«អញនឹងធ្វើឲ្យឯង ហើយនិងស្ត្រី គឺទាំងពូជឯង និងពូជនាងមានសេចក្តីខ្មាំងនឹងគ្នា ពូជនាង នឹងកិនក្បាលឯង ហើយឯងនឹងចឹកកែងជើងគេ» (លោកុប្បត្តិ ៣៖១៥)។ តើព្រះអម្ចាស់កំពុងតែមានបន្ទូលយ៉ាងដូចម្តេច ទៅកាន់សត្វពស់? តើតម្រុយនៃសេចក្តីសង្ឃឹមអ្វីដែលយើងបានឃើញនៅក្នុងបណ្តាសានេះ?
សត្វពស់បានចាប់ផ្តើមបង្កភាពរញេ៉រញ៉ៃទាំងមូលនៅក្នុងសួនច្បារអេដែន។ ម្ល៉ោះហើយ ព្រះបានចាប់ផ្តើមកិច្ចការរបស់ទ្រង់ជាមួយនឹងសត្វពស់មុនគេ។ តើលោកអ្នកបានឃើញដែរឬទេថា សត្វពស់គឺជាតួអង្គមួយគត់នៅក្នុងរឿងដែលបានដាក់បណ្តាសា?
ខគម្ពីរលោកុប្បត្តិ ៣៖១៥ បានបង្ហាញយើងអំពីភាពបញ្ច្រាសនៃអ្វីដែលបានកើតឡើងនៅពេលដែលព្រះបានបង្កើតផ្ទៃមេឃ និងផែនដី។ នៅពេលនោះព្រះបានបំពេញផ្ទៃមេឃ និងផែនដីជាមួយនឹង ជីវិត របស់ល្អៗ និងព្រះពរ។ ឥឡូវនេះ ព្រះបានជំនុំជម្រះសត្វពស់។ ការប្រកាសទាស់នឹងសត្វពស់បាននាំទៅរកសេចក្តីស្លាប់សេចក្តីអាក្រក់ និងបណ្តាសាវិញ។ យើងបានឃើញរួចមកហើយថា ព្រះក៏រាប់បញ្ចូលសេចក្តីសន្យាមួយសម្រាប់យើងនៅក្នុងបណ្តាសារបស់ទ្រង់ទាស់នឹងសត្វពស់ផងដែរ។ បណ្តាសាគឺជាសារដ៏ពិសេសស្តីអំពីអនាគតគឺថា៖ ព្រះនឹងសង្គ្រោះមនុស្សលោក (លោកុប្បត្តិ ៣៖១៥)។ តើលោកអ្នកឃើញថា ព្រះបានប្រទានសេចក្តីសង្ឃឹមនេះដល់លោកអ័ដាម និងនាងអេវ៉ាមុនពេលដែលទ្រង់ជំនុំជម្រះ ពួកគេដែរឬទេ? មែនហើយ លោកអ័ដាម និងនាងអេវ៉ាបានធ្វើបាប។ មែនហើយពួកគេនឹងត្រូវឈឺចាប់ដោយសារតែពួកគេបានធ្វើបាប។ មែនហើយ ពួកគេក៏នឹងត្រូវស្លាប់ផងដែរ។ ប៉ុន្តែ ព្រះបានប្រទានសេចក្តីសង្ឃឹមមួយដល់ពួកគេដែលថា ទ្រង់នឹងសង្គ្រោះពួកគេនៅគ្រាចុងក្រោយ។
សូមអានខគម្ពីរលោកុប្បត្តិ ៣៖១៥ ជាមួយនឹងរ៉ូម ១៦៖២; ហេព្រើរ ២៖១៤ និងវិវរណៈ ១២៖១៧។ តើខទាំងនេះបានបង្ហាញយើងយ៉ាងដូចម្តេចដែរអំពីផែនការរបស់ព្រះក្នុងការសង្គ្រោះយើង និងសង្គ្រាមរវាងសេចក្តីល្អ និងសេចក្តីអាក្រក់នោះ?
