ពួកជំនុំនៃព្រះគម្ពីរសញ្ញាថ្មីបានធ្វើបន្ទាល់សម្រាប់ព្រះយេស៊ូវ។ ព្រះគម្ពីរដែលជាព្រះបន្ទូលរបស់ព្រះគឺជាអ្នកគាំទ្រសម្រាប់ការធ្វើបន្ទាល់របស់ពួកគេ។ លោកពេត្រុសបានធ្វើបន្ទាល់ទៅកាន់សាសន៍យូដាដោយការអធិប្បាយនៅក្នុងបទគម្ពីរកិច្ចការ ៤។ ខទាំងនេះបានបង្ហាញថា ព្រះយេស៊ូវគឺជាព្រះអង្គសង្គ្រោះ។ ក្រោយមក លោកពេត្រុសបានមានប្រសាសន៍ថា «ព្រះអង្គបានប្រទានព្រះបន្ទូលមកឲ្យជនជាតិអ៊ីស្រាអែល» (កិច្ចការ ១០៖៣៦, គខប)។ បន្ទាប់មក លោកពេត្រុសបានចែកចាយរឿងជាមួយនឹងលោកកូនេលាសអំពីព្រះយេស៊ូវមានព្រះជន្មរស់ឡើងវិញ។ លោកស្ទេផានក៏បានធ្វើដូចជាលោកពេត្រុសផងដែរ។ គាត់បានអធិប្បាយអំពីប្រវត្តិសាស្ត្ររបស់សាសន៍អ៊ីស្រាអែលនៅក្នុងសម័យព្រះគម្ពីរ សញ្ញាចាស់ មុនពេលដែលគាត់ត្រូវបានគេចោលសម្លាប់ផងដែរ។ លោកប៉ុលបានមានប្រសាសន៍អំពីសេចក្តីសន្យានៃព្រះគម្ពីរសញ្ញាចាស់អំពីព្រះអង្គសង្គ្រោះផងដែរ។ លោកភីលីពក៏បានប្រើព្រះគម្ពីរសញ្ញាចាស់ ដើម្បីជួយអោយសាសន៍អេធីយ៉ូពីម្នាក់យល់សេចក្តីសន្យាអំពីព្រះអង្គសង្គ្រោះនៅក្នុងបទគម្ពីរអេសាយ ៥៣ផងដែរ។ សិស្សរបស់ព្រះយេស៊ូវបានប្រកាសអំពីសេចក្តីពិតរបស់ព្រះ តែមិនមែនជាសេចក្តី ពិតរបស់ពួកគេឡើយនៅក្នុងរឿងនីមួយៗ។ ព្រះគម្ពីរគឺជាអ្នកគាំទ្រសម្រាប់ការអធិប្បាយរបស់ពួកគេ។
សូមអានខគម្ពីរកិច្ចការ ៤៖៤, ៣១; កិច្ចការ ៨៖៤; កិច្ចការ ១៣៖៤៨, ៤៩; កិច្ចការ ១៧៖២; កិច្ចការ ១៨៖២៤, ២៥។ តើខទាំងនេះបង្រៀនយើងអ្វីខ្លះអំពីទំនាក់ទំនងរវាងព្រះវិញ្ញាណបរិសុទ្ធ ព្រះគម្ពីរ និងការធ្វើបន្ទាល់ដោយពួកជំនុំនៃព្រះគម្ពីរសញ្ញាថ្មី?
ព្រះវិញ្ញាណបរិសុទ្ធដដែលនេះជាអង្គដែលបាននាំមនុស្សអោយសរសេរព្រះគម្ពីរ ហើយក៏បានធ្វើអោយព្រះគម្ពីរផ្លាស់ប្តូរជីវិតរបស់មនុស្សផងដែរ។ ដ្បិតនៅក្នុងព្រះគម្ពីរមានអំណាចដែលផ្តល់អោយមានជីវិត។ តើហេតុអ្វីបានជាព្រះគម្ពីរមានអំណាចនេះ? ពីព្រោះព្រះវិញ្ញាណបានប្រទានអំណាចដល់ព្រះគម្ពីរ។ ព្រះគម្ពីរគឺជាព្រះបន្ទូលដ៏រស់របស់ព្រះយេស៊ូវ។
សូមអានខគម្ពីរពេត្រុសទី២ ១៖២១ និងហេព្រើរ ៤៖១២។ តើហេតុអ្វីបានជាព្រះគម្ពីរមានពេញដោយអំណាចគ្រប់គ្រាន់ដើម្បីផ្លាស់ប្តូរជីវិតរបស់មនុស្ស?
