ថ្ងៃសុក្រ ទី៥ ខែឧសភា ឆ្នាំ២០២៣
អំណានព្រះគម្ពីរពេលព្រឹក៖ ដ្បិតកូនអញនេះបានស្លាប់ ឥឡូវរស់ឡើងវិញ ក៏បាត់ទៅ ហើយបានឃើញមកវិញ នោះគេក៏បរិភោគសប្បាយទាំងអស់គ្នាទៅ។ លូកា ១៥:២៤
អំណានប្រចាំថ្ងៃ៖ ចូរត្រឡប់មកឯខ្ញុំវិញ ពីព្រោះខ្ញុំបានទិញ ឬលោះអ្នកក្នុងតម្លៃខ្ពស់
នៅក្នុងរឿងប្រៀបប្រដូចនេះឪពុកមិនបានរំឭកកូនប្រុសអំពីអំពើអាក្រក់ដែលវាបានប្រព្រឹត្តិនោះទេ។ កូនប្រុសនោះមានអារម្មណ៍ថា រឿងកាលពីអតីតកាលត្រូវបានលើកលែងឲ្យហើយ ហើយត្រូវបានបំភ្លេចចោលជារៀងរហូត។ ដូច្នេះហើយព្រះជាម្ចាស់មានព្រះបន្ទូលទៅកាន់អ្នកមានបាបថា «អញបានលុបអំពើរំលងរបស់ឯងចេញដូចជាពពកយ៉ាងក្រាស់និងអំពើបាបឯងដូចជាពពកផង»។ អេសាយ៤៤ៈ២២។ «ព្រោះអញនឹងអត់ទោសចំពោះអំពើទុច្ចរិតរបស់គេ ហើយនឹងលែងនឹកចាំពីអំពើបាបគេទៀតជាដរាបទៅ»។ យេេរមា៣១ៈ៣៤។ «ត្រូវឲ្យមនុស្សអាក្រក់បោះបង់ចោលផ្លូវរបស់ខ្លួន ហើយឲ្យមនុស្សទុច្ចរិតចោលគំនិតអាក្រក់របស់ខ្លួនដែរ រួចឲ្យគេត្រឡប់មកឯព្រះយេហូវ៉ាវិញ នោះទ្រង់នឹងអាណិតមេត្តាដល់គេ គឺឲ្យវិលមកឯព្រះនៃយើងរាល់គ្នាដ្បិតទ្រង់នឹងអត់ទោសឲ្យជាបរិបូរ»។ អេសាយ៥៥ៈ៧។ «នៅគ្រានោះគឺនៅវេលានោះឯងគេនឹងរកសេចក្តីទុច្ចរិតរបស់ពួកអុីស្រាអែលតែនឹងមិនប្រទះទេ ហើយរកអំពើបាបរបស់ពួកយូដាតែនឹងមិនឃើញឡើយពីព្រោះអញនឹងអត់ទោសដល់ពួកអ្នកដែលអញទុកឲ្យសល់នៅ»។ យេរេមា៥០ៈ២០។
នៅក្នុងខទាំងនេះយើងត្រូវបានធានាអំពីព្រះជាម្ចាស់យល់ព្រមទទួលយកអ្នកមានបាបដែលបានលន់តួទោស។ តើអ្នកដែលជាអ្នកអានបានជ្រើសរើសផ្លូវរបស់ខ្លួនហើយឬនៅ? តើអ្នកធ្លាប់បានដើរចេញឆ្ងាយពីព្រះជាម្ចាស់ទេ? តើអ្នកសប្បាយចិត្តនឹងរស់នៅក្នុងអំពើបាបហើយឃើញតែអំពើបាបបណ្តាលឲ្យមានការឈឺចាប់តែម៉្យាងឬ? ហើយឥឡូវនេះលុយកាក់របស់អ្នកអស់ទៅ ហើយផែនការសម្រាប់ជីវិតអ្នកបានបរាជ័យ សេចក្តីសង្ឃឹមរបស់អ្នកក៏រលត់បាត់? តើអ្នកអង្គុយតែម្នាក់ឯងហើយមិនមានសង្ឃឹមឬ? សំឡេងដែលបាននិយាយមកកាន់ចិត្តរបស់អ្នកតែអ្នកបានបដិសេធមិនព្រមស្តាប់នោះគឺកំពុងតែនិយាយទៅកាន់ចិត្តអ្នកម្តងទៀតថា «ចូរក្រោកឡើងហើយចេញទៅចុះដ្បិតនេះមិនមែនជាទីឲ្យឯងរាល់គ្នាបានសម្រាកនៅទេ»។ មីកា២ៈ១០ ចូរត្រឡប់ទៅផ្ទះឪពុករបស់ឯងវិញចុះ។ ទ្រង់បានហៅអ្នកដោយមានព្រះបន្ទូលថា «ចូរវិលមកឯអញវិញ ពីព្រោះអញបានលោះឯងហើយ»។ អេសាយ៤៤ៈ២២
ចូរកុំស្តាប់គំនិតយោបល់របស់សត្រូវដែលឲ្យនៅឆ្ងាយពីព្រះយេស៊ូវអី ទាល់តែអ្នកធ្វើខ្លួនឲ្យល្អប្រសើរ ទាល់តែអ្នកល្អគ្រប់គ្រាន់ដើម្បីមកឯព្រះជាម្ចាស់បាន។ បើសិនជាអ្នករង់ចាំដល់ពេលនោះ នោះអ្នកនឹងមិនអាចមកបានទេ។ នៅពេលដែលសាតាំងរំឭកអ្នកអំពីអំពើបាបរបស់អ្នកនិយាយសេចក្តីសន្យារបស់ព្រះយេស៊ូវឡើងវិញថា «អ្នកណាដែលមកឯខ្ញុំ ខ្ញុំក៏មិនដែល ចោលទៅក្រៅឡើយ»។ យ៉ូហាន៦ៈ៣៧ ចូរប្រាប់សត្រូវថា ព្រះលោហិតរបស់ព្រះយេស៊ូវគ្រីស្ទសំអាតពីគ្រប់អំពើបាបទាំងអស់។ ចូរយកសេចក្តីអធិស្ឋាន របស់ស្តេចដេវីឌមកធ្វើជាសេចក្តីអធិស្ឋានរបស់អ្នកចុះ សូមជម្រះទូលបង្គំដោយមែកហុីសុ៊បនោះទូលបង្គំនឹងបានជ្រះស្អាត សូមដុសលាងទូលបង្គំ នោះនឹងបានសជាងហិមៈ។ ទំនុកតម្កើង៥១ៈ៧។
អំណានព្រះគម្ពីរពេលល្ងាច៖ ម៉ាកុស ១១៖១២-៣៣
ខចងចាំ៖ «ព្រះយេហូវ៉ាទ្រង់បានលេចមកឲ្យខ្ញុំឃើញកាលពីដើម ដោយព្រះបន្ទូលថា អើ អញបានស្រឡាញ់ឯង ដោយសេចក្តីស្រឡាញ់ដ៏ស្ថិតស្ថេរនៅអស់កល្ប ហេតុនេះបានជាអញទាញនាំឯងមកដោយសេចក្តីសប្បុរស»។ យេរេមា ៣១:៣
