យើងរាល់គ្នាបានជ្រើសរើសថ្វាយដង្វាយជាទៀងទាត់ និងតាមប្រព័ន្ធដោយសារព្រះជាម្ចាស់ទ្រង់ថែរក្សាការពារយើងរាល់គ្នាជាទៀងទាត់ដែរ។ សាច់រឿងអំពីប្រេងនិងម្ស៉ៅរបស់ស្ត្រីមេម៉ាយសាសន៍​ស៊ូណាមបានបញ្ជាក់យ៉ាងច្បាស់អំពីសេចក្តីមេត្តារបស់ព្រះជាម្ចាស់ដែលមិនចេះរីងស្ងួត និងស្រស់ថ្មី​ឡើងជារៀងរាល់ព្រឹក។ ជារៀងរាល់ថ្ងៃក្នុងអំឡុងបីឆ្នាំកន្លះនេះ តែងតែមានអាហារនៅលើតុរបស់នាងជានិច្ច។ មិនដែលមានថ្ងៃណាដែលនាងគ្មានអាហារសោះឡើយ។ ព្រះជាម្ចាស់ទ្រង់ទទួលស្គាល់ដោយស្មោះត្រង់ចំពោះសេចក្តីសន្យារបស់ព្រះអង្គក្នុងការឆ្លើយតបទៅនឹងអំពើល្អរបស់ស្ត្រីមេម៉ាយដែលបានផ្តល់នំតូចមួយដំបូងបង្អស់ដល់លោកអេលីយ៉ា ដែលជាបាវបម្រើរបស់ព្រះអង្គ។ ក្នុងអំឡុងគ្រា​ទុរភិក្សនេះ បាដិហារ្យរបស់ព្រះគឺកើតឡើងជាបន្តបន្ទាប់ប្រៀបដូចជាថ្ងៃរះឡើងជារៀងរាល់ថ្ងៃដែរ។ សូម្បីតែសព្វថ្ងៃនេះក៏ព្រះជាម្ចាស់ទ្រង់នៅតែប្រទានពរជាទៀងទាត់ដែរ។ ថ្មីៗនេះ គ្រួសារមួយគ្រួបានទៅបោះទីលំនៅនៅក្នុងប្រទេសថ្មីមួយ ហើយបានជួបបញ្ហាហិរញ្ញវត្ថុខ្លះ។ ថវិកាគ្រួសាររបស់ពួកគេមិនមានតុល្យភាពនឹងការចំណាយឡើយ។ ពួកគេបានខិតខំត្បិតត្បៀតការចំណាយហើយក្តីក៏នៅតែមិនគ្រាន់ល្មមដែរ។ ឥឡូវនេះដល់ដំណាក់កាលដែលត្រូវសម្រេចចិត្តដ៏សំខាន់មួយ ថាតើត្រូវកាត់បន្ថយ​ប្រាក់ដង្វាយ ឬមួយក៏ឈប់ឲ្យកូនរៀនថ្នាក់ព្យ៉ាណូរបស់គាត់។ ការសម្រេចចិត្តទាំងពីរនេះគ្រាន់តែ​បណ្តោះអាសន្នប៉ុណ្ណោះទម្រាំដល់ស្ថានភាពហិរញ្ញវត្ថុរបស់ពួកគេប្រសើរឡើង។ ពួកគេបានអធិដ្ឋាន​ទាំងឈឺចាប់ ទីបំផុតពួកគេបានជ្រើសរើសយកជម្រើសទីពីរ គឺឲ្យកូនផ្អាករៀនថ្នាក់ព្យ៉ាណូសិន។ បួនដប់ថ្ងៃក្រោយមក នៅពេលព្រឹកព្រលឹមមួយ ភរិយារបស់គាត់បានឃើញស្រោមសំបុត្រមួយនៅលើឥដ្ឋក្នុងបន្ទប់ទទួលភ្ញៀវរបស់ពួកគេ។ ស្រោមសំបុត្រនោះបិទជិត ប៉ុន្តែពុំមានសរសេរឈ្មោះនៅលើនោះទេ។ នៅពេលដែលពួកគេបើកស្រោមសំបុត្រ ពួកគេមានការភ្ញាក់ផ្អើលយ៉ាងខ្លាំងដែលឃើញមានលុយនៅក្នុងស្រោមសំបុត្រនោះ! ចំនួនលុយនៅក្រោមស្រោមសំបុត្រគឺច្រើនជាងថ្លៃសាលារៀនព្យ៉ាណូមួយត្រីមាសទៅទៀត។ ពួកគេក៏ចាប់ផ្តើមយល់អំពីការដែលព្រះជាម្ចាស់ទ្រង់ថែរក្សាដល់ពួកគេយ៉ាងទៀងទាត់។

កាលៈទេសៈជីវិតខ្លះអាចនឹងល្បួងយើងរាល់គ្នាឲ្យរំខានដល់ភាពទៀងទាត់របស់យើងក្នុងការថ្វាយបង្គំព្រះជាមួយនឹងការថ្វាយធនធានរបស់យើងរាល់គ្នា។ ប្រសិនបើនេះគឺជាការលំបាករបស់យើងរាល់គ្នា ចូរយើងអនុញ្ញាតឲ្យសេចក្តីស្មោះត្រង់និងភាពទៀងទាត់របស់ព្រះជាម្ចាស់បណ្តាលចិត្តយើងរាល់គ្នាចុះ។ សប្តាហ៍នេះ ជាការឆ្លើយតបទៅនឹងនិរន្តរភាពរបស់ព្រះអង្គ ចូរយើងថ្វាយបង្គំព្រះអង្គជាមួយនឹងប្រាក់ដង្វាយ១០ហូត១ និងដង្វាយសទ្ធាជាទៀងទាត់ចុះ។

សេចក្តីអំពាវនាវ៖ «ដ្បិតព្រះយេហូវ៉ា ជាព្រះនៃសាសន៍អ៊ីស្រាអែល ទ្រង់មានព្រះបន្ទូលដូច្នេះថា ម្សៅក្នុងខាប់នោះនឹងមិនដែលផុតទៅ ហើយប្រេងក្នុងដបក៏មិនដែល​រលោះឡើយ ដរាបដល់ថ្ងៃដែលព្រះយេហូវ៉ានឹងបង្អុរភ្លៀងមកលើផែនដី» (ពង្សាវតារក្សត្រទី១ ១៧៖១៤)។

ព្រះអម្ចាស់អើយ ទូលបង្គំយើងខ្ញុំសូមអរគុណព្រះអង្គសម្រាប់ភាពមិនប្រែប្រួល និងអស់កល្បរបស់ព្រះអង្គ ដែលយើងរាល់គ្នាអាចពឹងពាក់សម្រាប់ការរស់រានជារៀងរាល់ថ្ងៃបាន។ សូមជួយយើងរាល់គ្នាឲ្យឆ្លុះបញ្ចាំងនូវរូបភាពនៃភាពទៀងទាត់នៅក្នុងភាពស្មោះត្រង់ផងចុះ។ សូមអធិដ្ឋានក្នុងព្រះនាមព្រះយេស៊ូវ។ អាម៉ែន។ ​