«អំណាចដដែលនេះដែលបានបង្កើតផែននេះគឺមាននៅក្នុងព្រះគម្ពីរ។ ព្រះបន្ទូលនេះបាន ប្រទានអំណាចដល់យើង។ ព្រះបន្ទូលបានចាប់ផ្តើមអោយមានជីវិតឡើង។ រាល់សេចក្តីបង្គាប់នៃគម្ពីរគឺជាសេចក្តីសន្យា។ យើងត្រូវតែយកព្រះបន្ទូលដាក់នៅក្នុងព្រលឹងរបស់យើងនៅពេលដែលយើងទទួលសេចក្តីសន្យារបស់ព្រះ។ រាល់សេចក្តីសន្យានឹងនាំជីវិតរបស់ព្រះចូលទៅក្នុងព្រលឹងរបស់យើង។ សេចក្តីសន្យានឹងផ្លាស់ប្តូរយើង។ សេចក្តីសន្យានឹងធ្វើអោយយើងបានកើតជាថ្មី។ បន្ទាប់មក យើងនឹងបានដូចជាព្រះនៅក្នុងចិត្តរបស់យើង»។ ដកស្រង់ពី Ellen G. White, Education, page 126, adapted។
ព្រះគម្ពីរមានអំណាចក្នុងការផ្លាស់ប្តូរជីវិតដោយសារតែព្រះវិញ្ញាណបានផ្លាស់ប្តូរយើងនៅពេលដែលយើងអានព្រះគម្ពីរ។ នេះគឺជាព្រះវិញ្ញាណដដែលដែលបានជួយមនុស្សអោយសរសេរព្រះគម្ពីរ។ ព្រះវិញ្ញាណនឹងធ្វើការនៅក្នុងជីវិតរបស់មនុស្ស នៅពេលដែលយើងចែកចាយអំពីសេចក្តីពិតជាមួយនឹងពួកគេផងដែរ។ ព្រះបានសន្យាថា នឹងប្រទានពរដល់ព្រះបន្ទូលរបស់ទ្រង់ តែមិនមែនជាពាក្យរបស់យើងនោះទេ។ អំណាចមាននៅក្នុងព្រះគម្ពីរតែមិនមាននៅក្នុងគំនិតរបស់មនុស្សនោះទេ។
ថ្ងៃព្រហស្បតិ៍ ទី៣០ ខែកក្កដា ឆ្នាំ២០២០
អំណាចក្នុងការផ្លាស់ប្តូរជីវិតរបស់ព្រះវិញ្ញាណបរិសុទ្ធ
កណ្ឌគម្ពីរកិច្ចការបានបង្ហាញថា ព្រះធ្វើការអស្ចារ្យតាមរយៈព្រះវិញ្ញាណរបស់ទ្រង់នៅក្នុងជីវិត របស់មនុស្ស។ កណ្ឌគម្ពីរកិច្ចការបានបង្ហាញយើងអំពីរបៀបដែលដំណឹងល្អបានយកឈ្នះលើគោលគំនិតខុសឆ្គងទាំងឡាយ។ ដំណឹងល្អក៏បានផ្លាស់ប្តូរទម្លាប់ដែលមានមួយជីវិតផងដែរ។ ដំណឹងល្អបានបង្រៀនមនុស្សគ្រប់គ្នាអំពីសេចក្តីមេត្តាករុណា សេចក្តីអត់ឱនទោស និងសេចក្តីពិតរបស់ព្រះ។ ព្រះវិញ្ញាណបរិសុទ្ធបានជួយមនុស្សតាមទីកន្លែងពួកគេរស់នៅ។ ប៉ុន្តែ ទ្រង់ពុំបានចាកចេញពីពួកគេនៅទីនោះឡើយ។ យើងត្រូវផ្លាស់ប្តូរដោយអំណាចនៃព្រះវិញ្ញាណបរិសុទ្ធ។
សូមអានខគម្ពីរកិច្ចការ ១៦៖១១-១៥; ២៣-២៤; កិច្ចការ ១៧៖៣៣, ៣៤ និងកិច្ចការ ១៨៖៨។ ខទាំងនេះគ្រាន់តែជារឿងនៃព្រះគម្ពីរមួយចំនួនតូចស្តីអំពីការផ្លាស់ប្តូរជីវិត។ តើរឿងទាំងនេះបង្រៀនយើងអ្វីខ្លះអំពីអំណាចរបស់ព្រះក្នុងការផ្លាស់ប្តូរជីវិតរបស់មនុស្សផ្សេងៗគ្នា?
