យើងរាល់គ្នាថ្វាយបង្គំព្រះជាមួយនឹងធនធានរបស់យើងដោយសារទ្រង់បានអញ្ជើញយើងរាល់គ្នាឲ្យចូលរួមក្នុងសកម្មភាពនៃសេចក្តីស្រឡាញ់និងសេចក្តីមេត្តា។ បទគម្ពីរម៉ាថាយជំពូក២៥ បានរៀបរាប់អំពីរបៀបដែលអស់អ្នកជឿលើការយាងមកលើកទីពីររបស់ព្រះយេស៊ូវគួរប្រព្រឹត្តក្នុងខណៈពេលដែលកំពុងរង់ចាំ។ រឿងប្រៀបធៀបអំពីស្ត្រីព្រហ្មចារីទាំង១០បង្រៀនយើងរាល់គ្នាអំពីសារៈសំខាន់នៃការថែបំប៉នខាងព្រលឹងវិញ្ញាណរបស់អ្នកជឿម្នាក់ៗ។ រីឯរឿងប្រៀបធៀបអំពីថង់ប្រាក់គឺនិយាយអំពីការប្រើប្រាស់ទេពកោសល្យ និងអំណោយទានដែលព្រះប្រទានធ្វើឲ្យសម្រេចបេសកកម្ម របស់ព្រះអង្គ។ ទីបំផុត រឿងប្រៀបធៀបអំពីចៀមនិងពពែក៏បានបញ្ជាក់អំពីសារៈសំខាន់នៃសកម្មភាពនៃសេចក្តីស្រឡាញ់និងសេចក្តីមេត្តាជាការបម្រើដល់ព្រះជាម្ចាស់វិញម្តង។ ខណៈដែលយើងកំពុង​ទន្ទឹងរង់ចាំ កិច្ចការរបស់យើងនឹងមិនពេញលេញឡើយប្រសិនបើយើងមិនបានបម្រើដល់អ្នកដែលកំពុងខ្វះខាតនោះ។ នៅគ្រាជំនុំជម្រះ ព្រះជាម្ចាស់ទ្រង់នឹងគិតបញ្ជីអំពីរបៀបដែលយើងប្រព្រឹត្តនឹងមនុស្សតូចតាចទាំងនេះ។

ព្រះវិហារបៀវបាស៊ិន (Beau-Bassin) ដែលស្ថិតនៅក្នុងប្រទេសដែនកោះម៉ារីសៀស (Maurituius) ត្រូវបានជ្រើសរើសធ្វើជាភ្នាក់ងារនៃសេចក្តីស្រឡាញ់និងសេចក្តីមេត្តានៅក្នុងសហ-​​​គមន៍របស់ពួកគេ។ ជាច្រើនឆ្នាំកន្លងទៅហើយ គ្រូគង្វាលថ្មីថ្មោងម្នាក់ពីព្រះវិហារនោះបានជួបជាមួយមនុស្សអនាថាពីរនាក់។ ដោយសារតែអាណិតអាសូរដល់ពួកគេ គាត់ក៏បានសួរពួកគេថាតើចង់ឲ្យ​ព្រះវិហារជួយអ្វីខ្លះដល់ពួកគេ។ ពួកគេបានឆ្លើយថា «ពួកយើងចង់បានអាហារជាទៀងទាត់ឲ្យបាន មួយពេលក្នុងមួយសប្តាហ៍»។ ប្រសិនបើពួកគេបរិភោគអាហារឆ្អែតមួយយបទៀតប្រាកដជាមានន័យ យ៉ាងខ្លាំងដល់ពួកគេមិនខាន។ ជាការឆ្លើយតបទៅនឹងសំណូមពរនេះ ព្រះវិហារបៀវបាស៊ិនក៏ចាប់ផ្តើមផ្តល់ «អាហារមួយពេលក្នុងមួយសប្តាហ៍» ឡើង សម្រាប់មនុស្សអនាថា និងកំសត់ទុរគត​ក្នុង​មូលដ្ឋាន ដែលអាចចម្អែតមនុស្សបាន២៥ ទៅ៤០នាក់។ គ្រូគង្វាលត្រូវបានផ្លាស់ប្តូរទីកន្លែងធ្វើការ ប៉ុន្តែបោះទោះបីជាអវត្តមានគ្រូគង្វាលក្តីក៏សមាជិកពួកជំនុំនៅតែប្តេជ្ញាចិត្តបន្តគម្រោងនេះដដែលដែរ តាមរយៈការបរិច្ចាគពិសេស ឬការនាំយកអាហារដែលចំអិនរួចជាស្រេច ពួកគេអាចឧបត្ថម្ភគាំទ្រដល់ព័ន្ធកិច្ចនេះឲ្យបន្តទៅមុខទៀត។ ជាញឹកញាប់មានអ្នកស្ម័គ្រចិត្តជាច្រើននាក់ពីគ្រប់វ័យបាន​បរិច្ចាគ​ពេលវេលារបស់ពួកគេ ដោយបានចាកចេញពីភាពស្រណុកសុខស្រួលរបស់ពួកគេ។ ឆ្នាំនេះពួកគេ​កំពុងតែអបអរសាទរខួបទី២៥ឆ្នាំនៃកម្មវិធីសប្បុរសធម៌និងការបម្រើដល់មនុស្សអនាថារបស់ពួកគេ។ក្នុងនាមជាសិស្សរបស់ព្រះយេស៊ូវ តើលោកអ្នកប្រាថ្នាចង់ធ្វើជាភ្នាក់ងារនៃព្រះពរ ដោយ​ញញឹមទៅ​រកមនុស្សកំសត់ទុរគត និងអនាថាដែរឬទេ? សប្តាហ៍នេះ យើងរាល់គ្នាមានឱកាសមួយទៀតក្នុងការធ្វើជាព្រះពរ ដោយការថ្វាយបង្គំជាមួយនឹងប្រាក់ដង្វាយ១០ហូត១និងដង្វាយសទ្ធាជាទៀងទាត់។

សេចក្តីអំពាវនាវ៖ «នោះ​ស្តេច​នឹង​ឆ្លើយ​ទៅ​គេ​ថា យើង​ប្រាប់​អ្នក​រាល់​គ្នា​ជា​ប្រាកដ​ថា ដែល​អ្នក​រាល់​គ្នា​បាន​ធ្វើ​ការ​ទាំង​នោះ ដល់​អ្នក​តូច​បំផុត​ក្នុង​ពួក​បង​ប្អូន​យើង​នេះ នោះ​ឈ្មោះ​ថា បាន​ធ្វើ​ដល់​យើង​ដែរ» (ម៉ាថាយ ២៥៖៤០)។

ព្រះអម្ចាស់អើយ ទូលបង្គំយើងខ្ញុំចង់ធ្វើជាដៃគូជាមួយព្រះអង្គជាមួយនឹងធនធាន របស់យើងរាល់គ្នាដើម្បីសម្រាលទុក្ខលំបាកដល់មនុស្សទាំងឡាយដែលនៅជុំវិញយើងរាល់គ្នា។ សូមជួយឲ្យយើងរាល់គ្នាធ្វើជាភ្នាក់ងារនៃសេចក្តីស្រឡាញ់និងសេចក្តីមេត្តារបស់ព្រះអង្គផងចុះ។ សូមថ្វាយសេចក្តីអធិដ្ឋាននេះក្នុងព្រះនាមព្រះយេស៊ូវគ្រីស្ទ។ អាម៉ែន។ ​