តើលោកអ្នកឃើញអំពីរបៀបដែលខគម្ពីរលោកុប្បត្តិ ៣៖១៥ និងវិវរណៈ ១២៖១៧ បានបង្ហាញយើងអំពីរូបស័ព្ទ និងគោលគំនិតដូចគ្នាដែរឬទេ? ចូរយើងក្រឡេកមើលពីរបៀបដែលផ្នែកនីមួយៗនៅក្នុងខទាំងនេះត្រូវរូវគ្នា៖
សង្គ្រាមរវាងសត្វពស់ និងស្ត្រីនឹងបន្តរហូតដល់គ្រាចុងក្រោយ។ ព្រះបានសន្យាថា សាតាំង នឹងចាញ់សង្គ្រាមនេះ។ ដ្បិតព្រះយេស៊ូវនឹងកិនក្បាលពស់ (រិវរណៈ ២០៖១០)។
ព្រះបានប្រទានសេចក្តីសង្ឃឹមមួយដល់យើងនៅក្នុងសួនច្បារអេដែន គឺជាកន្លែងដែលអំពើបាប និងសេចក្តីបានចាប់ផ្តើមឡើងនៅលើផែនដីនេះ។ តើហេតុអ្វីបានជាសេចក្តីពិតនៃព្រះគម្ពីរនេះអាចកំសាន្តចិត្តរបស់យើងបាន?
ថ្ងៃព្រហស្បតិ៍ ទី៧ ខែមេសា ឆ្នាំ២០២២
ផែនការរបស់ព្រះសម្រាប់មនុស្សលោក
តើមានអ្វីកើតឡើងចំពោះលោកអ័ដាម និងនាងអេវ៉ា ដោយសារតែអំពើបាបរបស់ពួកគេ? សម្រាប់ចម្លើយសូមអានខគម្ពីរលោកុប្បត្តិ ៣៖១៥-២៤។
--------------------------------------------------------
ព្រះបានដាក់ទណ្ឌកម្មមួយដល់សត្វពស់ដែលដូចគ្នាទៅនឹងបណ្តាសាមួយយ៉ាងដូច្នេះដែរ (លោកុប្បត្តិ ៣៖១៤)។ ប៉ុន្តែ ព្រះបានដាក់ទណ្ឌកម្មខុសគ្នាមួយដល់បុរស និងស្ត្រី។ ទណ្ឌកម្មរបស់ពួកគេមិនមែនជាបណ្តាសានោះទេ។ ព្រះបានមានបន្ទូលតាមរយៈលោកម៉ូសេថា «បណ្តាសា» តែម្តងទៀតប៉ុណ្ណោះនៅក្នុងកណ្ឌគម្ពីរលោកុប្បត្តិ ដើម្បីបង្ហាញយើងថា ព្រះដាក់បណ្តាសាដល់ «ដី» (លោកុប្បត្តិ ៣៖១៧)។ ព្រះមានផែនការដ៏ប្រសើរសម្រាប់បុរស និងស្ត្រីជាងផែនការដែលទ្រង់មានសម្រាប់សត្វពស់ទៅទៀត។ ព្រះបានផ្តល់សេចក្តីសង្ឃឹមដល់លោកអ័ដាម និងនាងអេវ៉ាដែលទ្រង់មិនបានផ្តល់ដល់សត្វពស់។
ស្ត្រីបានធ្វើបាបដោយសារតែទំនាក់ទំនងរបស់នាងជាមួយនឹងសត្វពស់។ ដូច្នេះ ព្រះដាក់ទណ្ឌកម្មដល់ស្ត្រីភ្ជាប់ទៅនឹងបណ្តាសាដែលព្រះបានដាក់ទៅលើសត្វពស់។ នេះគឺជាមូលហេតុដែលសារដ៏ពិសេសស្តីអំពីស្ត្រីនៅក្នុងខគម្ពីរលោកុប្បត្តិ ៣៖១៦ បានបង្ហាញយើងនូវសារដ៏ពិសេសស្តីអំពីព្រះអង្គសង្គ្រោះនៅក្នុងខគម្ពីរលោកុប្បត្តិ ៣៖១៥។ ទំនាក់ទំនងនេះអាចជួយអោយយើងមើលឃើញថា អ្វីៗគ្រប់យ៉ាងដែលព្រះបានមានបន្ទូលអំពីស្ត្រីនោះ គឺជាផ្នែកមួយនៃផែនការនាពេលអនាគតរបស់ទ្រង់ក្នុងការសង្គ្រោះមនុស្សលោក (សូមប្រៀបធៀបជាមួយខគម្ពីរធីម៉ូថេទី១ ២៖១៤, ១៥)។