ខទាំងនេះបានបង្ហាញយើងអំពីមនុស្សដែលមានភាពខុសគ្នាដាច់ដោយឡែក។ នាងលីឌាគឺជាអ្នកជំនួញដែលជោគជ័យម្នាក់។ អ្នកយាមគុកក្រុងភីលីពគឺជាពលរដ្ឋរ៉ូមុាំងវណ្ណៈកណ្តាល។ ព្រះវិញ្ញាណបរិសុទ្ធអាចពាល់ចិត្តរបស់មនុស្សពីគ្រប់ទាំងវណ្ណៈនៃសង្គម។ អំណាចរបស់ព្រះវិញ្ញាណបានផ្លាស់ប្តូរទាំងពួកបុរស និងស្ត្រី ទាំងអ្នកមាន និងអ្នកក្រ ព្រមទាំងអ្នកមានវិជ្ជា ឬអ្នកអវិជ្ជាផងដែរ។
មនុស្សពីរនាក់ចុងក្រោយនៅក្នុងបញ្ជីរបស់យើងគួរអោយភ្ញាក់ផ្អើលនិងអស្ចារ្យ។ ខគម្ពីរកិច្ចការ ១៧៖៣៤ បានបង្ហាញប្រាប់យើងអំពីលោកឌេវនីសនៃសាសន៍អើរីយ៉ូស។ ពួកអើរីយ៉ូសនៃក្រុងអាថែនគឺជាក្រុមចៅក្រមស្របច្បាប់ដែលវិនិច្ឆ័យរឿងក្តីនៅក្នុងតុលាការ។ ចៅក្រមទាំងនេះជាសមាជិកដ៏សំខាន់នៃក្រុងរបស់ពួកគេ។
ព្រះវិញ្ញាណបរិសុទ្ធបានធ្វើការតាមរយៈលោកប៉ុល ដើម្បីពាល់ចិត្តរបស់មនុស្សដ៏សំខាន់ទាំងនេះ។ គ្រីសប៉ុសគឺជាបុគ្គលម្នាក់នៅក្នុងចំណោមនោះ (កិច្ចការ ១៨៖៨)។ លោកគ្រីសប៉ុសគឺជាមេសាលាប្រជំុំរបស់ពួកជំនុំសាសន៍យូដា។ លោកគ្រីសប៉ុសបានកាន់តាមប្រពៃណីចាស់របស់សាសន៍យូដា។ ប៉ុន្តៃ ព្រះវិញ្ញាណបរិសុទ្ធបានផ្លាស់ប្តូរជីវិត និងគោលគំនិតរបស់គាត់។ រឿងទាំងនេះបានបង្ហាញយើងថា ព្រះវិញ្ញាណបរិសុទ្ធនឹងធ្វើរឿងដ៏ល្អអស្ចារ្យជាច្រើននៅក្នុងជីវិតរបស់អ្នកដទៃនៅពេលដែលយើងចែកចាយអំពីព្រះយេសូវ និងសេចក្តីពិតនៃព្រះគម្ពីរជាមួយនឹងពួកគេ។ យើងពុំអាចនិងមិនគួរធ្វើការស្មានអំពីអ្នកណាម្នាក់ដែលយើងគិតថាអាច ឬមិនអាចទទួលបានសេចក្តីសង្គ្រោះនោះទេ។ ភារកិច្្ចរបស់យើងគឺជាការធ្វើ បន្ទាល់ដល់អ្នកណាម្នាក់ និងមនុស្សគ្រប់គ្នាដែលព្រះបាននាំពួកគេចូលមកក្នុងជីវិតរបស់យើង។ ព្រះជាម្ចាស់នឹងបំពេញកិច្ចការដែលនៅសេសសល់។
ការសុគតរបស់ព្រះយេស៊ូវគឺសម្រាប់មនុស្សគ្រប់គ្នា។ តើសេចក្តីពិតមួយនេះបង្រៀនយើងអ្វីខ្លះអំពីមូលហេតុដែលយើងពុំគួរវិនិច្ឆ័យថា អ្នកណាម្នាក់ពុំអាចបានសង្គ្រោះ?
