ចាប់តាំងពីពេលនោះមក យើងខ្ញុំបានធ្វើការសហការគ្នាជាមួយប៉ាស្ទ័រ ស៊ន សុផាត ក្នុងការផលិតកម្មវិធីវិទ្យុបន្ថែមទៀតសម្រាប់អ្នកស្តាប់របស់យើង ដើម្បីឲ្យពួកគាត់អាចស្តាប់បានកាន់តែច្រើនតាមរយៈវិទ្យុ ក៏ដូចជានៅលើប្រពន្ធ័អ៊ីនធឺណែតផងដែរ។ រហូតមកដល់ពេលនេះយើងបានផលិតកម្មវិធីរបស់យើងចំនួន៣០នាទីជារៀងរាល់ថ្ងៃ គឺចាប់ពីថ្ងៃច័ន្ទដល់ថ្ងៃសុក្រ រីឯនៅរាល់ថ្ងៃអាទិត្យយើងមានកម្មវិធីផ្សាយ៦០នាទី។ យើងខ្ញុំក៏បានបង្កើនការចាក់ផ្សាយកម្មវិធីពីរដងក្នុងមួយថ្ងៃ ព្រឹកនៅម៉ោង ៦:00  និងពេលយប់នៅម៉ោង ៨:00។

សូមថ្វាយសិរីល្អដល់ព្រះជាម្ចាស់ តាមរយៈកិច្ចខិតខំប្រឹងប្រែងនៃកិច្ចការវិទ្យុនេះ យើងខ្ញុំបានមើលឃើញនូវលទ្ធផលជាវិជ្ជមានបានកើតមានឡើង។ មានបងប្អូនមួយចំនួនបានសម្រេចចិត្តទទួលយកព្រះយេស៊ូវជាព្រះអង្គសង្គ្រោះផ្ទាល់ខ្លួនរបស់ពួកគេ។ មានបងប្អូនចំនួន១៧នាក់បានសម្រេចចិត្តទទួលពិធីបុណ្យជ្រមុជទឹក និងដើរតាមព្រះយេស៊ូវតាមរយៈកិច្ចការរបស់វិទ្យុនេះ។ នៅពេលជាមួយគ្នានេះដែរក៏មានបងប្អូនជាច្រើនដទៃទៀតកំពុងតែតាមដានស្ដាប់កម្មវិធីវិទ្យុរបស់យើងខ្ញុំជារៀងរាល់ថ្ងៃ។ យើងខ្ញុំបានទទួលសំបុត្រក៏ដូចជាទូរស័ព្ទពីប្រិយមិត្តដែលទាក់ទងមកពីកន្លែងផ្សេងៗនៅទូទាំងប្រទេសផងដែរ។ មានប្រិយមិត្តមួយចំនួនមានការចាប់អារម្មណ៍យ៉ាងខ្លាំងដោយបានសួរនូវសំណួរដែលទាក់ទងទៅនិងដំណឹងល្អរបស់ព្រះជាម្ចាស់ ហើយមានប្រិយមិត្តខ្លះ ទៀតបានស្នើសុំមេរៀន និង        សម្ភារៈផ្សេងៗទៀតសម្រាប់ការសិក្សាស្វែងយល់បន្ថែមទៀតពីព្រះគម្ពីរ និងសារនៃដំណឹងល្អរបស់ព្រះជាម្ចាស់។

យើងខ្ញុំទាំងអស់គ្នាជាសហការីនៃវិទ្យុអាត់វេនទីស្ទពិភពលោកប្រចាំនៅកម្ពុជា សូមអំពាវនាវដល់លោកអ្នកទាំងអស់មេត្តាអធិស្ឋានសុំឲ្យព្រះវិញ្ញាណបរិសុទ្ធគង់នៅជាមួយនិងកម្មវិធីវិទ្យុដែលយើងខ្ញុំបានផលិត ដើម្បីឲ្យអ្នកដែលបានស្តាប់ទាំងអស់នៅគ្រប់ទិសទីបានទទួលនូវសេចក្តីសង្រ្គោះទាំងអស់គ្នា។  អាម៉ែន៕