បុរសបានធ្វើបាប ដោយសារតែគាត់បានស្តាប់បង្គាប់ស្ត្រីជាជាងស្តាប់បង្គាប់ព្រះ។ ដូច្នេះ ព្រះបានដាក់ទោសបុរសតាមរយៈការដាក់បណ្តាសាទៅលើដី ពីព្រោះទ្រង់បានបង្កើតលោកអ័ដាមចេញពីដីមក (លោកុប្បត្តិ ៣៖១៧)។ ឥឡូវនេះ បុរសបានត្រូវតែប្រឹងប្រែងធ្វើការអស់មួយជីវិតរបស់គាត់ (លោកុប្បត្តិ ៣៖១៧-១៩)។ បន្ទាប់មក គាត់នឹងត្រឡប់ទៅជាដីវិញ នៅពេលដែលស្លាប់ទៅ (លោកុប្បត្តិ ៣៖១៩)។ សេចក្តីស្លាប់មិនមែនជាផ្នែកមួយនៃផែនការរបស់ព្រះសម្រាប់មនុស្សលោកនោះឡើយ។
ស្ត្រីគឺជារូបស័ព្ទតំណាងអោយជីវិត និងសេចក្តីអាណិតអាសូរ (លោកុប្បត្តិ ៣៖២០)។ បុត្រាមួយនឹងត្រូវបានប្រសូតមកតាមរយៈស្ត្រីម្នាក់ពីពូជអំបូររបស់នាងអេវ៉ានាពេលអនាគត។ បុត្រានេះនឹងក្លាយមកជាព្រះអង្គសង្គ្រោះនៃផែនដីទាំងមូល។ ទ្រង់នឹងសង្គ្រោះមនុស្សលោកចេញពីបណ្តាសានៃអំពើបាប និងសេចក្តីស្លាប់។
ព្រះចង់បានតែសេចក្តីល្អសម្រាប់លោកអ័ដាម និងនាងអេវ៉ាប៉ុណ្ណោះ តែទ្រង់មិនចង់បានសេចក្តីអាក្រក់ឡើយ។ លោកអ័ដាម និងនាងអេវ៉ាគ្មានហេតុផលត្រូវសង្ស័យចំពោះសេចក្តីស្រឡាញ់របស់ព្រះ ឬព្រះបន្ទូលដែលទ្រង់បានមានបន្ទូលដល់ពួកគេនោះឡើយ។ ប៉ុន្តែ ឥឡូវនេះលោកអ័ដាម និងនាងអេវ៉ាបានស្គាល់សេចក្តីអាក្រក់ហើយ។ ដូច្នេះ ព្រះនឹងធ្វើអ្វីៗគ្រប់យ៉ាង ដើម្បីសង្គ្រោះពួកគេចេញពីអំពើបាប។ យើងបានឃើញសេចក្តីពិតនៃព្រះគម្ពីរនេះនៅក្នុងទណ្ឌកម្មដែលព្រះបានដាក់អោយអ័ដាម និងនាងអេវ៉ា។ ទណ្ឌកម្មទាំងនេះបានបង្ហាញយើងអំពីសេចក្តីសង្ឃឹមដែលព្រះប្រទានដល់ឪពុកម្តាយដើមរបស់យើង និងដល់យើងរាល់គ្នា។
យើងតែងតែគិតថា «ចំណេះដឹង» ល្អជានិច្ចមែនទេ? តើហេតុអ្វីបានជាចំណេះដឹងមិនល្អគ្រប់ ពេលនោះទេ ដូចដែលអំពើបាបរបស់លោកអ័ដាម និងនាងអេវ៉ាដែលបានបង្ហាញយើងនោះ? តើរឿងអ្វីខ្លះដែលយើងមិនគួរដឹងនោះ?