ថ្ងៃសុក្រ ទី៣១ ខែកក្កដា ឆ្នាំ២០២០
សិក្សាបន្ថែម
សូមអាន Ellen G. White, “The Gift of the Spirit,” pages 47-56, in The Acts of the Apostles; “ ‘Let Not Your Heart Be Troubled,’ “ pages 667-672, in The Desire of Ages។
ព្រះវិញ្ញាណបរិសុទ្ធបំពេញព្រះរាជកិច្ចជាមួយនឹងព្រះវរបិតា និងព្រះយេស៊ូវដែលជាព្រះរាជបុត្រាដើម្បីសង្គ្រោះយើង។ យើងបានសហការជាមួយនឹងព្រះវិញ្ញាណបរិសុទ្ធនៅក្នុងព្រះរាជកិច្ចរបស់ទ្រង់ក្នុងការសង្គ្រោះមនុស្សលោកនៅពេលដែលយើងធ្វើបន្ទាល់។ ទ្រង់នឹងពាល់ចិត្តរបស់មនុស្សលោក។ ទ្រង់ នឹងប្រទានឱកាសអោយយើងដើម្បីធ្វើបន្ទាល់ទៅកាន់មនុស្សលោក។ ព្រះគម្ពីរដែលជាបន្ទូលរបស់ទ្រង់នឹងបង្ហាញសេចក្តីពិតអំពីព្រះយេស៊ូវដល់មនុស្សលោក។ ព្រះវិញ្ញាណបរិសុទ្ធនឹងកាត់ផ្តាច់យើងចេញពីភាពជាទាសករទៅនឹងគោលគំនិតអាក្រក់ទាំងឡាយ។ ទ្រង់នឹងជួយអោយយើងយកឈ្នះសង្គ្រាមប្រឆាំងទាស់ នឹងគោលគំនិតខុសឆ្គងទាំងឡាយ។ ទ្រង់នឹងប្រោសអោយយើងមានសេរីភាពចេញពីទម្លាប់អាក្រក់ទាំងឡាយដែលធ្វើអោយយើងជាប់ចំណង។
យើងកំពុងតែធ្វើកិច្ចការជាមួយនឹងព្រះវិញ្ញាណបរិសុទ្ធនៅពេលដែលយើងធ្វើបន្ទាល់សម្រាប់ព្រះយេស៊ូវ។ ទ្រង់បានគង់នៅទីនោះមុនយើង។ ទ្រង់បានធ្វើអោយចិត្តរបស់យើងត្រៀមខ្លួនជាស្រេចសម្រាប់ដំណឹងល្អ។ ព្រះវិញ្ញាណបានគង់ជាមួយនឹងយើងនៅទីនោះ ដើម្បីជួយយើងអោយជ្រើសរើសគោលគំនិត និងពាក្យសម្តីទាំងឡាយដែលត្រឹមត្រូវ។ ទ្រង់បានជួយអោយយើងធ្វើសកម្មភាពដោយសប្បុរសដើម្បីជួយមនុស្សលោក។ ទ្រង់បានជួយយើង នៅពេលដែលយើងចែកចាយរឿងរបស់យើងអំពីរបៀបដែល ព្រះយេស៊ូវបានផ្លាស់ប្តូរជីវិតរបស់យើងផងដែរ។ ព្រះវិញ្ញាណបរិសុទ្ធបានគង់ជាមួយនឹងយើង នៅពេលដែលយើងបង្រៀនព្រះគម្ពីរផងដែរ។ ទ្រង់បានគង់ជាមួយនឹងយើងនៅពេលដែលយើងអោយកូនសៀវភៅ តូចមួយអំពីសេចក្ដីពិតក្នុងព្រះគម្ពីរទៅកាន់អ្នកណាម្នាក់។ ទ្រង់បានគង់ជាមួយនឹងយើង នៅពេលដែលយើងចែកចាយសេចក្តីពិតនៃព្រះគម្ពីរជាមួយនឹងមនុស្សនៅគ្រប់ទីកន្លែងនៅលើផែនដី។ ព្រះវិញ្ញាណនឹងបន្តធ្វើការនៅក្នុងចិត្តរបស់មនុស្សជាយូរមកហើយមុនពេលដែលយើងបានចាកចេញពីពួកគាត់ទៅ។ ទ្រង់នឹងធ្វើអ្វីៗគ្រប់យ៉ាងដែលអាចទៅរួចដើម្បីសង្គ្រោះបុគ្គលម្នាក់នោះ។
