឯងឃើញមនុស្សឥតមានសំលៀកបំពាក់ នោះតើមិនមែនឲ្យឯងបិទបាំងឲ្យគេ ឥតដែលពួនខ្លួននឹងសាច់ញាតិរបស់ឯងទេឬអី យ៉ាងនោះ ទើបពន្លឺរបស់ឯង នឹងលេចមក ដូចជារស្មីអរុណ ហើយសេចក្តីសុខស្រួលរបស់ឯង នឹងលេចឡើងជាយ៉ាងឆាប់ ឯសេចក្តីសុចរិតរបស់ឯង នោះនឹងនាំមុខឯង ហើយសិរីល្អនៃព្រះយេហូវ៉ានឹងការពារពីក្រោយឯង។ អេសាយ ៥៨:៧-៨
អំណានប្រចាំថ្ងៃ៖ រំដោះមនុស្សឲ្យមានសេរីភាព
នេះគឺជាសេវ៉ាដែលព្រះជាម្ចាស់បានជ្រើសរើស «គឺឲ្យដោះច្រវាក់ដែលឯងដាក់គេដោយអំពើអាក្រក់ឲ្យស្រាយចំណងដែលឯងបានចងគេហើយឲ្យអ្នកដែលឯងបានសង្កត់សង្កិនបានរួចចេញទទេព្រមទាំងបំបាក់គ្រប់ទាំងនឹមផង។ .....នោះតើមិនមែនឲ្យឯងបិទបាំងឲ្យគេឥតដែលពួនខ្លួននឹងសាច់ញាតិរបស់ឯងទេឬអី»។ អេសាយ៥៨ៈ៦,៧។ នៅពេលដែលអ្នកមើលឃើញខ្លួនឯងថា ជាអ្នកមានបាបត្រូវបានសង្គ្រោះដោយសារតែសេចក្តីស្រឡាញ់របស់ព្រះវរបិតានៃនគរឋានសួគ៌តែប៉ុណ្ណោះ នោះអ្នកនឹងមានចិត្តសណ្តោសអាណិតដល់អ្នកដទៃដែលឈឺចាប់នៅក្នុងអំពើបាបហើយ។ អ្នកនឹងលែងជួបសេចក្តីវេទនានិងការសោកស្តាយដោយសេចក្តីច្រណែននិងការរិះគន់យ៉ាងខ្លាំងទៀតហើយ។ នៅពេលដែលភាពអាត្មានិយមចេញអស់ពីក្នុងចិត្តរបស់អ្នកទៅអ្នកនឹងស្ថិតនៅក្នុងការអាណិតអាសូរជាមួយព្រះជាម្ចាស់ ហើយនឹងចែកចាយសេចក្តីអំណររបស់ទ្រង់នៅក្នុងការសង្គ្រោះអ្នកដែលបាត់បង់ឬអ្នកដែលវង្វេង។
វាគឺជាការពិតដែលអ្នកតាំងខ្លួនជាកូនរបស់ព្រះជាម្ចាស់ ប៉ុន្តែបើសិនជាការតាំងខ្លួននោះជាការពិតនោះគឺជា «ប្អូនប្រុសរបស់អ្នក» នោះហើយដែលបានស្លាប់ឥឡូវរស់ឡើងវិញក៏បាត់បង់តែបានឃើញមកវិញហើយ។ អ្នកត្រូវបានរួបរួមជាសាច់ញាតិជិតដិតចំពោះព្រះជាម្ចាស់ ទ្រង់ទទួលស្គាល់អ្នកនោះថាជាកូនប្រុសម្នាក់របស់ទ្រង់ដែរ។ ការបដិសេធចំពោះប្អូនប្រុសដែលបានសារភាពទោសកំហុស ហើយអ្នកបង្ហាញឲ្យឃើញថា អ្នកគ្រាន់តែជាបាវបម្រើដែលសុីឈ្នួលនៅក្នុងផ្ទះតែប៉ុណ្ណោះ នោះអ្នកមិនមែនជាកូន នៅក្នុងក្រុមគ្រួសាររបស់ព្រះជាម្ចាស់ឡើយ។
ទោះបីជាអ្នកមិនសប្បាយចិត្តចំពោះអ្នកមានបាបវិលត្រឡប់ទៅរកព្រះជាម្ចាស់វិញក៏ដោយក៏នៅឯនគរឋានសួគ៌នៅតែមានសេចក្តីអំណរដែរហើយព្រះជាម្ចាស់នឹងទទួលស្វាគមន៍អ្នកដែលបានកែប្រែទាំងនេះឲ្យចូលទៅក្នុងនគរឋានសួគ៌ ហើយប្រទានការងារឲ្យគេធ្វើដែរ។ អ្នកដែលបានទទួលការអភ័យទោសចំពោះការប្រព្រឹត្តិអំពើបាបជាច្រើននឹងស្រឡាញ់ព្រះជាម្ចាស់ច្រើន។ អ្នកដែលមិនសប្បាយចិត្តអំពីការលន់តួទោសរបស់អ្នកមានបាបនឹងគ្មានកន្លែងនៅនគរឋានសួគ៌ឡើយ។ អ្នកនឹងនៅខាងក្រៅក្នុងទីងងឹតដោយសារ «តែអ្នកណាដែលគ្មានសេចក្តីស្រឡាញ់នោះមិនស្គាល់ព្រះវិញ ពីព្រោះព្រះទ្រង់ជាសេចក្តីស្រឡាញ់នេះឯង»។ យ៉ូហានទី១ ៤ៈ៨
អំណានព្រះគម្ពីរពេលល្ងាច៖ ម៉ាកុស ១៦
ខចងចាំ៖ «គួរឲ្យយើងស៊ីលៀង ដោយអរសប្បាយទៅ ពីព្រោះប្អូនឯងនេះបានស្លាប់ ឥឡូវរស់ឡើងវិញ ក៏បាត់បង់ តែបានឃើញមកវិញហើយ»។ លូកា ១៥:៣២