ថ្ងៃសុក្រ ទី៨ ខែមេសា ឆ្នាំ២០២២
សិក្សាបន្ថែម
សូមប្រៀបធៀបដើមជីវិតទៅនឹងដើមដឹងខុសត្រូវ។ ដើមឈើទាំង២នេះស្ថិតនៅចំ កណ្តាលសួរច្បារអេដែន (លោកុប្បត្តិ ២៖៩)។ នៅពេលដែលមនុស្សលោកដំបូងបានបរិភោគផ្លែដែលបានហាមឃាត់រួចមក ព្រះលែងអនុញ្ញាតអោយពួកគេបរិភោគផ្លែពីដើមជីវិតតទៅទៀតបានឡើយ។ សេចក្តី ពិតនៃព្រះគម្ពីរបានបង្រៀនយើងនូវក្បួនច្បាប់ដ៏សំខាន់មួយ គឺថា៖ ជម្រើសខាងឯវិញ្ញាណរបស់យើងមាន ទំនាក់ទំនងទៅនឹងសុខភាព និងរូបកាយរបស់យើង។ ជម្រើសទាំងនេះអាចធ្វើអោយរឹងមាំ ឬចុះខ្សោយ បាន។ ជម្រើសទាំងនេះអាចនាំយើងទៅរកជីវិត ឬសេចក្តីស្លាប់បាន។ ស្តេចសាឡូម៉ូនបានយល់អំពីទំនាក់ ទំនងនេះយ៉ាងច្បាស់។ នេះគឺជាមូលហេតុដែលនាំអោយទ្រង់មានបន្ទូលប្រាប់បុត្រារបស់ទ្រង់យ៉ាងដូច្នេះ ថា៖ «កូនអើយ កុំឲ្យភ្លេចឱវាទអញឡើយ គួរឲ្យចិត្តឯងកាន់តាមបណ្តាំរបស់អញទាំងប៉ុន្មាន ដ្បិតសេចក្តី ទាំងនោះនឹងបន្ថែមឲ្យឯងបានថ្ងៃវែង និងអាយុយឺនយូរ ព្រមទាំងសេចក្តីសុខផង» (សុភាសិត ៣៖១, ២)។ ក្រុងយេរូសាឡិមថ្មីក៏បានបង្ហាញយើងអំពីទំនាក់ទំនងនេះផងដែរ រវាងជម្រើសខាងឯវិញ្ញាណ និងសុខភាព របស់យើង។ យើងនឹងឃើញតែដើមជីវិតមួយគត់នៅក្នុងក្រុងដ៏បរិសុទ្ធនោះ (វិវរណៈ ២២៖២)។
«នៅពេលដែលព្រះបង្កើតនាងអេវ៉ា ទ្រង់មិនបានបង្កើតអោយនាងអន់ជាង ឬប្រសើរជាង បុរសនោះទេ។ នាងអេវ៉ាត្រូវគ្នានឹងលោកអ័ដាមគ្រប់យ៉ាង។ ព្រះមិនបានរៀបចំផែនការអោយប្តីប្រពន្ធដ៏បរិសុទ្ធមួយគូនេះមានចំណាប់អារម្មណ៍ខុសពីគ្នានោះទេ។ ទន្ទឹមគ្នានេះ ព្រះបានបង្កើតពួកគេមកអោយ ចេះគិត និងធ្វើកិច្ចការដោយខ្លួនគេផ្ទាល់។ ប៉ុន្តែ នាងអេវ៉ាបានធ្វើបាប។ ដោយសារតែនាងបានធ្វើបាបមុនគេនេះហើយ បានជាព្រះមានបន្ទូលប្រាប់នាងថា លោកអ័ដាមនឹងធ្វើជាអ្នកគ្រប់គ្រងនៅក្នុងអាពាហ៍-ពិពាហ៍របស់ពួកគេ។ ព្រះបានមានបន្ទូលប្រាប់នាងអេវ៉ាថា នាងត្រូវតែគោរពប្តីរបស់នាង។ ទណ្ឌកម្មនេះ គឺជាផ្នែកមួយនៃបណ្តាសាដែលបណ្តាលមកពីអំពើបាប។ បណ្តាសាបានធ្វើអោយជីវិតរបស់ស្ត្រីជួបនឹង ការលំបាកគ្រប់សព្វបែបយ៉ាង។ ជីវិតរបស់នាងតែងតែមានអារម្មណ៍ថា មានបន្ទុកដ៏ធ្ងន់មួយជានិច្ច។ បុរស បានបញ្ចេញអាកប្បកិរិយាដូចគេជាស្តេចដ៏មានអំណាចមួយអង្គដូច្នេះដែរ រីឯស្ត្រីវិញគឺជាអ្នកបម្រើរបស់គេទៅវិញ។ ដកស្រង់ពី Ellen G. White, Testimonies for the Church, volume 3, page 484, adapted។
សំនួរពិភាក្សា៖
- ព្រះបានយាងមកសួរសំណួរដល់លោកអ័ដាម។ ព្រះចង់អោយសំណួរទាំងនោះជួយអោយលោកអ័ដាម មើលឃើញកំហុសរបស់គាត់។ ព្រះក៏បានសួរសំណួរ ដើម្បីជួយអោយលោកអ័ដាមបែរចេញពីអំពើបាប របស់គាត់ផងដែរ។ ព្រះក៏បានប្រើផែនការដដែលនេះនៅក្នុងរឿងនៃព្រះគម្ពីរដទៃទៀតផងដែរ។ យើងបាន ឃើញព្រះសួរសំណួរនៅក្នុងរឿងរបស់លោកកាអ៊ីន (លោកុប្បត្តិ ៤៖៩, ១០) រឿងនៃទឹកជំនន់ (លោកុប្បត្តិ ៦៖៥-៨) រឿងនៃប៉មបាបិល (លោកុប្បត្តិ ១១៖៥) និងរឿងនៃក្រុងសូដុំម និងក្រុងកូម៉ូរ៉ា (លោកុប្បត្តិ ១៨៖២១)។ រឿងទាំងអស់នេះបានបង្ហាញយើងអំពីកិច្ចការនាពេលអនាគតដែលព្រះត្រូវធ្វើ នៅពេលដែលទ្រង់ ជំនុំជម្រះផែនដីនៅក្នុងសម័យចុងក្រោយ។ តើលោកអ្នកបានឃើញកិច្ចការដ៏ពិសេសរបស់ព្រះក្នុងនាមជា ចៅក្រមរបស់យើងនៅក្នុងរឿងទាំងនេះដោយរបៀបណាដែរ?
- តើហេតុអ្វីបានជានាងអេវ៉ាគិតថា នាងនឹងទទួលបានចំណេះដឹង ប្រសិនបើនាងបរិភោគផ្លែពីដើមដឹង ខុសត្រូវនោះ? តើយើងអាចជៀសវាងពីការធ្វើកំហុសដូចគ្នានេះនៅក្នុងជីវិតរបស់យើងដោយរបៀបណា?