សំនួរពិភាក្សា៖
- សូមលោកអ្នកនិយាយអំពីគ្រាមួយនៅពេលដែលលោកអ្នកមានអារម្មណ៍ថា ព្រះវិញ្ញាណបរិសុទ្ធបានធ្វើការតាមរយៈវិធីដ៏មានអំណាចមួយនៅក្នុងជីវិតរបស់លោកអ្នកនៅពេលដែលលោកអ្នកធ្វើបន្ទាល់ទៅកាន់អ្នកណាម្នាក់។
- តើលោកអ្នកធ្លាប់មានអារម្មណ៍ភ័យខ្លាចក្នុងការចែកចាយសេចក្តីជំនឿរបស់លោកអ្នកដែរឬទេ? តើការដឹងអំពីព្រះរាជកិច្ចរបស់ព្រះវិញ្ញាណបរិសុទ្ធបានបពា្ឈប់សេចក្តីភ័យខ្លាចនោះយ៉ាងដូចម្តេច? តើព្រះរាជកិច្ចរបស់ព្រះវិញ្ញាណបរិសុទ្ធបានលើកទឹកចិត្តដល់លោកអ្នកនៅក្នុងការធ្វើបន្ទាល់របស់លោកអ្នកយ៉ាងដូចម្តេច?
- សប្តាហ៍នេះ យើងបានពិពណ៌នាអំពី «ព្រះរាជកិច្ច» របស់ព្រះវិញ្ញាណបរិសុទ្ធតាមរយៈកាធ្វើបន្ទាល់ របស់យើង។ តើមានវិធីផ្សេងគ្នាណាខ្លះដែលព្រះវិញ្ញាណធ្វើការជាមួយនឹងយើងតាមរយៈកិច្ចការនៃការធ្វើបន្ទាល់របស់យើងសម្រាប់ព្រះយេស៊ូវ?
- តើហេតុអ្វីបានជាព្រះគម្ពីរមានសារៈសំខាន់សម្រាប់សេចក្តីជំនឿ និងសេចក្តីបន្ទាល់របស់យើង?
រឿងខ្លី
សុបិន៤យប់ជាប់គ្នា
ក្តីសុបិនដំបូងបានកើតឡើងបន្ទាប់ពីលោកអ័ប្រាហាំ ខេតា (Abraham Keita) បានក្រោកឡើងនៅម៉ោង៣ព្រឹកសម្រាប់ការអធិស្ឋានដូចសព្វដងនៅលើកន្ទេលអធិស្ឋានរបស់គាត់នៅឯភូមិ ប៊ូហ្វា (Bufa) ដែលជាភូមិមួយនៅក្នុងប្រទេសហ្គីនា (Guinea) នៃទ្វីបអាហ្វ្រិកខាងលិច។
លោកអ័ប្រាហាំបានអធិស្ឋានថា «ឱព្រះអង្គអើយ ទូលបង្គំអាយុជាង៤០ឆ្នាំហើយ។ ទូលបង្គំគ្មានប្រពន្ធ ឬកូន ឬការងារ ឬប្រាក់ណាឡើយ។ សូមទ្រង់ជួយដល់ទូលបង្គំ។ ទូលបង្គំចង់អោយព្រះអង្គធ្វើអោយទូលបង្គំក្លាយទៅជាហោរាម្នាក់ដែលអាចនិយាយទៅកាន់អ្នកដទៃបានតាមរយៈទ្រង់»។
ខ្យល់បានចាប់ផ្តើមបក់នៅពេលគាត់អធិស្ឋាន។ គាត់មានអារម្មណ៍ល្វើយ ហើយលង់លក់នៅលើកន្ទេលនោះទៅ។ រំពេចនោះ មនុស្សម្នាក់បានកេះគាត់ហើយនិយាយថា «កូនអើយ ចូរទៅខាងក្នុងហើយគេងនៅលើគ្រែរបស់ឯងទៅ»។
