លោកអ័ប្រាហាំគឺជាហោរាម្នាក់មកពីព្រះ។​ ព្រះបានចែករំលែកផែនការរបស់ទ្រង់ជាមួយនឹងលោកអ័ប្រាហាំ (លោកុប្បត្តិ ១៨៖១៧)។ ព្រះបានបង្ហាញលោកអ័ប្រាហាំអំពីផែនការសង្គ្រោះរបស់ទ្រង់ក្នុងការសង្គ្រោះមនុស្សលោកដោយការសុគតនៃព្រះរាជបុត្រារបស់ទ្រង់។

«លោកអ៊ីសាកគឺជារូបស័ព្ទមួយតំណាងអោយព្រះយេស៊ូវដែលជាព្រះរាជបុត្រារបស់ព្រះ។ ព្រះ នឹងប្រទានព្រះយេស៊ូវទុកជាតង្វាយជំនួសអំពើបាបរបស់មនុស្សគ្រប់គ្នានៅលើផែនដីនេះ។ ព្រះចង់អោយ លោកអ័ប្រាហាំយល់ពីដំណឹងល្អអំពីព្រះយេស៊ូវ និងដំណើរការនៃផែនការសង្គ្រោះរបស់ទ្រង់។ ម្ល៉ោះហើយ ព្រះបានប្រទានការសាកល្បងមួយដល់លោកអ័ប្រាហាំ។ ព្រះបានបង្គាប់អោយលោកអ័ប្រាហាំសម្រាប់ លោកអ៊ីសាកដែលជាកូនប្រុសជាទីស្រឡាញ់បំផុតរបស់គាត់។ លោកអ័ប្រាហាំបានឈឺចាប់ជាខ្លាំងនៅអំឡុងពេលនៃការសាកល្បងនេះ។ ព្រះបានបណ្តោយអោយលោកអ័ប្រាហាំឈឺចាប់បែបនេះសម្រាប់ហេតុផលមួយ។ ការឈឺចុកចាប់ចេញពីបទពិសោធន៍នេះនឹងជួយលោកអ័ប្រាហាំយល់អំពីផែនការរបស់ព្រះក្នុងការសង្គ្រោះមនុស្សលោក។ លោកអ័ប្រាហាំបានរៀនអំពីទំហំនៃការលះបង់របស់ព្រះ នៅពេលដែលទ្រង់បានប្រទានព្រះរាជបុត្រារបស់ទ្រង់អោយមកសង្គ្រោះយើងចេញពីអំពើបាបនោះមក។ គ្មានបទពិសោធន៍ឯណាទៀតដែលលោកអ័ប្រាហាំបានជួបប្រហាក់ប្រហែលទៅនឹងការឈឺចាប់ដែលគាត់មាននៅពេលដែលគាត់គោរពតាមសេចក្តីបង្គាប់មកពីព្រះអោយសម្លាប់លោកអ៊ីសាកនោះឡើយ។ ដកស្រង់ ពី Ellen G. White, Testimonies for the Church, volume 3, page 369, adapted។

«លោកអ័ប្រាហាំបានទៅជាមនុស្សចំណាស់ម្នាក់។ គាត់បានរំពឹងថា មិនយូរទៀតទេ គាត់នឹងស្លាប់ជាពុំខាន។ ប៉ុន្តែ គាត់ត្រូវធ្វើរឿងមួយជាមុនសិន មុនពេលដែលគាត់ស្លាប់ទៅ។ ពេលនោះ លោក អ័ប្រាហាំនឹងអាចធានាបានថា ព្រះអាចនឹងរក្សាសេចក្តីសន្យារបស់ទ្រង់ដល់កូនចៅជំនាន់ក្រោយរបស់គាត់បាន។ លោកអ័ប្រាហាំត្រូវតែស្វែងរកប្រពន្ធម្នាក់អោយលោកអ៊ីសាក។ ព្រះបានជ្រើសរើសលោក អ៊ីសាកអោយធ្វើជាបុគ្គលម្នាក់ក្នុងការការពារចំណេះដឹងនៃក្រឹត្យវិន័យរបស់ព្រះ។ ព្រះក៏បានជ្រើសរើសលោកអ៊ីសាកអោយធ្វើជាអយ្យកោនៃរាស្ត្រជ្រើសតាំងផងដែរ។ ពួកសាសន៍កាណានបានថ្វាយបង្គំដល់ ព្រះក្លែងក្លាយ។ ព្រះបានជ្រាបអំពីអ្វីដែលនឹងត្រូវកើតឡើង ប្រសិនបើរាស្ត្ររបស់ទ្រង់រៀបអាពាហ៍ពិពាហ៍ជាមួយនឹងពួកសាសន៍កាណាននោះ។ ពួកសាសន៍កាណាននឹងនាំអោយរាស្ត្ររបស់ទ្រង់បែរចេញពីទ្រង់ទាំងស្រុង . . . . ចំពោះលោកអ័ប្រាហាំ ការជ្រើសរើសប្រពន្ធម្នាក់អោយលោកអ៊ីសាកគឺជាជំនួញមួយដ៏សំខាន់បំផុត។ លោកអ័ប្រាហាំចង់អោយកូនប្រុសរបស់គាត់រៀបអាពាហ៍ពិពាហ៍ជាមួយនឹងស្ត្រីម្នាក់ដែល នឹងមិននាំលោកអ៊ីសាកចេញពីព្រះនោះឡើយ . . . . លោកអ៊ីសាកបានជឿទុកចិត្តថា ឪពុករបស់គាត់នឹងជ្រើសរើសប្រពន្ធដ៏ល្អបំផុតម្នាក់សម្រាប់គាត់។ គាត់ក៏បានជឿទៀតថា ព្រះទ្រង់នឹងបង្ហាញផ្លូវក្នុងការ ជ្រើសរើសប្រពន្ធម្នាក់សម្រាប់គាត់ផងដែរ។ ដកស្រង់ពី Ellen G. White, Patriarchs and Prophets, page 171, adapted។