រឿងខ្លី
ការអន់ឱនទោសនៅក្នុងគុក ភាគ១
ពួកអ្នកស្ម័គ្រចិត្តបានជ្រើសរើសក្រដាសដែលមានឈ្មោះអ្នកទោសដែលបានចុះឈ្មោះសិក្សាព្រះគម្ពីរនៅក្នុងគុក ប្រទេសអេស្ប៉ាញ។ ប៉ុន្តែ គ្មានអ្នកណាម្នាក់លូកយកក្រដាសឈ្មោះមួយនោះទាល់តែ សោះ។ លោកដាន់តេ ម៉ាវីន ហឺម៉ាន់ (Dante Marvin Herrmann) ដែលជាសិស្សម្នាក់នៅឯមហាវិទ្យាល័យ អាត់វេនទីស្ទសាហ្គាន់តូអាយុ៣៦ឆ្នាំបានសួរថា «អត់មានអ្នកណាចង់ទៅសួរសុខទុក្ខបុរសម្នាក់នេះទេឬអី?» អ្នកស្ម័គ្រចិត្តម្នាក់បានឆ្លើយឡើងថា «គាត់តែងតែមើលងាយព្រះជានិច្ច»។ លោកដាន់តេបានអធិស្ឋាន ហើយមានអារម្មណ៍ថា មានសំឡេងតូចមួយបាននិយាយថា «ចូរទៅសួរសុខទុក្ខលោកម៉ាធា (Matias)ចុះ»។
អ្នកយាមគុកម្នាក់បាននាំលោកម៉ាធាដែលជាបុរសវ័យក្មេង និងកោរសក់ស្អាតបាតម្នាក់មកជួប លោកដាន់តេនៅក្នុងបន្ទប់ទទេស្អាតមួយដែលមានរបាំងការពារសុវត្ថិភាព។ លោកម៉ាធាមិនមានស្នាម សាក់ ឬទឹកមុខកាចសាហាវដូចជាឃាតករ និងអ្នកទោសដទៃទៀតដែលបានដាក់នៅក្នុងរបាំងការពារនោះឡើយ។ លោកដាន់តេបាននិយាយទៅកាន់គាត់ថា «ប្អូនមើលទៅមិនដូចជាអ្នកទោសដទៃទៀតឡើយ»។ ម៉ាធាបានសើច រួចនិយាយថា «អ្នកមិនដឹងថា ខ្ញុំជាអ្នកណាទេ»។ លោកដាន់តេបាននិយាយ ទៀតថា «ខ្ញុំមិនខ្វល់ថា ប្អូនជាអ្នកណា ឬបានធ្វើអ្វីនោះទេ ពីព្រោះយើងទាំងអស់គ្នាសុទ្ធតែមានកំហុសរៀងៗ ខ្លួននៅក្នុងជីវិតរបស់យើង ហើយយើងក៏មិនអាចផ្លាស់ប្តូរអតីតកាលបានដែរ»។ លោកម៉ាធាបានខិតទៅ ជិតនឹងលោកដាន់តេ។ គាត់បានឃើញស្នាមសាក់ពណ៌ខៀវព័ទ្ធជំុវិញដៃ និងស្នាមចោះត្រចៀកខាងឆ្វេង របស់គាត់។ ម៉ាធាបានសួរថា «តើអ្នកមកពីពួកជំនុំសេវេនដេយអាត់វេនទីស្ទ មែនទេ? អ្នកមើលទៅមិន ដូចជាពួកអាត់វេនទីស្ទដទៃទៀតសោះ។
លោកដាន់តេបានតបទៅវិញថា «ព្រះបានផ្លាស់ប្តូរយើងម្នាក់ៗ»។ ពេលនោះ គាត់បានរៀបរាប់អំពីរបៀបដែលគាត់បានលក់ព្រលឹងរបស់គាត់ទៅអោយអារក្សនៅអាយុ១៧ឆ្នាំ គាត់បានចូលក្រុម បងធំនៅតាមដងផ្លូវ និងបានធ្វើជាអ្នកលក់ថ្នាំញៀន មុនពេលដែលគាត់បានរកឃើញសេចក្តីស្រឡាញ់ របស់ព្រះនៅក្នុងព្រះគម្ពីរ និងក្លាយមកជាអាត់វេនទីស្ទ។ នៅពេលដែលគាត់រៀបរាប់ចប់ វេលាសម្រាប់ថ្នាក់ព្រះគម្ពីរក៏ផុតផងដែរ។ លោកម៉ាធាបានសួរថា «តើលោកគ្រូអាចមកសួរសុខទុក្ខខ្ញុំម្តងទៀតបានទេ? ពីព្រោះខ្ញុំចង់រៀនអំពីព្រះដ៏អាថ៌កំបាំងនេះដែលលោកគ្រូបានប្រាប់ខ្ញុំ។ ខ្ញុំមិនដែលធ្លាប់ឮអំពីព្រះប្រកប ដោយសេចក្តីស្រឡាញ់ពីមុនមកនោះទេ។ ខ្ញុំធ្លាប់តែឮអំពីព្រះពោរពេញទៅដោយកំហឹង និងចូលចិត្តថ្កោល ទោសគេ»។
លោកដាន់តេបានសន្យាថា នឹងត្រឡប់មកវិញនៅថ្ងៃសប្បាតហ៍បន្ទាប់ទៀត។ ពេលត្រឡប់ ទៅឯមហាវិទ្យាល័យវិញ លោកដាន់តេបានប្រាប់លោកគ្រូម្នាក់អំពីលោកម៉ាធា។ លោកគ្រូបានសួរទៅ គាត់ថា «តើអ្នកដឹងថា ម៉ាធាជាអ្នកណាទេ?»។ នៅពេលដែលលោកដាន់តេងក់ក្បាល លោកគ្រូម្នាក់នោះ បានណែនាំគាត់អោយស្រាវជ្រាវរកព័ត៌មានអនឡាញមួយទាក់ទងនឹងលោកម៉ាធានេះ។ ការស្រាវជ្រាវ អនឡាញបានជំរុញអោយលោកដាន់តេអធិស្ឋានថា «ឱព្រះអង្គអើយ នេះគឺជារឿងដ៏ធ្ងន់ធ្ងរមួយ តើហេតុអ្វីបានជាទ្រង់ចាត់ទូលបង្គំទៅឯអ្នកទោសម្នាក់នេះយ៉ាងដូច្នេះ?»។ គាត់ក៏មានអារម្មណ៍ថា មានសំឡេងតូចមួយតបគាត់វិញដែរថា «ឱដាន់តេអើយខ្ញុំបានប្រទានព្រះគុណដល់អ្នក ដោយសារតែខ្ញុំបានអត់ឱនទោសអោយអ្នកហើយ ដូច្នេះ ខ្ញុំក៏អាចអត់ឱនទោសអោយគាត់បានដែរ»។
អំណានដង្វាយប្រចាំសប្តាហ៍
ការចែកចាយដំណឹងល្អរបស់ព្រះ
ជារៀងរាល់ថ្ងៃ ព្រះបានប្រើប៉ុស្តិ៍នៃសេចក្តីសង្ឃឹម (Hope Channel) ដែលជាព័ន្ធកិច្ច នៃប្រព័ន្ធផ្សព្វផ្សាយដំណឹងល្អជាសកល ដើម្បីផ្សាយសារនៃសេចក្តីសង្ឃឹម និងសេចក្តីស្រឡាញ់ មកពីព្រះដល់អ្នកទស្សនារាប់ពាន់នាក់។ បេសកកម្មរបស់ព្រះយេស៊ូវ «ចំរូតធំណាស់» (លូកា ១០៖២) កំពុងតែត្រូវបានបំពេញទៅដោយអំណាចនៃព្រះវិញ្ញាណបរិសុទ្ធ តាមរយៈប៉ុស្តិ៍នៃ សេចក្តីសង្ឃឹមជាង៦៨ប៉ុស្តិ៍ដែលបានចាក់ផ្សាយជាង៨០ភាសានៅជុំវិញពិភពលោកផងដែរ។