ប៉ុន្មាននាទីក្រោយមក គាត់កំពុងតែគេងនៅលើគ្រែរបស់គាត់ ហើយគាត់បានសុបិន។ នៅក្នុងសុបិន មនុស្សម្នាក់ដែលមានព្រះនេត្រមើលទៅដូចជាភ្លើងបានចូលមកជិតគាត់។ លោកអ័ប្រាហាំបានគិតថា គាត់នឹងត្រូវបុគ្គលម្នាក់នោះធ្វើបាបជាមិនខាន។ លោកអ័ប្រាហាំបានសួរទៅបុគ្គលនោះដោយភ័យខ្លាចថា «តើអ្នកជាអ្នកណា?»។ បុគ្គលម្នាក់នោះបានតបថា «យើងគឺជាព្រះយេស៊ូវ»។
លុះព្រឹកឡើង លោកអ័ប្រាហាំបានឆ្ងល់ថា តើនឹងមានរឿងអ្វីកើតឡើងបន្ទាប់។ គាត់បានមានសុបិនមួយទៀត នៅយប់បន្ទាប់ទៀត។ គាត់បានសុបិនឃើញបុគ្គលម្នាក់នោះម្តងទៀត។ លើកនេះទាំងពីរនាក់បានដើរតាមច្រកភ្នំដ៏ខ្ពស់មួយ។
នៅយប់ទីបី គាត់បានសុបិនថា គាត់កំពុងតែស្វែងរកការងារ ហើយព្រះយេស៊ូវគឺជាអ្នកជួលកម្មករធ្វើការ។ លោកអ័ប្រាហាំបានសុបិនឃើញព្រះយេស៊ូវគង់នៅនឹងតុ ទ្រង់កំពុងតែស្រង់ឈ្មោះរបស់កម្មករ និងចុះឈ្មោះពួកគេ។
នៅយប់ទីបួន លោកអ័ប្រាហាំបានឃើញព្រះយេស៊ូវគង់នៅពេញក្នុងទឹកនៃមហាសមុទ្រអាត្លង់ទិច។ ព្រះយេស៊ូវបានទតមើលគាត់ ហើយគាត់បានសម្លឹងមើលទៅឯព្រះយេស៊ូវវិញ។
៣ឆ្នាំបានកន្លងផុតទៅ។ លោកអ័ប្រាហាំបានប្តូរទៅនៅឯកូនាគ្រី (Conakry) ដែលជារាជធានីនៃប្រទេសហ្គីនា ហើយគាត់ត្រូវបានគេជួលអោយធ្វើជាកម្មករសំណង់។ គាត់បានជួបលោកត្រេន ខ្វេល ហ្វាសីណាឌូណូ (Tranqulle Fassinadouno) ដែលជាអ្នកត្រួសត្រាយនៃបេសកកម្មពិភពលោកនៅតាមផ្លូវទៅផ្ទះបន្ទាប់ពីចេញពីធ្វើការមក។
លោកត្រេនខ្វេលបានសួរគាត់ថា «តើអ្នកសុខសប្បាយឬទេ? ខ្ញុំគឺជាគ្រីស្ទាន។ តើអ្នកចង់ទៅលេងព្រះវិហាររបស់ខ្ញុំទេ?»។ ខ្ញុំបានតបទៅវិញថា «តើខ្ញុំអាចទៅបានយ៉ាងដូចម្តេច? ខ្ញុំជាអ្នកជឿសាសនាដទៃ។ ខ្ញុំអត់យល់ថា អ្នកកំពុងតែនិយាយអំពីអ្វីនោះទេ»។
ទោះយ៉ាងណា ពេលទៅដល់ផ្ទះគាត់បាននឹកឃើញសុបិនរបស់គាត់អំពីព្រះយេស៊ូវ។ បន្ទាប់មក គាត់បានសំរេចចិត្តទៅព្រះវិហាររបស់អ្នកត្រួសត្រាយនៃបេសកកម្មពិភពលោកដើម្បីអោយបានដឹងថា តើព្រះវិហារបង្រៀនអំពីអ្វី។ គាត់ត្រូវបានគេស្វាគមន៍យ៉ាងកក់ក្តៅហើយគាត់បានចូលចិត្តព្រះបន្ទូលដែលគាត់បានឮនៅឯព្រះវិហារ។ គាត់បានត្រឡប់មកវិញជារៀងរាល់ថ្ងៃសប្បាតហ៍បន្ទាប់ពីពេលនោះមកគាត់បានថ្វាយចិត្តរបស់គាត់ដល់ព្រះយេស៊ូវ។