ខ្ញុំមិនទម្លាប់ធ្វើដំណើរទៅណាមកណាដោយមិនបានទូលសួរព្រះជាមុនថា ដំណើរនោះស្របតាម ឬមិនស្របតាមព្រះហឫទ័យទ្រង់នោះឡើយ។ ខ្ញុំរស់នៅក្នុងប្រទេសអៀរឡង់ ក្រុមគ្រួសាររបស់ខ្ញុំរស់នៅឯប្រទេសអាហ្វ្រិកខាងត្បូង រីឯបងស្រីវិញរស់នៅឯប្រទេសណាមីប៊ី។ ខ្ញុំបានចុះទៅសួរសុខទុក្ខពួកគាត់មួយឆ្នាំម្តង។ ខ្ញុំបានអានព្រះគម្ពីរ សៀវភៅអ្នកស្រីអែល្លីន ជីវ៉ៃត៍ និងសៀវភៅមគ្គទេសក៍សិក្សាព្រះគម្ពីរមេរៀនថ្ងៃសប្បាតហ៍សម្រាប់មនុស្សចាស់នៅលើយន្តហោះ។ ខ្ញុំក៏តែងតែដាក់សៀវភៅជំហ៊ានទៅកាន់ព្រះគ្រីស្ទនៅក្នុងកាបូបរបស់ខ្ញុំផងដែរ។ សៀវភៅទាំងនេះបានជួយបង្រួមការធ្វើដំណើរអោយកាន់តែឆាប់ដល់ ហើយនិងនាំអោយមានការសន្ទនាដ៏គួរអោយចាប់អារម្មណ៍មួយចំនួនទៀតផងដែរ។ រាល់ពេលដែលខ្ញុំកំពុងតែធ្វើដំណើរនោះ តែងតែមានហេតុការណ៍ដ៏គួរអោយចាប់អារម្មណ៍កើតឡើងជានិច្ច។