តាមរយៈព្រឹត្តិការណ៍ពិភពលោកដ៏ជ្រួលច្របល់ដែលមិនធ្លាប់មានពីមុនមកនោះ ព្រះបានប្រើប៉ុស្តិ៍នៃសេចក្តីសង្ឃឹមក្នុងការចែកចាយសារនៃការលើកទឹកចិត្ត និងឱកាសក្នុងការទាក់ទងជាមួយនឹងអ្នកទស្សនានៅជុំវិញពិភពលោក។ សេចក្តីសង្ឃឹមនៅឯផ្ទះ (Hope at Home) ដែលជាកម្មវិធីមួយនៃប៉ុស្តិ៍នៃសេចក្តីសង្ឃឹមបានក្លាយមកជាសេវាកម្មព្រះវិហារ អនឡាញតាមតំបន់ជារៀងរាល់សប្តាហ៍ ដោយការផ្តល់ជូននូវសារលើកទឹកចិត្ត តន្ត្រី និងការណែនាំអំពីសុខភាពពីសំណាក់អ្នកជំនាញ សម្រាប់មនុស្សរាប់ពាន់នាក់នៅជុំវិញពិភពលោក។ លោកអ្នកអាចស្តាប់តាមគេហទំព័រ HopeTV.org/AtHome។ វេទិកាសិក្សាព្រះគម្ពីរ Hope.Study ត្រូវបានពង្រីកក្នុងការផ្តល់ជូននូវវគ្គសិក្សាព្រះគម្ពីរដោយឥតគិតថ្លៃ និងថ្នាក់ សិក្សាព្រះគម្ពីរស្រាលៗទៅលើប្រធានបទដូចជាការបញ្ឆេះជីវិតខាងឯសេចក្តីអធិស្ឋានរបស់ លោកអ្នក ការគ្រប់គ្រងទៅលើស្ថានការណ៍តានតឹងទាំងឡាយ និងការសិក្សា ដើម្បីអោយបាន យល់អំពីព្រះគម្ពីរអោយកាន់តែប្រសើរឡើង។ យើងក៏អាចទស្សនាអំពីទីបន្ទាល់ដ៏ឆេះឆួលពីអ្នកទស្សនាទាំងអស់ដែលបានផ្លាស់ប្តូរជីវិតរបស់ពួកគេផងដែរ។ លោកអ្នកអាចទស្សនា ទីបន្ទាល់ទាំងនេះនៅឯ HopeTV.org/Transformed។ យើងក៏សូមលើកទឹកចិត្តលោកអ្នក អោយអញ្ជើញគ្រួសារ និងមិត្តភក្តិរបស់លោកអ្នកមកទស្សនាប៉ុស្តិ៍នៃសេចក្តីសង្ឃឹមផងដែរ។
សេចក្តីអំពាវនាវ៖ ការគាំទ្រងរបស់លោកអ្នកចំពោះប៉ុស្តិ៍នៃសេចក្តីសង្ឃឹមបានផ្តល់នូវធនធាន ជាច្រើនដែលពួកយើងត្រូវការ សម្រាប់ព័ន្ធកិច្ចនៃការផ្សព្វផ្សាយដំណឹងល្អជាសកលនេះ។ ជើនើរ៉លខនហ្វឺរិនបានទទួលប្រាក់តង្វាយ១ចំណែកពីភូមិភាគជាប្រចាំ បន្ទាប់មក ពួកគេបាន ចែកចាយប្រាក់ជំនួយនេះទៅអោយគម្រោងនៃបេសកកម្ម និងស្ថាប័នទាំងប៉ុន្មានវិញ។ ប៉ុស្តិ៍នៃ សេចក្តីសង្ឃឹមក៏ត្រូវបានរាប់បញ្ចូលនៅក្នុងបញ្ជីនេះផងដែរ។ ប្រាក់តង្វាយបន្ថែមទៀត សម្រាប់ ប៉ុស្តិ៍នៃសេចក្តីសង្ឃឹមនេះ ត្រូវបានផ្តល់អោយតាមរយៈស្រោមសំបុត្រដទៃទៀត ដែលបានផ្ញើមកកាន់ប៉ុស្តិ៍របស់ពួកយើង។
សេចក្តីអធិដ្ឋាន៖
ឱព្រះអម្ចាស់អើយ ទូលបង្គំសូមអរព្រះគុណចំពោះការត្រាស់ហៅអោយចូលរួមជាមួយនឹងទ្រង់នៅក្នុងការច្រូតចំរូតរបស់ទ្រង់នេះ។ សូមទ្រង់ប្រទានពរដល់តង្វាយ ទាំងនេះ និងអ្នកច្រូតទាំងអស់របស់ទ្រង់ ទូលបង្គំសូមអធិស្ឋានដាក់ថ្វាយនៅក្នុងព្រះនាមព្រះយេស៊ូវ។ អាម៉ែន។