គ្រាមួយ ខណៈពេលដែលខ្ញុំកំពុងតែរង់ចាំជើងយន្តហោះរបស់យើងនៅឯព្រលានយន្តហោះនៃទីក្រុងឌូលីន (Dublin) នោះ ខ្ញុំបានចាប់ផ្តើមនិយាយទៅកាន់បុរសម្នាក់អង្គុយនៅជិតខ្ញុំ។ បុរសម្នាក់នោះមានតួនាទីជាអ្នកស៊ើបអង្កេតពិសេសសម្រាប់កងកម្លាំងប៉ូលិសអៀរឡង់ ហើយគាត់ក៏កំពុងតែធ្វើដំណើរត្រឡប់ទៅស្រុកវិញ ដើម្បីជួបជុំគ្រួសាររបស់គាត់នៅក្នុងទីក្រុងខេប (Cape) ប្រទេសអាហ្វ្រិកខាងត្បូងរៀងរាល់២ទៅ៣ខែម្តងផងដែរ។ ពួកយើងបានពិគ្រោះអំពីជីវិត ខណៈពេលដែលពួកយើងកំពុងតែរង់ចាំវេនឡើងយន្តហោះរបស់ពួកយើង។ នៅលើយន្តហោះ ស្ត្រីវ័យក្មេងម្នាក់បានអង្គុយនៅជិតខ្ញុំ រួចនាងចាប់ផ្តើមនិយាយមកកាន់ខ្ញុំភ្លាម។ នាងបាននិយាយថា «ខ្ញុំបានមកដល់ព្រលានយន្តហោះយឺតបន្តិច ខ្ញុំតានតឺងមែនទែនទម្រាំបានឡើងយន្តហោះនេះ»។ ខ្ញុំបាននិយាយទៅកាន់ស្ត្រីនោះថា «ព្រះទ្រង់ជ្រាបថា អ្នកត្រូវជិះយន្តហោះនេះ។ ខ្ញុំបាននិយាយអំពីរបៀបដែលព្រះបានផ្លាស់ប្តូរជីវិតរបស់យើង នៅពេលដែលយើងអនុញ្ញាតអោយទ្រង់ផ្លាស់ប្តូរជីវិតរបស់យើង។ មុនពេលយន្តហោះចេញដំណើរ អ្នកបម្រើលើយន្តហោះបានប្រាប់ស្ត្រីម្នាក់នោះថា នាងបានអង្គុយខុសកន្លែងហើយ។ ស្ត្រីម្នាក់នោះបានក្រោកចេញទៅ ហើយអ្នកដែលត្រូវមកអង្គុយជិតខ្ញុំនោះគឺជាប៉ូលិសអ្នកស៊ើបអង្កេតម្នាក់នោះទៅវិញ។ ខ្ញុំបាននិយាយ ថា «ពិតជាគួរអោយចាប់អារម្មណ៍មែនខ្ញុំជឿថា ព្រះធ្វើដូច្នេះប្រាកដជាមានហេតុផលអ្វីមួយហើយ មើល ទៅ»។ បុរសនោះបានសួរខ្ញុំថា «តើអ្នកជឿព្រះដែរ មែនទេ?»។ គាត់បានសួរនាំអំពីប្រវត្តិនៃសាសនារបស់ខ្ញុំ ហើយខ្ញុំបានឆ្លើយទៅគាត់វិញថា ខ្ញុំគឺជាសេវេនដេយអាត់វេនទីស្ទ។ គាត់បាននិយាយថា «ពិត ជាចម្លែកមែន ប្រពន្ធរបស់ខ្ញុំដែលជាសេវេនដេយអាត់វេនទីស្ទតែងតែព្យាយាមបញ្ចុះបញ្ចូលខ្ញុំអោយជឿ អស់រយៈពេលជាច្រើនឆ្នាំ»។ ខ្ញុំបាននិយាយថា «ខ្ញុំពិតជាចង់សំណេះសំណាលជាមួយនឹងអ្នកណាស់»។ ឥឡូវនេះ ខ្ញុំបានជួបអ្នកមែន។ យើងបានពិគ្រោះគ្នាអំពីសេចក្តីសង្គ្រោះ បន្ទាប់មកខ្ញុំបានអោយសៀវភៅជំហ៊ានទៅកាន់ព្រះគ្រីស្ទមួយច្បាប់ដល់គាត់។ គាត់បាននិយាយថា «ប្រពន្ធខ្ញុំតែងតែព្យាយាមបញ្ចុះបញ្ចូល អោយខ្ញុំអានសៀវភៅនេះ ឥឡូវនេះខ្ញុំនឹងសាកអានវាមើល»។

មនុស្សដែលខ្ញុំបានជួបទាំង២នាក់នេះពិតជាគួរអោយកត់សម្គាល់មែនទែន។ ចិត្តរឹងរូសរបស់ប៉ូលិសស៊ើបអង្កេតត្រូវបានបំបែកចេញមុនពេលដែលយន្តហោះរបស់យើងបានចាកចេញទៅ។ ខ្ញុំក៏បាន ចែករំលែកអំពីព្រះជាមួយនឹងស្ត្រីម្នាក់ដែលអង្គុយខុសកន្លែងផងដែរ។ ប្រទេសអៀរឡង់គឺជាប្រទេសបែបលោកីយ៍សុទ្ធសាត ហើយការនិយាយអំពីសាសនាគ្រីស្ទទៅកាន់អ្នកដទៃនោះមិនមែនជារឿងងាយស្រួលនោះឡើយ។ ប៉ុន្តែ ព្រះបានប្រទានឱកាស២ដងដល់ខ្ញុំមុនពេលដែលយន្តហោះបានហោះឡើងទៅ។